By Lanu Atsongchanger

Asenoki kodang Azenket Putu ta südir, Information Technology World ta ashitsü akok aser iba ocet nung iba tangatetba nung asenoki azüngtsü merangdi. Tanü iba ama azenket-a ainba putu ka nung lishiba ya atangji Tsüngremer maongka ta asenoki metetdi. Asen tetsü-tebou mapang alima tazü den terenlokba kecha balaka alakteta maliasü saka tongmelang taküm lia aru. Tejen pututem nung talisa Western lima Industrial Revolution atoka alima kinük pezü sülen anokshiba mapang ka liasü, aser iba mopungsem jaki asen lima-a kopi melii onshi. Senzüsenpongba nung temelaba aküm, osangtsüsang agitepba nung mapang meindok, liba-liru nung temaba jenjangi ajungket. Ashiko, meimchir jaksü-bangsü aser tereprangtsü nunga melenshia aküm südi. Achi-ajemba nung mozü shiteter shisatsü agi. Sobusolemtsü nunga tepuratetba sayasüko (fashion) koba agir koba-ang magi aküm. Nisungtem jembishinü aser yimya awashi nung kadi ka den angazüktepa ao. Yamaji taküm rangben tanem tanemi melenshia aoba asenoki angur.

Kodang asenoki Information Technology ta asüba oyimji reprangdir, iba ya “kuli (data), ola (sound) aser noksa (video)” ta ashitsü akok aser item ajanga nisung ka taküm nung temelenshi jenti bener arutsür. Alima kara melenshia aoba yimyatem dangji, aji oda, nüngja balala: Dataway ta mesüra communication revolution/evolution ta ajatsü akok; saka anasaba agi “Cyberspace” ta ajar. Industrial Revolution mapang nungi alima ya tilaba-tilaba (shrinking) akümer ta jembia aruba tanü ibaji asenoki asangsang nung meteter, angur aser ajangshir. Anungji, asenok ya anogoshia melenshia aliba lima ka nung alir ta metetdi. Tanü company kadi oset ka yanglutetra asüngbo iba oset to jenzüka (condemn) yutsür company tanga kadi tajungba (upgrade) aser tuluba yanglushir atar. Shishilembartem atema iba nung kanga tetsükdaktsü alur, kechiba süra tanü jenjang kadi shishibato asüngbo ano tajemba mesüra teimba agi ang shishitsüsa akümer, yongji market price to anogoshi melenshitsüsa akümer. Technology tajungba aser tasenba yanglutetdang yamaji kasa tenüng nung ajizüka (duplicate) tamajungbaji mela-mela marketji asünger aser yamaji asenok aiben takoksa ajurur.

Küm ishika tejaklen Computer adoka liasü aser ibaji nübur asoshi tesüngmangtsü ulura ka liasü, saka tanü ibaji mezüngshir. Ano kodang Mobile Phone adok, alimaji balakati melenshiatok. Mopungsem balaka ona alimaji Global Village (alima ajungaji yimtsüng ka dang) ta jembia aru. Iba sülen internet aru-a amshitep aser iba ajanga alimaji tilaba kümshidaktsü. Iba Internet ya mezüngbo, nai computer koba taktang (room) nung inoka amshia liasü, iba taktang nungji dang alima ajungaji liasü saka kodang iba Internet ya mobile nunga amshi tenzük, joko alima ajungaji ne pocket nung bener senzür. Ya tesüngmangtsü masü na! Mashi mapang aser mashi tesem nungi nai alima talang nung aliba nisung ka den tejak-o-tejak na shiotepa/ngutepa (3G, Video caller) jembitet aser reprangtet. Nai memetetba nisung ka den-a nai medemer yimtet, ano iba ajanga ne tebilembatem alima ajunga dangi yoktet (Social net working). Anungji, asenok joko Global Village masü saka alima ajungaji yimtsüng ka nung Kiyong ka ama dang kumogo. Joko alimaji kangsa ila kumogo ta ni yangi shiner. Asenoki tanga lima talang nung oa kechi ataloker, iba jungdak tatalokba (live) ji asenoki mass media (TV) ajanga angur. Anungji, na/ni tonga moaka, asenok tonga ao ama reprangteter. Ano, senden (meeting) ka amentsü asü nung, asenokji kulemi sa round table nung mener mejembiaka, mobile aser TV ajanga danga jaka balala nungi kadi ka tejak reprangtepa iba sendenjia katet (Video conference). Ano asenoki kodang gari (Vehicle) yanglubaji reprangdir, computerized dang lir. Ano yamala mesükbaji shidi süra tanga aika dang lir saka asenoki teti meteta aliba ka ana lemsateper.

Asenok tanü manger mesangwa dang alima balakadi melenshir aliba putu ka nung asenok alir. Lanur ta asübaji takum nung ken dang alitsü. Taoba mapangtem nung Cl-X nung takok ngura nisung ka jenjang aji tekümtet ta liasü, iba sülen ano Cl-XII aser Graduate ta degree ngura aji teperi ta tangatetba liasü saka tanü iba tangatetbaji khenyongi balaladi melenshiatokogo. Joko Master Degree mengura ta, ano iba nungjia Merit list nung melira mesüra specialist magira shimzüka yutsür. Joko tajung rongnung tajung dang shimtetba tensa ka lir. Azüngtsü aser zülutsüji senso ajungai meteta alitsüla ta joko inyakyim melenshia odagi. Iba ama tetoktepba lima ka nung asenok alidang tangari kechi inyaka ali, iba sülenji dang anitakra nai/ni kodanga tangar memeneptsü. Nai anogo nung ghonda 8 School/College aser study nung indoka lira ghonda 12 – 14 bosa indok nungang nai tangar meneptsü ta metettsüla. Ashiko, yamaji sürasüng ano na mabensatsüa akok nung koda. Ajidang masü, TV news mapang ajak nung reprangtsüla, news paper teti azüngtsüla, kaket tasen koba nung alima terenlok indang shia lir, itemji bushia azüngtsüla aser tain den sensaksem teti akatsüla, süra na-a tanü putu nung nisung ka ta shitettsü. Tangar dang nungi naji azüngba, ashiba, metetba aser taküm liba-liru ajak nung balaka asütsü merangtsüla. Tanübo joko kaket reju nung dang masü saka kechisarena ajak nung külem medemer dang nungi na/niji alia (Super) akümtsüji kanga tongtipang kümogo.

Tsüraburtema tangatetba nung nenok putu mopungsem nungi temaba jenjang kati matutetra (nenok mindset-ji UPDATE mesüra) tanü lanu putui na magizüktsü, kechiba süra alimaji kanga balakati melenshiatokogo. Tatishitsü, Korea nunger libaliru (Korean Way of Life) asen kibong nung amshir talisa ku awaba, süoshi agiba aser ano kanga dang lanurtemi angazüka amshibakaji Korea nunger oshi (Korean Language) jembir aser yamala mesükba aika asenoki angur. Iba dak alaka ano anüdoklen aliba sobaliba (Western Culture) talisa Mass Media (TV) ajanga asen sobaliba melena aor. Iba tensa ka nung akhi tangatetba nungji dang lira nü mulungjangji anisüngzüka melitettsü südi ta bilemer. Anungji kechi tajung, iba telatet jenjang jagi atutsüla ta ka bilemer.     

Taoba putu nung loktii asen dak aliba sempet (talent) bushia liasü saka tanübo aseni asen sasa asen sempetji sayu nung dang asenokji tagidak alitsü ta asüba mopungsem ka nung asenok alir. Nü taküm-yimya aser ashi-metetji nüburtemi metetra, na-a tanü putu nung NISUNG ka ta nai metetang. Taoba mapang asenoki “mapang” ji ataa liasü kechiba süra teinyaktsü mapa aikabo maliasü mesüra alima ashi metet nung ano asen lima matong liasü saka tanübo asenoki mapangji arishitsüba tensa ka kümogo, kechiba süra, mapa koba inyaker koba-ang meinyak mesüra paper koba zünger kobaang mazüng. Iba ama tensa ka nung mapang tamshi meshira mapa aika nung tamakok alutsü. (tat: mobile pocket internet / mobile GPRS koba dang asenoki social networking ta ajatsü akok, iba amala amshidang mapang intokba, ano yamala aika). Asenok joko asen mulungka nung alitsübato masü saka mapang telatet nung aliba tensa ka nung alir (Today, we are living in a digital World and not in an analog World). Shiba mejanga alir, pa/labo alimai matai toktsür oatoktsü. Anungji aseni asen sasa taküm jenjangji yanglutsü nükjidong takang alitsüla.   

Külem lanurtem, tanü asenok joko Yabez (1 Puti. 4: 9 – 10) taküm ama alitsü kanga nüngdaka kümogo. Laishiba nungji par tetsü-tebou nungi tenzüka tenüngtem 600 shi amshia angutsü saka pa ya balaka alakteta amshia lir. Yabez-i ashi “Nai ni moajang aser kü litsü ulushidakjangma,….” Asenoki Tsüngrem dang asen tangatetba,  temetetba aser Pa tenzüktsü tanela litsüji ulushidakjang ta kangzüktsüla, aji mesüra na/niji normal human existence ka dang asütsü.  

Ni ka ashi dang lenmang tersü nungi angatetba putu ka nung asenok alidang Tsüngrem tiyongtsü südaktsür alitsü kanga tongtibang kümogo.  “Ne sasa kechisarena nung mapa tajung tatishitsü sayuang aser ne tesayuba nung nendakang” (Tita 2:7). Nai iba nungi tangazüktsü ka danga ngura, ibaji Tsüngremi agütsüba shisatsü ajanga alitsü.

Lano Atsongchanger ya Mokokchung yim nungi lir, pa ya Clark Theological College nung inyaker