By Wati Longchar, Serampore

Tanü meimchir ajak – tulur-tilar, takar-sensaker, lenir-tanitaker – dak Covid-19-i kongshiogo, talisa sensaker, hajirawala aser tantsür-tambur teimla makai alirtem kanga shisabuludaki.  Covid19 warai arogoia koteka taoba mapang aser tanü temang anema aliba maparen nung shilem koma agia arur meyipa reprangdangtsü mapang ka bener arutsür.  Mungdang aser arogotemi mission budget nung sen kwi health ministry atema intoker aser taküm küm kwi intoktsü renema lir ta asüngdanger. Khristan kulisüba (mission) mapa nung temang anema aliba maparen ya kanga tongtibang. Arogoi kotetka inyakteta lir, kechi nungsa teyanglushitsü nüngdaker, tarutsü nung kobala mapa tasen inyaktsü nüngdaker meyipa reprangshitsü senti mapang ka lir.

Yisui nütsüngtem dang ashi, “Shirangertem anebjang, tasürtem shia arudakjang, zütsüra aketertem meshitetjang, aser temenen tanelatem aritokang.” (Mt:10:8a; Mk 6:13; Lk 9:6) Yagi arogo tenyaba mapa nung temang anema aliba maparen yaa tongtibang ta sayur. English nung “cure” aser “healing” na ya tangatetba balala. “Cure” süra anebtsüba – mozü tapet chir mesüra operation agir shi temang nung tanebtsü anguba; aser “healing” ta süra taküm rangben anema kümdaktsüba. Meimchir shi temang shirangbaji ka, saka temang tanebtsü dang masü loktii jentokba, meso ajiba, temenen ta luja aser aija jembiba tashitak tuluba liasü. Yongji  temang tanebtsü dang masü, saka taküm ajunga anebtsütsü nüngdaker. Yisu mapang Sanhedrin-temi (Farisi, Sadduki aser Tezülur parnok 70) sensakertem temang anebtsüba mapa asoshibo kecha meinyak, saka Yisui anebtsüba ashishia meso aji; taküm kümzüktsü melena amungnü tongtibangba kümdaktsü aser kechiba amungnü anebtsür ta aitsü; tashitak ya temenen tanela ajanga aser Tsüngrem nungi temerenshi ta sayu aser lokti nungi jentok. Iba tangatetba anema Yisui tanebtsü mapa inyak. Lokti ka meyanglushi tashi temang kisüng nung tanebtsü angubaji teperi masü ta Yisui sayur. Sanhetrin pur amai Government aser lenirtemi shirangbaji pei khuret, Govt. mapa masü, temenen agi shiranger aser temulung meyipra anebatoktsü ta  angatetbaji tai. Government den sentaktepa aser arogotem lungjemer temang anema ayutsüba tenyaba mapa inyaktsüla. Tanü Nagaland nung Government aser arogo anapronglai tanebtsü mapa nungi temulung magütsüba ajiteter.

Küm aika tejaklen nungi Nagaland Government-i temang anema aliba maparen nung tim sen meintokba aser temulung magütsüba Covid-19-i jangjatsür. Nagaland State ngur küm 59 tashi nung medical college kata mali. Govt. hospital kar aliba nungjia reprangdangra taktang kar nung window junga mali, kar nungbo kishi mali, toilet memerük, equipment mali, mozü mali aser Doctor aser nurse station nung malir aser aliyonga mapang shitak nung marur ta asüba jenjang nung lir.  Covid-19 adoker joko ita trokbuba saka tanü tashi testing laboratory merenemteter, PPE mangrang tur bener aru, shiranger 200 shi ayutsü yipten renema mali ta asateper,  Ambulance-a second hand dang ali, angashiba agi tasen ambulance gari ka nung lakh 15 dang ta ashir, saka Naga nungerbo second hand lakh 18 agi aliba indang jembia arudaki. bangdak yimsüsür atema temang anema aliba maparen ya tongtibang masü, saka sen tongtibangba. Ya public-i election mapang sen tali meshia agiatokba agi asütsü akok, saka bangdak yimsüsür, koba party südir süang, aikati lokti ajungtsü masü, saka pei pei ajungtsü atema dang bilema inyaker. Nübur ajak asoshi health system ya kanga tongtibang aser aroki inyaktsüba tongtibang mapa ka lir.

Tanü Naga nunger tangatetba kaji, temang anema aliba maparen ya Govt. kisüng mapa amai  bilemer aser govt. nem dang inyakdaktsütsü atar aser imlar. Iba tangatetba ya khenyongi tai lir. State govt-i dang masü, arogoia temang anema aliba maparen nung temulung agütsütsüla aser  ibai arogo tenyaba mapa nung tongtibang mapa ka südaktsütsüla. Government majungba indang jembir, saka tanü NBCC aser ABAM-i anir medical college kwi lapoka lir? Arogo tulutem shirnoki crore-sa crore intoka  tenlaki süteter lir, item arogotemi nüburtem temang anema alitsü asoshi sen kwi intoka ali? Temang anema alitsü asoshi mission/arogo budget lir mali? Hospital nung equipment kwi arogoi tenlaa lir?  Hospital aser primary health centre, medical research nung sen kwi intoka ali? Missionary yoktsübo kanga jangrar – süra medical doctor, nurse kwika missionary yoka ali? Hospital nung counselor/chaplain kwi missionary amai yoka lir? Shisadangtsü mapang tajung ka Covid-19-i bener arutsür!

Alima ajak nung, temesüng nunger missionary putu nungi, arogoi temang  anema aliba maparen nung mapa tajung jenti inyakteta yutsüba aser  tenzükertemi bendanga agüja inyakba kuli aika lir. Item mapa tajung Khristantemi  inyakba, talisa sensaker asoshi,  item mapa tajung ngua alimai  tanü tashi akhümtsüba züngshir aser agizüker. Missionary putu mapang meimchirtem tashitak tamajung aikati sür alitsüba mapang, medical missionary-temi bendanga tenzükba agi taküm kümzükba otsü aika azünger. Arogo otsü nung medical mission, education aser tanela anir aruba mapatem kasa ta angatet aser yamaji inyakba angur. Temang rangpen (body, soul) tekümzük asoshi inyakba dangji wholistic mission ta ajar.

American Baptist Missionary kodang asen limai aru, parnoki tanela anir aruba mapa dang masü, saka hospital aika lapok – Impur hospital, Jorhat Mission hospital ama –  kechiaser tenyaba mapa nung tanebtsüba mapa ya tongtibang ta angatet.  American Baptist missionary-temi CBCNEI telunget kisüng nunga sünga mozüki tenet yanglua yutsü. British yimsüsüba mapang Assam nung süngo lu (tea company) lapokdang süngo pakan shia nung dispensary/hospital lapoka yutsü, aji asenok aikati ngua lir. Missionary-tem or külen arogoi hospital tasen kwi lapoka lir? Taktsüka Naga nunger arogotemi hospital kata tanü tashi nung lapoka mali, Lotha Mungdangi lapoktsü merangba dak alaka. Tasen lapokyonga aotsü melena missionary-temi lapoka yutsüba karbo shibangogo, tat. agi., Azhuto Christian Hospital ama. Tajungba küma yanglushia odaktsütsü melena, America nungeri lapoka yutsüba hospitaltem maintain mesüteti tasür lir. Ya  alima dang maksü tulu masü no? NBCC mesüra ABAM-i anir arogotemi Medical College kabosa Nagaland nung lapoktsü nüngdak, kokra district shia nung hospital kakabosa lapoktsüla. Lungjemer inyak nungbo ya kanga takoktsü lir!

Taiwan, Hong Kong, Philippines, Indonesia, Thailand, Myanmar ajak nung medical college aika arogoi lapokba aika lir. Philippine nung Silliman university, arogoi lapokba, faculty of Nursing school nung student 3000 tema enroll süa lir.  India lima nung danga sünga medical college (e.g. CMC Vellore, CMC, Ludhiana) arogoi lapokba medical collegetem aser itemji India nung tajungtem ta züngshir. Tanü India nung arogotemi (Protestant, Catholic, etc) lapokba hospital ajak meyokteper 1000 ka shi lir (Impur hospital-a dena) aser primary health centre 3000 tema lir kong sensaker aika nem angati treatment agütsür. Arogoi tajangzük mebushii tanebtsüba mapa inyakba mapa ya metenzük nungbo health sector ya “most corrupted” sür lila ta bushiteter. Alima ajunga nung arogoi lapokba college-tem aser mozükitem nung arogo nung toklang tenzüker ajak angati treatment agütsür. Nagaland nung mozüki tajung kata maliba agi India tesem ajakleni sen aputepa bener oa treatment agiteper. Hau, tulur, takartem asoshi shisabulutsü mali airplane mesüra chopper-i bener oa India/foreign lima hospital tajungtiba nung treatment agir arutsü, aser parnok atema insurance aser Govt-i sen agütsütsü, saka sensakerbo repranga dang südaktsütsü jenjang ka nung lir! Arogo tenzükertema koda? Tenzüker kata health security mali. Covid-19 mapang arogoi mask alemba, common kitchen lapokba, chiyungtsü alemba, mike nung sayutsüngiba, video ajanga sayutsüngiba amala mapa tajung aika inyakba lir, saka iba jagi teperi masü. We need long term health ministry in the churches. Medical  sector-i sen tajangzük atema dang bilemer inyakba ajanga sensaker aika, kinungertema dena, sensak tiai yokba angashir. Arogoi healing ministry ajanga Yisu kuli sütet. Arogoi tongtibangtiba tenyaba mapa ka nung shilem junga magi-i lir ta Covid-19-i jangjatsür.  Aizawl nung Mizo Presbyterian arogoi lapokba Synod hospital ya govt. hospital dang nungi tajungtiba hospital lir. Yamaji asenokia inyaktsü kokteta lir.

Tanü arogotem benjongpentsü tali meraba ajanga rongsen aser mapang ajak yangji endoker. Jubilee onsara, telok-tentet balala saru-saji onsara. “Land of Festival” ta ashiba ya shitak lir. Ano külen tanela nung tekümtet asoshi dang jembiba aser bilemba onsara.  Itemji tongtibang, saka rangpen tekümtet nung ibaji shilem ka dang lir. Tanü nüburtem kechi timtem nung lir, kechi agi timatemer, aser kechi nüngdaker item ajiteta yariteptsü kanga nüngdaka lir. Itemji meinyaker ta masü saka long term koba mapai lokti asoshi tajangzük bener arutsür aser nüngdaker iba nungji sen intoktsüla aser teka amteper inyaktsü nüngdaker. Iba den ochi mashi mapatem kobai nübur temang anema melitettsüsa inyaker iba amala nungji lungjemer Govt. aser tanga telok tentet anema ola adoktsüla. “Protest against unjust system and corrupt political system is integral part of healing ministry”. Arogoi ochi ola madoktetba ajanga alima rajang akümer aser yimsüsüri kecha marendaki temulung ulu ulua aoyateper. Ochi ola madoktetba arogo dangji  “arogo tasü” (death church) ta ajar ta metetdi. Ano arogoi mashi angateta aliba kaji tenyaba mapa ta asüba ya sen sarudener sensaker mesüra mamanger telok dangi oa sen-o-tsü agüja sayutsüngiba,  arogo tenzüka mapa tajung inyakba jagi teperi aser Khristan kulisübaji aji ta bilemer. Naga nunger arogotemi sen jenti ibala mesükba mapa nung toktepa, kangshia sarutepa inyaka arudaki. Iba dang charity-oriented mission ta ajar.  Hau, nüngdaka alirtem yaritsübaji kanga nüngdak aser yariteptsüla, saka alima nung kechiba meshimetsür, sensaker aika adoker iba tera anema ola adoktsüla aser yanglushitsüla. Naga nungeri charity-oriented mission dang metetba ajanga asen lima nungbo mission mapa mali amai bilemer. Tanü charity masü transformative (lokti taküm nung temelenshi aser terenlok adokdaktsüba) tenyaba mission nüngdak. Alima ajungai Covid-19 tsübuba amai, arogoji  ochimashi inyakeri tsübutsüsa alitsüla kechiaser arogoji Yisu Khrista melena noktaker. Tanü ochi mashi inyakertemi arogo metsübur kechiaser arogoi ochi nung menoktakteter aser ola madoker.  Ochi mashi teraji intoktsüba arogoi ashitsüla aser inyaktsüla. Sensaker aika temang anema melitettsüsa akümbaji chiyungtsü peria machiba ajanga lir aser iba temenen tera anema arogoi ola adoktsüla

Ya metetdi: Yisu Khrista shiba dak aseni amanger, pai alima nung tenzükba mapang tongtibangtiba mapa kaji temang anema yutsüba tenyaba mapa ya liasü. Yisui temang tashitak anebtsüba mapa nungji tashitak anebtsüba, temenen talenba nungi salatsüba, tetezü mental healing, psychological healing, ajak anebtsüba indang ashir. Tashitak ajanga shirnok lokti nungi jentoka (social exclusion) liasü, parnok nem nüchiba agütsü. Tanüa arogoi wholistic healing tenyaba mapa nung shilem agitsü kanga nüngdaka kümogo ta ayongzüker.