By Wb. I. Zulu Pongen

Lokti menen ta süra ibai züngdanger mezüngdangma lir. Saka item nungi kanga tongtibang kar oda yabosa ta bilemba kar lemsatepner. Yagi alima sensak tiai bener arutsür, kibong yareta kümdaktsür aser tanela tashi kongshia ibala ama temenen indang kar shisadangdi.

Arogo, yimden aser lokti senden balalai sen lenmang bushiba nungi tim masüba kar ajuruba indang tera shisemer.

Sen bushiba yimya tamajung

Lokti senden shiaji sen dak amendaka lir, membership nungi tenzüker ano sen arulen lenmang bushir idangji sen bushibayim nung lokti menenba kija kibong timtemdaktsüba jenti ataloka arur. Ajak tim amai, saka ajakbo kibong ajakibo makoker, anungji, lokti senden koba südir süaka, lottery aika adoker kangshia lemshia ayokba ka. Ano calendar yanglua kabosa-kabosa ta yoka aoba/aruba, ano osettsüset tapu balala jenti ki tonga lemja aruba yimya, Arogo aser CYE amala lokti yagibo khenyongi yamala yimya ya mebenshitsüla. Ya tamangba yimsü den mapet.

Arogo nung envelop tali arur

Arogo nung envelop tali arur, arogo aser mungdang dak sentakba school fund saru, college envelop tapu balala aser ano arogotem tenla ki asüba coupon-tem aser lottery etc. Government tenzükerbo koba tesemi pa/la odir, tenla ki asüba nung densemer, pei yimtsüng aser pei alidak town item ajak nung tenla ki asüba ajurur. Itemibo maitoktetba tenla lir, saka tilatari coupon, lottery aruba item yabo meyanglu tajungba, pei sasep nung dang yanglutsüla saka tangar dak imlaa inyakba yagi alima menener. Mapabo tajung ama saka onsaraba yagi nüburtem menentsür.

25 & 75 years jubilee yabo mamung tajungba

Ano, Jubilee- golden jubilee, silver jubilee, platinum, aser centenary jubilee….etc. kechi telok südir süaka item ajak ya munga arur. Isreal nunger dak ajizüka amunger asünungji kokra Lai nung shia aliba ama Golden jubilee (50 years), Centenary jubilee (100 years) dak alaka 25 & 75 years jubilee yabo alima tera anizüngzüktettsü asoshi mamung tajungba, kechiaser item ajak ya nung ya sen sentaka lir.

Thanksgiving ya Arogoi amshiba tapetba

Thanksgiving tetezü ‘Tsüngremer temoatsü asoshi tenüngsang agütsüba lir’. Ibai sen lenmang bushiba yimya nung mamshitsüla. Saka telok tilala ajaki oda union thanksgiving, sarasadem telok thanksgiving yamalabo mamshi/mali tajungba, ibaibo Arogoi amshiba tapetba lir.


Wb. I. Zülu Pongen ya Longsa nunger pensioner ka lir. Pai mapang shia osangkaket balala nung tensa den apet pa tebilemba aser sangrotem lemsatepba ajanga nüburtem temoatsü ngua arudar