“Asen telungtet nung shishitep nung koda?”

By Lanu Atsongchanger

Ni ne dang “ali meimchir nüngdaktibatem (basic needs) ya kechisa?” ta asüngdang nung “chiyungtsü, abensüoshi aser talitsü ki (food, clothing & shelter)” ta ashitsü aser ibaji ajaki meteta aliba ka lir. Tanü asen tensa reprangdangra, alu ayimer kanga ajema kümogo. Taoba mapang asenok nisung ya 70% aluyimer liasü, aji asü nung pei kidang alu nungi züsentetba chiyungtsütem peria dang liasü. Alu ayimtsü shiangaia majungshi saka “alu meyimra kechi chiyungtsü” ta tangatetba liasü. Aji asü nung teka mapa aser ali rongsen agi anünga maliasü saka tanübo aluyimer züngteta dang lir. Aki-alu koda ayimtsü, nok-meritsüng koda amshitsü, khu aser chi koda abentsü koba asen tsürabur mapang itemji tama ranglokdong liasü, saka aluyimer aser teka mapa inyaker kanga ajema aküm nung asen nüngdakba ajak market nung dang metaloker alitsüsa tensa kati aruogo. Market ta kodang südir, ne ket nung sen lira idakji na/ni aginüba/chinüba-jemnüba ajak angutsü.

Tanü asen tensa nung tazünger onsarar mapa mangur jenti nangdaka lir. Iba ama tensa ka nung pei pok-süng aahtsüba lenmang bushia alitsüji kanga tongtibang. Tsürabur mesüra government mapa nung dang metaloker alitsüba mapangto süiatokogo. Aji oda peisasa anakteta alitsü lenmang aika lir aser item rongnungji shishilembatsü (business) mapa yaa ka lir. Iba mapa nung ya aikati temai adoka dokan lapoker amener aser ano aikati kidang mesüra osettem bener asen tsüngdong tonga bener arua shishir aser iba ama mapaji shisadangra aikatibo meinyakteter. Anungji, itemji ajungshia inyakteptsübaji tongtibang ka asütsü ta bilemer.

Asenoki jila nungi pila or asen kiyong/yimdak dokan tilala lapoka shishilembaba mapa inyakteper aser iba mapaji ajanga kibong aika mesüa aoba asenoki meteta lir. Iba shishilembaba nung ozüng telatet aika lir saka pei dak tuluba keta lir. Na shishi jungra, ne dang aliaponger (customer) aika alitsü, saka na shishi mejungra ne shishilembaba nung poksüng malutsü (profit) aser ibaji business inyaker kati meteta alitsü kanga tongtibang.

Asenoki Mokokchung Town-ji kodang reprangdir, Ao Kaketshir Mungdang shisa tajung ajanga pi (tzümar) nisungi town mokseper aliba joko tanübo asen nisung aika iba shishilembaba nung ahyanga chiyimdak lenmang pateta pei poksüng ngua kija aser kibong mesütepba asenoki angur. Ya atangji tepelatsü tulu lir aser ibai Ao lima rongsenketzüng nung otsüsütsü ka lir. Joko asen Mokokchung-jia libaliru aser inyaksangshi teimba ka nung market life-ji tangar menepa akümba asenok ajaki angur, aser iba ya ajanga asen lima tejakleni aoba sayur. Mokokchung nung joko gari masemer. Town nung senzü-sembongtsü lenmang temesü kümogo. Item ajak ya kodang bilemdangdir, asen nisung aika shishilembaba nung pei poksüng aahzüka shishilembaba ajanga asütsü akok ta külen kabo angateter. Aji oda, jila nung dang masü saka kiyong balala ajak nung asen nisüngi dokan lapoka shishilembateper. Ibayongji, asen rongsenketzüng nung tejakleni aoba meteter.  

Kodang asenoki jila nungi pilar dokan ka lapoker (tat. ner kiyong nung), ali-aponger (customer) nüngdak peridaktsütsü atema rongsen, tashi, mapang, shisatsü nüngdaker. Aser iba dokan lapokba ajanga asenok watidaki (bazaar) aotsü melena idakji shishir. Tanü mapang den aritepa aliba densa ka nung asenok alidang asen kiyong nung dokan tilala (mini-shop/pan shop etc) aliba ajanga asen mapang aser tashia kümzüker. Kechiba süra, na town-i or aru nung 30–40 minutes bo agitsüba, iba den ano na tashi intoka/bülema or arutsüba mesüra gari/two wheeler alira totzü tsüka or ang arutsüsa akümer. Item ajak nungji nü mapang, tashi aser sen dena lir. (nai jungjunga iba ya ken shisadangang).   

Tanabuba nung aser tongtibangtibaji, asenok ajaki metet, asen timtem nung shiba dak jenoker? ta süra, kiyonger/kidanger dak jenoker. iba kasaji asen ket nung kodang sen (cash) melilir, kiyonger dokan nungto ang jenoker. Ne ket nung sen mali nungji paki (credit) to kiyonger dokan tem nungto meratai oa agitsüsa akümer aser iba jaki asen nüngdak kabo atalokdaktsür.

Saka asenok ajaki kanga dang junga shisadangtsüba kaji, asen ket nung kodang sen (cash) lidir, yakta dang town-i oa asen ket nung sen tera aliba to agi tzümar den shishir arur, saka kiyong nung aliba na/ni timtem nung jenokdak dokantem tobo paki agi südaktsür, kechiba süra nai cash agi shishi masü saka ne ket nung kodang sen melilir, idangji dang nai ner kiyong nung aliba dokan to bilemteter aser pakito agir (ajakibo meinyaki alitsü akok). Aji sür angati ka meshir ama pakito meshir saka mapang shitak nung sen magütsüteter. Asenoki metettsüba kaji, kiyong nung dokan lapokerto, pa/la bo dokan osettem whole sale (rangbenshishi) agi alir saka teka nung sen amer or ang jepdak shishir (cash) bener arur. Pa/la town-i or aruba nungto mapang, tashi, shisatsü aser sen tena lir. Town nung oset alibato taxi mesüra mutia nem dang bener arudaktsür. Idakji khubenba transportation charge tena lir. Anungji, pa dokan nung oset bener aruba to ayok metenzükdangyongi pa/la pocket nungi sen ao tenzüker. Ano kodang dokan ki to reprangdir, dokanto para agütsütsüba, light bill agütsütsüba, pa/la anogo piyong amenba taa (hajira) atoktsüba. Item ajakji dokan oset yokzükba nungi dang ongkoji adoktsüba lir.

Ano ni teti kiyonger dang shia arubaji kaji; kiyong nung lokti balala meeting agiteper aser iba meeting atema süngojemtsü aser chiyungtsü atema shishir saka town nung dang tilaba nungi tuluba tashi oset/chiyungtsü shishir gari hire mesüra mutia nem taa agütsür ki atonger, saka mabensaba/meperiba jidang kiyong nung aliba dokan nungto oa alir/shishir. (Bilemdangra na timtem nung dang jenokdak ka ama ne kiyonger to kümdaktsür). Na town nung oa shishiba den transportation (mutia/kari hire) ta asü dangbo kiyong nung shishiba toang talangba adoktsü. Anungji, nai aginüba oset/chiyungtsüji dang lirabang tangar nem/mutia nemji sen agütsütsü melena kiyong nung aliba dokan nemjiang agüjangkoto ta shiner. Na town-i or aru nung ne mapang aser tashi sa intoker masü na? na mapang indoka town-i or arutsü melenaji kiyong nungji ang shishir mapang tatsükaji ne mapa nung mapangji intok tajungba masü na ta shidanger. Kiyong nung shishibaji ajanga na kecha balakabo makoksatsü/sensak tiai maitsü saka nai jungjunga bilemdangra, kiyong nung shishibajiang na/ni atema tajangzük tuluba asütsü (Tat: asen timtem/nüngdak nung paki agiba /jenokbaji tajangzükji masü na!!!!).  

Tasembuba nung, donations aser tanga sarusaji amalabo town nungto masü saka  aiben asenoki kiyonger dangang saruteper. Iba mapang yabo asen kiyong nung aliba dokantem dang to ang tululu imlaa oa meshir, saka aseni sen cash agi town nung oa tzümar den shishirtem dang tobo iba amala asen nüngdak nungbo memeshiteter (bilemdangang kiyong nung aliba nai/ni paki agiba dokan tobo paki agi südaktsüdagiji).  

Asenoki India nunger otsüji reprangdangra, British nunger yimsüsüba mapang India nunger rongsen jenti par limai bener oatok nung asen rongsenketzüng (economic life) nung kanga langtsüngi luatok, kechiba süra India nunger sento rosepatok asüngto, iba yongji tanü tashi ano alima kin aika memenepi lir. Idaki ni shinüba tongtibangbaji, kodang asenoki asen ket nung aliba senji (cash) asen kiyong nung aliba dokan nungji dang shishia longdangtsüdir (town nung meshishii), külen mesüra külen nungibo asen dangisa teyari arur. Nai shishiba sen toagi dokan kiburi Arogo nem tenla agütsür, telok-tenji balala nema tenla agütsür mesüra asen timtem nung aser tasü-tama nung nübu aser rongsen agi yariteter. Saka aseni town nung oa shishisang toagibo asen timtem nung meyaritettsü mesüra tenla magütsür. Kodang senji asen kiyong telungtet nungji dang longdaktsüdir (circulate within the circle), senji kodanga meruseptsü. Ne ket nungi senji tuguyonga ne kiyongerba ket dangisa air aser pa/la nungi sen mesüra teka mapa, shisatsü aser yamala mesükba ajanga na teyari angur.  Tat: asen kidang lendong mesüra tasü-tama atalok nung nai town nung oa teka nung sen amer tzümar den shishir toagi na arua yaritsü asü koda?  Jungjunga shisadangang, asen nisung den shishitepba nung asenok rongnung dang senji longteptsü saka pi nisung den shishibajibo par limai asen rongsento bendener oadoker aser ibaji ajanga asen rongsenketzüng nung tangar memeneper, kechiba süra tzübong nungji tapok ali tashi kodanga masüngtsü.

Anungji kokra, asenoki asen kiyong nungjiang shishilemba nung kangasa ajungtsü. Süra asen rongsenketzüng nungji kangarabo langtsüngi malutsü kechiba süra senji asen tsüngda nung dang longdaktsür aser tajangzükji aji asütsü.  Anungji, tang nungi danga aseni shir den yaritep nung teyari angutsü, iba yimji meteta yariteptsü koda? Nai/ni kiyong nung lapoka aliba dokantem nung shishiba ajanga kecha balakabo makoksatsü, anungji, asen kiyong nung aliba dokantem denjiang shishitepa ajungketdaktsü nung koda????