By Wati Longchar

Covid-19 ajanga asen Naga nunger auso tangar ket nung yua lir ta sayuogo. Tanga state-i jang, alo, dal, totzü, metsü, sapon, entsü, ango, shi, etc. nungi bener marura ita ka-ana dang ariena litettsü südi. Ao Milen yim-o-züluri, “Mokokchung nung repranga aru nung tang anempong süloker (Covid-19 lockdown) nüngdakba chiyungtsü aser osettem ayokba tsütsü reprangdangra shishilembartemji teimba noklang nung 99 tzümartem dokantem lir aser talirtemji noklang nung 99 asen alisopurtem (local) lir” ta zülua aliba züngshidang, ni kanga dang aoksa aser memeteti ola adoka tejashi agi menden nungi noktakatoker liasü. Yamai dang aonungbo Naga nunger tia majungtsü; asen nübur asen tasoli nung alar kümogo! Mokokchung nung dang masü saka Nagaland nung yimtitem ajak nung, aser yimtsüng tashi nung tzümar dokan 90% bo angutsü südi. Local nisung kar dak alaka dokan tulu aika mali, teimba ka aonsotsü tilateri kima yimdong nung yoktepba ya dang lir. Iba denji ano tangar kin dokan-a aika malitsü südi. Reprangang! Tzümar dak alaka, Mokokchung town nung asen Aori, Naga nunger kin balala nem dokan amentsü para ki kwi agüja lir? Naga nunger nem preference agütsütsü ta kibur mulungjangi aiter asü maiter? Hoi Aortem bilemdangang! – Sema, Lotha, Konyak, Sangtam, Chang, Yimchunger, Phom, Khiamnungan nunger nem dokan para kwika Mokokchung nung ki kiburi agüja lir?  Tuensang, Longleng, Mon, Wokha, Dimapur, Kohima yimtitem nunga Naga nungeri Naga nunger nem ki para jaka tajung nung business inyaktsü agüja lir mali?  Karibo mepelatsü akok, ya tzümar meimba agi para kiji parnok nem agütsüba masü, saka tzümari  sahib ta ajatsü aser mapang mashika nung parnokbo meintoktsü akok, mesüra merenshitettsü akoktsü ta asüba agi parnok nem agütsü! Lanurtemi ibai khen aroka bushitettsüla aser temelenshi bener arutsüla.  Tanübo 90% dokan aser shishilembaba lenmang dang tzümari  arakmoka lirko, saka talangka melii yimden yimli, ali-rongsen, senmang aser lokti taküm ajunga azüoka ayutsü. Tanü India nung Narendra Modiba-i anir yimsüsür, party ajak cooperate balalai aliatokba ajanga India yimden yimsüsüba ajonga cooperate-i control (Government-i masü) süa aliba ajaki jembir. Naga yimdena iba jenjang nungji  tetsüng ajemokogo.

WhatsApp “Nokinketer” sabang nung tenur Süpongchiten-i yamai züluba angu: “Tanü Naga lima reprangdangra kanga temeimtsüka lir. Tat. agi, mapa tila teri ajunga TZÜMAR-temi dang inyaker. Electrician-a tzümar, plumber-a tzümar, ku mejeper-a tzümar, painting wala-a tzümar, Auto wala tzümer, dokan wala tzümar, tiles wala tzümar, construction workers ajonga tzümar, sü arür (cutting and swing) tzümer, kima aoker (sweeper) tzümar, mobile repairing wala ajunga tzümar, agent ajunga tzümar, etc.  Anungji, Naga nunger rongsen ajunga parnok keti aor aser asenokbo mapa mangur ta kidang matu küma kazüteper.” Kangasa aji shitak, ochi o aser ajaki arok aroka shisadangtsüla. Naga nunger dak alar mulungsentsü ka lir (slave mentality), aser aji agi Govt. mapa dangashi (white collar job), private mapa yabo mapa masü amai bilemer. Anungji, competitive exam nung pass mesütetra government mapa backdoor ajanga mesüra sen agi alizüka aitsü meranger.  Ano tsürabur aika mulungjang nung tamajung kaji, tanur sodi arudang aser telephone nung jembidang, mesüra kidang tajungshi o ashidang tanur dang meranga züngang “competitive exam”  aim sür züngang ta teti  ajungshir. Khenkhenbo parnok medemer den medemdanga ner medemerbo yamaji takok nguogo, kümogo ta aiben lepshia ashitsü aser arütsütsü aser kidanga pelaa meliteter. Competitive exam nung pass asübaji “whole world” koktet amai bilemtsü, aser pass masürtemji “total failure”, alima nung taso malang amai bilemtsür. Medical aser Engineering azüngtsü asoshi meshimtetra pei chir alima nung teimla kecha mali amai bilemtsür aser jembitsür. Iba tangatetba yagi lanurtemi mapa tanga “outside of government job” ya meinyaker aser nüburi menüa repranger (look down). Iba tangatetba ya khenyongi melenshitsüla, Nagaland state tila ka nung govt. mapa ajakbo matatsü aser tamakoktsü. Iba kümo tashitak taneptsü lenmang bushitsüla.

Lockdown mapang dokan kiburi chiyungtsü peria mali ta, saka jenjang tur ayoker ta asatepba mapang ka nung lanur kati “Asen Ao Lima Asoshi” ta WhatsApp sabang nung, Covid-19 sülenbo Naga nungeri wholesale dokan amentsüla; Naga nunger tzümar dak metaloker ali nungbo majungtsü ta zülua angu. Wholesaler asenokia inyaktet, saka chiyungtsü asoshi tangar dak dang metaloker inyaktsü memerangtsüla. Asenokia peria züsentettsüla. India lima balala aser temeket countries Myanmar, China, Bhutan, Bangladesh lima dangia yoktettsüsa züsentettsü Tsüngremi ali temo moaja lir. Saka züsentettsü asoshi tenem tsüngleni alua prokshia alitsüla; tokolak bushiba putu tetsü-tebou mapang ama yimdak ki tetsüngda maka tenem nung litepba ya melenshitsüla; prokshia tenemtsünglen yim küma aotsüla. Meimchir soyapokya aoba otsü reprangdangra, tenem nung kodanga meimchir yimsoshi (civilization) akaba otsü mali. Lenten nung dang yimsoshi zuinba otsü azünger. Naga nunger rongsenren aser terenlok maparen balala nung tangar memenepba aser mainba kuli kaji tenem nung development aotsü merangba ajanga lir. Tat. agi, Kohima, Mokokchung, Mon, Tuensang, Pfutsero, etc ama nung tangar lima menepa modern city  kodanga meyanglutettsü aser rongsenren bushiba nung tangar kodanga memeneptsü. Reprangang, tanü Nagaland nung hill town nung tajemtsü tzüa sünga peria munguteter koda sür tangar menepa develop asütsü; nisung karbo ki tasen yangluli anentsü (landslide) agi bener oatokba otsü lir.  Lenmang yangluba nunga sen jenti intokogo, saka Naga lima lenmang onsarasa mejungra, lenmang maliba indang aiben jembir kechiaser tenem nung lenmang  junga ayutsü temela masü. Tia kaa lentenlen  Aor yimkong sadem sadema litettsü tenemtsünglen (foot hill) ali peria kar. Ayong tulu pungu tashi moaja lir aser item ayongküm nungji jangratema litet.  Ni Waromung aser Dibuia nunger lenir kar dangbo shiogo: Tang telidak yim nungibo museum asoshi ki ka dang süa oset-tsüset ajak bendena yutsür, süngdong dang tema yutsür, JCB pezü-pungu bener tzürang aser milak lenten li luatokang, yamaji süra Andhra nungi masü, Waromung o Dibuia nungi whole Nagaland atema ango, chiyungtsü supply sütettsü ta shir yutsü.  

Taiwan ya Nagaland dang nungi  tera agi dang tuluba aser nütsüngbo million 23 tema lir, saka Taiwan ya takar lima rongnung 20 buba nung züngoker. Nagaland dang nungi tenemtema talangba, typhoon mapang shia adoka alu raksatsür  aser lung onsaraba agi alu sadema ayimtsü kanga tasak. Alu ayimtsü aser development mapa balala inyaktsü asoshi Naga nunger lushi kanga agi tajungba. Saka koda sür Taiwan takar lima rongnung züngoktsüsa aküm? 1950 küm Taiwan nunger kodang tenem nung liasü idangji Gross Domestic Product (GDP) UD $ 1,400 million dang liasü, saka parnok tenemtsüngleni alua alu yima tenzükerbo noklang aika menden nung tali züsentet – 2016 nungbo US$ 42,300 million liasü. Taiwan nunger kodang  tenem nung liasü, iba mapang nüburtem kanga sensaka liasü ta ashir. Saka Government-i nisung ajak tenemtsünglen (foot hills) yim akümtsü ajungshi aser ozüng agütsü. Government-i tenem nung development asoshi sen meintok, saka tenemtsünglen lenmang, electricity, tzü, mozü ki, school lapokyonga ao, yongji tanem tanemi nüburtem lenteni alua yim aküm aser yangji alu ayim, süngjang-lijang lu, ango, shiruru metsüa tenzük. Tenem nung züsentetba dang nungi noklangben agi teimba züsentet, aser chiyungtsü tasen aika züsentet.  Akhidang yim küma aliba lushi ajak nung süngjang lu, süngdong-lidong balala adokdaktsü. Sadem sadema alu ayimtsü aser kara senzüsempongtsü asoshi motor cycle lenmang Government-i  yanglutsü. Tenem o tenem na tsüngda train aser gari lenmang asoshi tunnel yanglu. Ibai ajanga Taiwan rongsenren jenjang kanga renloka aküm ta ashir. Tanü reprangdangra, alima kongsa chiyungtsü peria adokteter iba lima ajakji lendenlen angutsü. Putu melenshiogo anungji  Naga nunger tenemtsüngleni alutsü nüngdak.  

     Taiwan nung kechisa inyaker ajakji tajung ta ashir masü saka yabo junger aser asen Naga nunger atema tapet asütsü ta reprangtetba ka lemsatepnür. Kü medemer ka Rev. Pai Kwang Sheng ta sür lir. Pa Bunun tribe nungi. Pa ya tsüngtsüker (wheel chair nung dang senzüba nisung ka). Theology azüng aser  pastor mapa inyaknü saka arogo aikati pastor mapa sadema meinyaktettsü ta bilema magi. Anungji, par yimdak Rev. Sheng-i “Bunun Cultural and Educational Foundation” tenzüka school ka lapoka yangji tesayur inyaktsü tenzük.

  Rev. Sheng-i tamasa school lapokdang student peria maru, anungji, kanga timtema school-ji anübalu. Yimdak nisung ishika dang, talisa tantsür-tambur dang aser school nung mezüngteter kar dak alaka teimba ka town aser city nung oa ali; yimji küm shia tilaba tilaba küma ao. Saka town aser city-tem nung par yimertemji para ki nung, mesüra ki tilala  nung kanga timtema liasü. Karbo yimdaki meyipa arunür saka yimdak mapa mali aser rongsen lenmang peria maliba ajanga arunüaka marutet. Yimdak ali, tzü aser mopung tajung, saka nüburtemi city nung timtema alitsü no? Mapa ka inyaktsü tim ta bushiteta Rev. Sheng-i yimtsüng nung rongsenren bushiba lenmang nung renloka ora, nüburtem city aser town nung toushia melii yimdaki arua linütsü ta ajitet. Iba nükla nung pai tenemtsüng nung aluyimba, süngjanglijang (Jiru, naring, etc) shiruru metsüba (an, ak, nashi) ango metsüba, ninang (bee) and konger (mushroom) farming tenzük. Iba mapang Taiwan Government-ia nüburtem early retirement agirtem nem benefit peria agütsü, anungji, agiang ta ajungshia liasü. Nisung kaji küm 60 nung retire süra, aika tashi (energy) ajema akümer aser mapa tasen tenzüka inyaktsü mejangrar, anungji item purji lokti asoshi khuret kaang kümdaktsür. (Asen lima nunga ibala mesükba nübur aika angutsü) Kodang nisung kaji küm 50 shi nung retire südir, tashikadang sodi agir asü nung second career tenzükteter aser anema alir asoshibo küm 70-75 tashi mapa inykatetter. Anungji, Rev. Sheng-i Bunun nunger shirnoksa mapa balala nung inyaka arur retire sür lir mesüra asütsü mapang atonger, parnokji arua yimdak aluyimba aser ola-angla mapa balala sayutsü ajungshi aser sayudaktsü. Ibai ajanga yimdak rongsenren kanga renloka aküm. Tanü iba yimtsüng kija nungjagi hopta shia alu nungi aser farm nung adokba truck load 6 tashi Taipei city-i supply asür ta ashi! Business manager, food control officer tashi appoint süa maparen inyaker. Aor shirnok agriculture, horticulture, animal husbandry, fishery, etc zünger Kohima, Mokokchung, Dimapur nung retire sür kechianga meinyaki kazüdaki parnoki  arua sayutettsü. Experience akar takutet nübu aika Naga nunger lir aser itemji koda lokti tajangzük asoshi amshitsü nükla asütsüla.

  Kuomintang (KMT party) yimsüsüba mapang Taiwan nung pei tetsü oshi mejembidaktsü, Chinese tenüng dak alaka pei indigenous tenünga amshitsü memela. Taiwanese indigenous culture yakta sama aotsü ta ajiteta Rev. Sheng-i Taiwanese indigenous art amshia ki, menden, table, etc indigenous style nung modernize süa süng, au (bamboo), lung – tulu, tila, temetong, tekirak – ajak amshia indigenous art inoka yim aser  agriculture farmland ajak yangluba ajanga yim temeket ajakji museum tulu ka amai kümdaktsü. Sobaliba wazüka ayuba dang masü, anogo shia tourist aika tereprangi arur aser sobaliba angazükdak yimti ka aküm. Mapang shia iba foundation nung kentener aser tsüngsangertem Government-i function balala nung hire asür aser alima tesem balalai anir aor. “One China” policy ajanga indigenous culture samadaktsütsü merangba melena Taiwan Government-ia meyiper kanga junger aser tanga kinia (parnok 17 tribes lir) yamaji inyaktsü ajungshi.  

Taiwan nunger dang masü, alima balala nungi tourist aika terepyangi arur asü nung, hotel, restaurant, coffee shop aika lapok, yimti meketa repranga senzütsü atema transportation service agütsü, 12:00-12:45 pm aser 2:30 to 3:15 pm  tashi cultural program anaben anogo shia sayur; alu aser farm koda ayimtsü temeket nung aluyimertem nem training mapang shia agütsür; alu aser farm nungi adokba ayoktsü dokan aika lapok, food preservation unit ka lapok, sapon, perfume balala yanglutsü unit ka lapok, dry food processing unit ka lapok, bamboo jarkol yanglutsü unit ka, indigenous art aser ola-angla unit den dokan aika lapok. School tanur 13 nungi dang tenzükba tanübo merijang tema lir. Farm nung dang parnok ishika 4:30 am nung sarasademer mapa tenzükba, tanübo tenlaki tuluka sür member merijang tema lir. Rev. Sheng aser tebutsü tena kisüng, teka nung sen kecha mali iba mapa tenzük. Saka tanü iba Bunun Cultural and Educational Foundation nung 199 full time employee aser 44 part time employee lir. Taruba küm tashi nungbo nisung 250 tashi nem employment agütsütsü nukjidong lir. Government nungi tanü tashi kecha teyari magir, saka ita shia 12 million shi angur ta ashi. Tangari inyakteter  Aori/Naga nungeri meinyaktettsü na? Inyaktettsü. Ashiko asenok dak tajungba inyaktettsü sempet aser tashi lir. Aser Tsüngremi ali-temo, tsüngküm, mopung tajung moaja lir. Rev. Sheng-i inyakba amaji inyaktet nungbo Nagaland nung unemployment problem malitsü. Nüburtemi Government dak metaloker malitsüla, sen taka nung ali nung dang ta bilemba alar mulungsentsü indoktsüla. Sen aliyonga temulungtetba, tejangraba melira tamakoktsü.

Iba yimtsüng nung nütsüng renloka aoba, rongsenren renloka aser tesemdanger Taiwan aser alima aika nungi aruba ajanga, temüket nunga terenlok bener arutsü. Bank service, train station, fast food/restaurant, hotel, transportation service, food catering service, police station, bazar, dokan, ku mejeba, etc aika lapoka ao. Iba yimtsüng sentakba nungi indirect job generate asübaji 1000-1500 shi asütsü ta ashi. Nükla tulu aser tajung yur Aori/Naga nunger tenemtsülen  alua prokshia lira aser pei akokba aluyimba mapa tasen inyaktetra, Naga nunger dang masü India aser asen meküta aliba countrytem  nübur ajunga jenjang tajungbai ajungkettsü. Tarutsü lanur asoshi mapa aika  generate sütettsü aser Kanan lima ama akümtsü. Pei sasa züsenteta achiba aser inyakba nung temulung agüja inyakra Naga lima ya takar akümtsü aser ajak mazüngi dang inyaka alitsü, tang amai zünger mapa mangu ta mejanga mekazütsü. Anungji apusodi arung.