By Wati Longchar, Serampore

Naga nunger shisaluyim nung kanga renloka kümogo aser tazünger onsaraba agi mapa mali shisabulu tulu agi tonga lir. December 31, 2019 küm tashi nung mapa bushir tenüng agüja alirtemji 90,584; aser tenüng magütsüra aika lir ta ashir.  Degree tajung ngua zünger mapa malitsüsa koda sür iba jenjangi bener arutsü? Tanga lima nungbo noklang nung noklang tazünger dang liakasa unemployment problem onsarabo mali, tat. agi,  UK 4.8%, Germany 3.9%. Korea 3.6%, Japan 2.8%, Taiwan 3.7% ta ashir. Saka Nagaland nung nisung 25,000 graduate asü nung, parnok 10 dang mapa nguteter ta ashir aser tanungba mapa mali kazür.  Minister/MLA aser tulur chir, party worker mesüra “nation worker” chir mesüra adianu dang  Govt. mapa ngutetter. Merit list nung kar shimba dak alaka back door appointment teimba lir. Tanga lima nungbo tezüngdak nunga weekend nung part time mapa  inyaktsü peria dang angur aser student aika part time mapa inyaka azünger. Kechiba asen lima nungbo mapa peria malir?

Naga nunger sen ajak tanga lima nung shisaluyim bushiba nung indoker. Nagaland nungi India lima yimti balala nung prokshia azüngertem, tat. agi  Shillong nung 5000 shi, Bangalore nung 5000 shi, Delhi nung 2000 shi, Chennai nung 1700 shi, Kolkata, Pune, Guwahati, nung 1000 shi ta yimti ajak nung prokshia azünger. Takar chirbo Rs. 30,000-40,000 tashi ita shia indoker, kari 20,000-25,000, aser sensakertemi 10,000-15,000 indoker ta ashir. Iba dakji alia taru-tao para, college fee nung sen aika indoker. Ano Delhi nung UPSC exam atema coaching nung Rs. 1,60,000 tema agir ta ashir, aji ki para, monthly pocket money maten. Nisung shiai küm nung lakh 3-5, mesüra tema indoker. Tulur aser takar chirtembo Nagaland nung mezüngdaktsür kechiba süra Nagaland nung shisashiba (education) rüju (institution) tajung mali. Kechiba tangar lima ama Nagaland nung schools aser collegetem standard junga matur? Nagaland schooltem ya sensaker aser yimtsüng nung alirtem atema dang asünungji yimsüsürtemi temulung magütsür asȕ? Yimsüsür double standard aliba ajanga Nagaland nung shisashiba nung temulung magütsür aser mainer ta asenoki shitettsü akok.   Asen lima nungi kwika tanga lima nung oa azünger, paikaji tanga lima nungi asen limai arua züngettsüsa shisashiba yanglushitsüla.

India shisaluyim yayim nung bachelor degree angutsü atema küm 15 tashi agir, tetsüngda nung part time mapa kecha meinyaki. Tsürabur sen aika indoka zünger graduate süli tanurtem aika “depressed club” nung join asütsüsa akümer.  Lanur ka asoshi zünger tejashi aser tezüdang tulutibaji mapa mali alitsübaji lir. Karbo mapai aitsüba küm agi süir, aser lokti, adianui aser tsüraburi khuret ka amai bilemtsür. Aikati iba lima masoang tajungba ta temulung zürepa kazür. Yongji karbo lenmang kecha mali Nation worker ta tenüng jaloker telok balala nung jenshia senzütsüsa akümer, kar razükraktema senzür aser lokti nung timtem aika bener arutsür.  Kar depression agi mozü chia aser yi jema senzür.  Lanurtem aika computer game addicted küma aji dang aonung sangwa saitsü aser anüngdang tepiyong mejangli ta kazüteper. Ya koda tebilemtsü tulu.

College aser University nung zünger kechiba mapa mangur? Shiba tai? Kechiba tazünger ajaki town aser city nung dang mapa inyakner? Theology azünger aikati yimtsüng nungbo Pastor aser tesayula meinyakner! Ya kechiba? Nisung ka town aser city nung mapa mongura, pa/laji pur medemer tekolok madoksa aser teyakyak mali  amai ajir aser jembitsür? Kechiba college and university nung degree tajung ngua zünger pei sasa mapa create mesüteter? Shibai mapa agütsütsü atar? Hau, university-i mapa create asütsü makok, saka züngzüker government mapa mebushii pei sasa mapa tasen inyaktettsü lenmang mesayur. Unemployment problem adoktsütsü kechiba college aser university lapoktsü nüngdak? Shisashiba yayim ya yanglushitsüla. General education for white collar job yagi unemployment problem dang tali adoktaktsür. Nagaland govt-i tazünger lanur ajak nembo mapa magütsütettsü. General education den skill oriented education agütsü nungbo university aser college-temi unemployment madokdaktsütsü.

British yimsüsüba mapang nung kodang parnoki kaket rüjo lapoka ao, parnok nükjidongji British govt. officetem nung clerk mapa aser oshi meyiptsür (interpreters) atema liasü, English education jagi India nunger mindset melendaktsütsü aser British yimsüsüba sapua akümtsü atema bilemer education system yanglu (Indians in blood and colour but English in taste). Ibayongji parnoki India nunger tangar ama specialized süa zünga odaktsütsü nükjidong maliasü saka “white collar job” office nung pen ammer zülua amentsü dang sayu. Ano British nungeri “downward filtration” model amshi koba nung high caste aser takartem tama shia meteta kümdaktsütsü aser parnoki low caste aser sensakertem dang sayutsü ta bilem. Saka ibaji caste loktiliba nung kecha mapa küma mao, meyiper iba jagi education ajanga educated and uneducated telemsa India nung adokdaktsü; backward and forward telok ta adokdaktsü. Educatedtemji city nung alirtem aser uneducatedtemji yimtsüng nung alu yima alirtem mesüra sensakertem ta telemsa adokdaktsü aser yimtsüngtem senzüka yutsü. Tanüa iba telemsa yagi education nung rural and urban division tulu adoktsüogo. Schools aser Colleges ajak city/town nung dang lir, yimtaklirtem asoshi shisashiba bushinera Town nung oa azüngtsüba aser aji sensaker kibongtem asoshi khuret ulura. Tanur education asoshi kibong lanu aika pilar alitsüsa akümer. Yimtsüng nung azüngertemi competitive exam kecha nunga takok mangutsü kechiaser yimtsüngtem nung education junga mali, tesayuria yimtaki transfer moner aser proxy teacher yur ita sen dang chia liteper.

Tanü kaket rüju reprangdangra “general degree oriented” dang lir, degree dang ngurbo kecha mali ibayongji lesson mangateti mokosto (memorize) sür exam nung züluba (reproduce) asütsü aser ibaji tesayuri asadanger (evaluate) sür result agütsütsü. Tesayur aikati kuli küpdok lesson tempanga sayurbo ojang ta bilemer, student-i angazük mangazük ta masü, koba dang teacher-centred ta ajar. Tanü COVID-19 nung online class agiteper, DoSE Nagaland ajanga prokshiba ishika angadangogo. Tanü asen lima education system nung student tekolok nung critical thinking asütsü mesayur. We teach on “what” (content) but not on “why” and “how” questions. Anungji student-i shisashiba nung “knowledge of critical knowing” mali, pass sürbo ojang ta azünger. Ibayongji exam nung aoyatsü meranger (unfair means). Degree tulu ngua azünger aika saka knowledgeable nisungbo aika mali. Graduate/postgraduate aikati shiti tilateria draft mesüteter. Iba denji skill oriented education mali, tat. agi, tanur kar sports balala nung jangrar süra pa/la sports school nung zünga iba nungji indaktsütsüla. Kari agriculture nung jangrara ibala specialize nungji tila asüdang agricultural school nung züngdaktsütsüla, kar food processing, etc. General education dang alinungji shirnoki iba nungji takok mangur parnok dang drops out ta ajar, kecha nunga tagidak makaba oset ama bilemer. Unemployment problem solve asütsü asoshi skill oriented education curriculum system melenshitsüla.

General degree zünger Nagaland govt. mapa dang rakteper, self employment, skill oriented mapa kecha mali. Engineering, Electronics, Agriculture, Horticulture, Animal Husbandry amala zünger office nung dang mener. Item degree oriented yabo field nung mazüngi ayazüa nübur dang inyaka sayua senzütsüba mapa sürnung. Nagaland nung industries aser entrepreneurship kecha mali nungji tang aliba system nungbo küm shia unemploymentji teimba teimba akümtsü. Tazünger aika depression agi atongtsü aser lokti tebilemtsü aika bener arutsütsü.

China nunger economist kati parnok küm 30 rongsenren bushiba nükjidong yamai ashiba bilemteter: 2000 küm China nunger nükjidongji “there should be something `Made in China’ in every home in this world” aser aji shitak ataloka inyaktet ta ashi. 2010 küm parnok nükjidongji “there should be something `Made in China’ in every person’s hand” aser aji shitak ataloka inyaktet. Taküm küm 2020 nung parnok nükjidongji “We want to see that no human beings can survive without depending on `Made in China’” aser iba nükjidongji ataloka arudagi. Tatem nung pai ashi, “But I feel very sad. We are developing without God. We do not see human beings and natural resources, but see only money.” Tanü alima aika nung China nunger dak memetaloki melitettsüsa kümogo. 2006 küm Pacific nung asetkong tila ka, Tonga-i ao (nisunga lakh ana shi dang), saka idakji China nunger dokan aika liasü. Yamaji “Made in China” alima ajunga nung yoktettsü Govt.i tesendaktep yanglutsür. Chinese shisashibaji “production oriented” agütsür, saka asen lima aji junga mesayur. 

Ni China, Korea aser Japan nunger lanur dak tasü tait mulungsentsü jangratemtsüka anguba kaji America, Germany nungeri yamai yangluteter ta süra, onokibo iba dang nungi tajungba yanglutettsü aser merangtsü ta mulungtetba aser tetoktepba tasü tait tanela ka ajitet.  Tangari inyakteter aser yanglutetter asenoki kechiba meyanglutettsü! Asenokia akoktsü, ni inyaktettsü ta tasü tait tanela ka lir aser ozü lima tajungba ta sayunüba tejangraba (optimism) ka angu. Saka Naga nunger dak aketba jakla kaji kodasȕr tangar tezü tangdaktsütsü – junga inyakya ali nung tzü shiloktsütsü tanela ka lir – hai repranga lidija kobika odir, kecha mesütettsü, sen melira kecha meinyaktettsü, nungja makoktsüar ta asüba tasü mait tanela ka lir.  Yanglutettsü, akoktsü ta masü, pai/lai sen Rs, 10,000 jenjang phone alia amshira ni sen apur külen mesüra auyar külen Rs. 20,000 agi alia amshitsü ta asüba mulungsentsü ka lir. Yongji tanü tashi `Made in Nagaland’ kecha mali. Tazüngla. Tangari inyakba ajakji tajunga ta ashir masü, saka tanü India/Naga nunger shisaluyim nung  “how to produce” aser meranga inyaktsü temulungtetba ya mesayur, saka  “how to consume” aser office nung pen ammer inyaknüba pur dang züngtetdaktsür.

Ano tebilemtsü kaji ya: tanü koba competitive exam ajanga mapai air, ya yimtsüng nung alir ajemoka yutsütsü aser alar kangla nung yutsütsü asoshi British nunger mapang nungi yimsüsuri asaa yangluba yayim ka lir.  Bilemdangang! Taoba küm 20 tsüngda yimtsüng nungi NPSC aser UPSC exam nung Civil and Allied services kwikati pass süteta ali? Aikabo mali. Tulur aser takar chirtem town/city nung school/college tajungtiba nung zünger, küm piyong coaching class Delhi, Bangalore, Hyderabad nung agir pass mesütetba lir. Sensaker aser aluyimer chirtemi yimtsüng nung azünger; yimtsüngtem nung tesayur peria mali, aliyonga junga mesayur, election aliba mapang shia tesayurtem temerenshi agȕja transfer tangaleni yoker. Party o party na menentepdang students dang akoksar. Anungji shirnok yimtsüng nung zünga atu, parnoki kodanga competitive exam pass mesütettsü. Tang koba competitive exam benshir ya yimtsüng nung alir ashioktsüba maparen ka lir ta metettsüla. Lia liabo backward quota masü, yimtsüng nungi adoker quota akangtsüsa mapang kati arutsü.

Yimtsüng nung alir asoshi lenmang ka lir. UPSC, NPSC atema sen onsarabo telalu. Tazünger aser tsüraburi competitive exam nung dang tenük meyoki akok tashi skill oriented vocational training agitsü apusotsüla, süra mapa angutsü. Ni Kerala nung  private school nung Maths tesayur M. Sc zünger ita sen Rs. 16,000/- bushiba, aser Five Star hotel ka nung carpenter-cum-plumber (degree kecha mali) mapa asoshi ita sen Rs. 35,000/- bushiba advertisement angu. Alima nung degree kisüngi pei taküm peri sen-o-tsü bener marutettsü, saka mapa balala aser oset-tsüset, tachi-tajemtsü  junga yanglutetba, meranga inyakba agi taküm alir.

Jorhat nung ETC opposite nung Bharat Engineering Ltd lir. Kibursang ya Punjabi nunger, kecha degree mali,  pa mezüngbo yimdong nung bicycle yanglur ka dang  liasü, saka tanübo pai company nung nisung 200 tema mapa agüja inyaker. Bangalore nung Nilgris Bakery ya company tuluka aser nisung merijang aika nem mapa agüja lir; tangbo tanga town aika nung dokan lapokyonga ogo. Pa amtsük asangba training ita asem dang agiba nisung ka.  Ano küm ishika tejaklen, Shrachi Centre, Kolkata nung (Aor aikati, talisa arogo nung tenzükertemi ngur alitsü), tebuba sür joko tanga mapa kecha mali, kibong mesütsü asoshi lenmang nung chana yoka liasü. Training ita asem agir, food catering mapa inyaktsü ajungshi aser lai yamaji inyak. Yamaji inyaka, küm 7 tsüngda nung lai gari alitet, lar chir US nung oa züngteta aküm aser lai nisüng trok nem mapa agütsütet. La degree kecha mali, saka ita asem dang training (Rs. 1000 dang fee agütsü ta ashi) agi aser yamaji lar kibong jenjang junga aküm. Ano kasa Shrachi Centre nung driver ka, aonung, ayatrem aser anepdang züngia mapang mashi ka nung ainer anir senzütsü tenangzüktepba yanglur ayu. Tetenzüklenbo pa second hand yellow taxi dang ka liasü, saka paa küm tenet tsüngda nung gari tasen ana alitet, aser driver ana nem mapa agütsütet aser par jala chartered accountant züngdaktsü. Ni Taiwan nung nisung ka graduate sür konger (mushroom)  yangluba training anogo asem dang agir pai  konger lu ayimer organize süa Taiwan ajonga nung konger ayoker. Nisung aika nem mapa agütsütet. Yamaji zünger mezüngma mapa jendi inyaktet. Aseni aben-süoshi, oset-tsüset, achi-ajemba ajonga ya tangari ama yanglutet saka training nüngdak. Anungji asen nüburi skill-oriented training agira mapa tasen aika tenzüktet aser iba jagi  unemployment problem ya nokdangtsȕ akok. Tanü Covid-19 wara ajanga Naga students, mapa inyaker aika meyipa arudagi. Kolkata nung Manipur nungi nurse 200 tema mapa nung sodi agir pei limai meyipa ogo. Asen lima nung shisashiba riju aser mapa peria aka nungbo iba timtem majurula. Tenük saktsü mapang tongogo.