“Tanur shisatsü angazükba nung tetsü ka shilem; Part-I”

By Tiala Imchen|

Kodangsa tebu aser tanurtemi takok ngudir, takok shiaji Tetsür dena lir. Tetsür ta asüba ya alphabet letter trok dang saka iba letter troki yangluba ojang (word) koba dang “Tetsür” (woman) ta ajar ya atemmata  ojang masü . kechiaser alima nung tashi aser khuret (power/ authority/ responsibility) tulutiba amlaji tetsür lir. Kibong aser alima raksatsüjia tetsür ket nung lir, aser tarutsü asen lokti jenjang yanglutsüjia tetsür ket nung lir. Anungji, tetsür shiai naji khenyongi balaka (special) lipok nungi Tsüngremi yangluba ta angatetsüla.

Mrs. Belly Graham-i  alima dang yamai ashir, Seminary nung tesayur tulutibaji ni aser kü student-temji ozü tanurtem ya lir. Tanü lar chirnur ka danga tamajung mali aser ano la tebuba ama nüngtugu sayutsüngir alima nung kangabo mangur. Society mezüngbubaji kibong (family) ya lir. Anungji, kibong nung tetsür ka jagi tanüla aser shi nung lar chirtem kibok sayu o nung anitetra asen lima tarutsü (generation) putu atema shisabulutsü mali. Alima nung tetsübu makai yimjung nung linüra tetsür shiai pei tenyaktsü angatettsüla. Tetsür ta kodang shidir ya tanur tetsü (mother) dang, ta mangatettsüla yangi tetsür ajak (single woman) densema lir. Mother teimba kati lar kibong dang yanglur aser aji kanga junger. Saka single woman jagibo linük ka khen nung yangluteter. Single woman-i mother danga tuluba inyaktetba aika rongnungi tatishitsü ana:

1)Mother Teresa ama shibai akümli tepiyong timtemer lajar jenti yaria kin ka (India) nüchi tiai ajungkettsü. La alimai aruba langa alima nem tajangzük tulu agutsüba angur.

2)Florence Nightingale, School aser college nung asenok ajaki la otsü kaket nung züngogo. La England tsür. Khen mapang ka nung nurse mapa ya nisungtemi kanga dang nemja liasü. Saka lai alima nung timtemer jenti ammang nung ang süngla milen tsükloker yariba talisa war nung yirur bener aruba sepai jenti yariba. Alimai la nem title “lady with the lamp” ta agütsüba angur. Ano takok ngutetba tetsü aika rongnungi ana ajidi: –

1)Queen Victoria- Alima nung talangtila yimsü asüla (longest reign) lai küm 63 yimsü asü 1837-1901. La ya England tsür, otsüi ashiba agi, from her childhood, she was a simplicity loving and disciplined lady. Kenü anogo Africa lima nungi chuba ka la semdangi aru aser pai la dang chubatsür ner yimli merenba miim (secret) tashi ya kechi ta asüngdang? Lai langzü “Laishiba ya lir”. Asenoki metet alima nung kaket tajung aika dang lir saka item kaketji ajung yongya “is one of the best” ta comparative degree nung dang amshiba angur, saka Holy Bible yabo “is the greatest book in the world” ta superlative degree nung amshiba angur. Nisung shiai temeshi o ya pei mulungjang nung rongsen ama rizunga ayutsübaji kanga dang nungdak aser temoatsü lir.    

2)Tanü asen India yimsüsüba menden nunga tekolakji tetsür lir. Laji Mrs. Pratiba Patil. She is a mother, home maker and President of India. Tanü asen lima ya tetsür ket nung lir. Anungji, tetsür shiai kidang aser asen inyakba institution/office ajak nung ochiji tzü ama nunga aludaktsütsüla aser temeshibaji asen taküm nung ayong ama moshia yimdaktsütsüla (Amos 5:24).

Tanü 21st putu nung tetsü (mother) noksa khen (evaluate) asadangdi: –   

1. Budget- Kinungpui bener aruba senotsü nungi tetsür kwikati tershilem shitak agütsür? Aser tanüngba sen jagi ita piyong atema budget shitak yanglur? Ano tetsü kwikati basic needs, wants ta ana ya bendangteter? Aser tetsü kwikati chirnur aser kinungpu nem chiyungtsü balance süa agütsüteter? Market nung shishidanga tapu ka dang oda ner-i teti sapuba chiyungtsü aser aonsotsü to dang alir asü? mesüra Vitamin A,B,C,D,E etc., item aliba chiyungtsü aser aonsotsü esap süa alia chidaktsür? Aser ano tetsü kwikati tanuri chiner ta sür unlimit over eating südaktsür? Outside of Nagaland nung dang asenoki tanur abnormal yira agi yirar anguba to tanübo asen Naga nunger tanurtema aika kümogo. Beauty aser figure maintain asüba putu ka nung tanü asen alir asü nung, tali yiraba ajanga ner tanur school/college etc., nung inferiority complex adoker. Koma adoker? Pa/la asemtsü size-a dokan nung peria mangur aser pa peculiar looks asüba agi lokti nung medemer den külemi shilem agitsü nema metangteter ano aika lir. Ta item ajak jagi tanur ka ainba mapang nung shisatsü-ang ila-a kümdaktsür. Ano tetsü kari lokti senden balalai aodang labo model-ia madoksatsüsa renemer aser la kinungpu longpen nungbo wrinkle line, line dang adoka semdaktsür tena külemi aodang kanga müjungi angur. Tetsü kaji ajak nung kanga kümdanga shilem agitsüla.    

• Süpokrem- Tanü tetsütem rongnung teimba kati pei kinungpuri office nungi süpokrem sen bener arua agütsüdang iba sen tali ya kong nungi ta asüngdangtsü melena side income ya dang na? ta ashiba lir. Lai kinungpu dang ochi shia alitsü kodanga majungshir. Süpokremji Tsüngrem tsüngdang tesempatsü aser atakatem lir (Tazüngkunem 27:25, A.shin 17:23; 15:27). Süpokrem agi chirnur mesüba agi tanurji tulur akümyonga mozü achir, yi ajemer, aser lokti nung timtem bener arur dang akümer. Küm aika süiogo, America lima nung tetsü kati yamai inyaka liasü. Kodangsa la kinungpui office nungi sen bener arua agütsüdir lai senji zünger talila lira, iba sen talila ya shiba indang pa nem bener oa agüjang ta kinungpu nem meyipdaktsüba otsü nung jembir. Ochishir tetsü kati sayutetba tanurji alima nung nüngtugu linük lenir ka aküm aser ibaji tangar masü U.S. Former President, Abraham Lincoln tetsü liasü.

3)Tetsü kati asoba jala jabaso  yimya- Shishilembaba tsütsülenji kodang reprangdir Nagatsür/Naga nunger indang dokanjisa tasakba. Customer jagi yimlibilema tera ajemang koto? ta kodang shidir telangzübaji malinüra talima ta langzüba angur. Aser ano auto rickshaw nunga Naga nungba to agibo para-a tangar dang nungi tali meshir. Passenger-i  driver-ba! Yabo kanga tali meshir masü na? ta ashidang mit adoker. Nightbus nung senzü majung auer ajurur, ano pei kidang aser market balala nunga techinoktak mali tashiyim mapa (rape) inyaker agi süngogo. Tanü lenmang nunga süngla yimjung mali kümogo. Item auer aser teyaksanga, asüküma jembir nisung tamajungtem ya anüng ali ka nungi poktetba masü tetsü (mother) ka ajanga dang kibong nung intetdaktsübako. Tanü ne süngjang agi asen lima tepo mejemba aroka shisadangtsüla.

Asenok  jembishinü nung ajemalu mali ngasangatem asüküm yimya, memelenshira asen Naga nunger rongsenren nunga tekübokbai dang alutsü. Kechiba süra osettsüset talangba bushia alitsüji bendanger dokan nungang alitsü, aser auto/taxi nungjia tzümar indang nungjiang amentsüsa kümdaki. Anungji, Naga nunger senji within Nagaland nung (rotate) mamshii bendangleni dang aotsüsa tia kati aruogo. Tanü asen nübur pei lima nung peria chia jema aser sadoka linüra tetsütemi pei kidang chirnur kibok sayu o shitak den Laishiba nung tera yangdaktsütsüla (Tazüngkunem 6: 5, 7, 8).

1. Koba mapang nungi tenzüka sayutsüla – Tanur soli nungi tenzüka sayubajisa tajungtiba, kechiaser soli nungi meteta aser memeteti shisatsü angazüker. Mapa tajung süaka tamajung süaka yimya süpaba mapa ka indoktsü mesüra melenshitsü kanga tasak. Yamaji tanur asüdang nungi mapa tajung nung yimya süpadaktsüra pai aji meindoktettsü. Tanur ka pa aotsüba lenmang nungji sayutetang aser pai tain akümdang iba nungi mepilatsü (A. shin 22:6).

• Yimya süpabai  education-ji yanglur–(Education is the forming of habits). Anungji, tasodang nungi shisatsü tera (roots) ajak keter asor. Item shisatsüji tajungleni yimya süpadaktsütsüla. Pa dak taremzük aser maremzük keter asor, nai taremzük nung yimya süpadakjang. Pa dak tajung meimba aser tajung memeimba keter asor anungji, tajung meimba nung yimya süpadakjang. Tanur dak maketba ka nai yanglur inoktsütsüba masü, saka keta alibatemji tajungleni renlokdakjang. Aser tanur dangji nai ya inyakba agi ojala/obala kanga mepelar ta, koba nung asen mepelar aji tuteta sayua angatetdaktsütsüla. Teintet tanur küm 15 tema azüoktsü atemabo temeim, taremzük aser tanur angatetba dak alaka lenmang aikabo mali südi ta bilemer.

• Kibong nung temeim– Education nung miim takok kaji temeim lir (The secret of success in education is love). Ellen G. White-i shinübaji alima shi azü nung sosemba temeim indangji  toktsür Tsüngremer temeim indang yagi ashir. Tetsü kati tanur dang tamashi temeim mesayutsüla. Tatishitsü agi tanuri tangar den rara menadang nai pa tepu küma jembir aser tangarji aitsür. Yamaji senotsü nunga kechi alitsü? Nüngdak memeteti tagütsü. Saka pa/la kechi nüngdak ajibo perijang.

• Metongshiba, ajungshiba aser arürtsüba– Tanuri angatettsüsa nai jembitsüla. Nai o kiraka indirect agi tejembi, tanuri aji mangatettsü. Aiben nüngdak makaba oshilu tejembi. Tanur sayuba lenmang nung apu-ani obang ka asütsüla aser külemi shilem agitsüla. Nai parnok nungi teti tajungdangbo teimla. Parnok aibilenba agizüka metongshijang. Ner tanur medemertem den awashi meteta jembitsüla. Tanuri mapa tajung tilaka inyaktetra tenüngsang agüjang aser pelaba sayuang. Nai sayuba ajakjibo pai manidaktettsü akok, kechiaser nena tasoba küma balala lir. Tsüraburtemi pei chinurtem dang pi dang akhümtsübutsü aser peisasa noktaktettsü sayutsüla.

5.Tanur arürtsüba mapang– Na mit adoknüa aliba mapang aser tanurjia yamaji alidang tarürtsü. Nai kodang arürtsüdir tanurji na anasa anir arua tejak o tejak na nguyutepa arürjang aser metongshijang. Pa room nung lia nai kitchen nungi tarürloktsü. Tanuri nai maginüba temesepa chia ajemba aser kaket tamajung amshidang, itemji pai memeteti miima teindoktsü. Pa jar aji mamshitsü aser indoktsü jung junga angateta shiang. Kibok sayuba melira nükjidongtem mataloker. Saka shisa tajung agütsür aliba agi item ataloker (A.shin 15:22).

6. Tanuri aginüba aser mamatetba. John Keats-i yamai ashir- tobur tajung oset kaji teti asoshi tepela (A thing  of beauty is a joy forever). Percy Nun-i ashir, tobur tajung ka indangji tanur mulung  nung teti alir, aser pa nükla nung teti mamar aser ano pa tekoloki  teti agizüker. Saka tobur tamajung, ola tamajung, merükmeju mali, itemji parnoki maginür. Tetsü kati kenü lar tanur dang na kidang melidanger kazüidang kechiba senzür ta arürtsü nung, tanuri asen ki kanga temdangsünger medemer anir arutsü aaker ta langzü. Ki telung tema ajak merüka ayu nung dang  tanuri ner ki meimtsü aser linüa alitsü.  

7. Anogo shia mapang  amshiba– Nai anogo shia ghonda asembosa ne mapang apir chirnur den sensakasemba nung, asayaba nung, lai otsü ashiba nung aser kibok tekülem ken tena sarasademba nung indoktsüla. Tsürabur aika business aser rongsen mapa nung takok tulu ngur pei chir aniba nung tamakok ngur tejak metentetba lir.

8. Education akarji shirnok aser komala? Shibai tangatetba tejangja agi pei külem alirtem dang aser Tsüngrem tenzüker, aser shibai tangar taküm lenmangi anir arur  aser tangar yarinüba, ajemalu temeim, akümtsübu yamala nisung dang education akar ta ajar ta Arnold Toynbee-i ashiba angur. Tangatetba akaba mulungjangji hon aser taribi dang taoba ta apijemtsü shin züluri ashir.                                                                                                                                   

9. Education nükjidong kechi? Iba nükjidong tetezü angazüker külen pei aser lokti asoshi tapet aser junga litettsüba nükjidong. (self  sufficient, social and moral upliftment)

10. Mapa nung shilem agidaktsüba– Tanur küm apir kidang mapa inyakdakjang. Doctor Maria-i Montessori mapa ajanga education sayu. Mahatma Gandhi-i  Ang yangluba, sü atakba, alu ayimba aser carpentry mapatem sayu. Mapa inyaktsü angazükbaji ajak dang tongtibangtiba lir. Tanur tain den bo medemer ama kibong timtem khuret lemsatepang. Aser ita sen kwi angur aser koda indoker itemji lemsatepang, süra parnoki nüngdak makaba nung sen memeshitsü aser meindoktsü.   

Part II

Home is the primary school for every child. Tanur shisatsü angazükdak tetenzükji  ki  lir. Shisatsü noklang nung 60 shilembo kidang angazüker aser tanüngba 40 shilemji dang school/college aser lokti balala nung angazüker. Tsürabur aikadi school, college kaket nungi dang shisatsü ajak angazüker amai bilemer. Au, iba nungji zülua aliba aser tenteta akaba shisatsü (formal education ta ajar) ishika angazüker aser pei azüngba yari degree balala angur. Saka shilem 60 koba textbook nung zülua mali, anogo shia liyonga aoba yimya nung angazüker aser meteter koba dang non-formal education ta ajar, ibaji kidang angazüker. Anungji, education sayuba lenmangji school aser college meranga azüngtsü sayuba dang masü, saka meimchir ka tanela, temang, shisatsü, tekolok tajungtiba nung indakja sayutetba dang ajar.

Education tetezü memeteti nai iba lenmang mesayutet. Anungji, sayuba nung aser metetba nung takok ngudaktsütsü atema  yamai  rasa  ashir. Iba tetezü tashi temeteter balalai yamai ratettsür:

1. Meaning of education– Latin o agi education dang “educare” ajar. Aser iba tetezü “anitetba”. Anungji, education tetezü asen o nung shisatsü anitetba, ta meyipzüker. Kechi anitetba? Tanela aser temang, shisatsü, tekolok aser temulungjang shisatsü anitetba dang ajar. Kong nungi anitetba? Tammang nungi tesangwa dangi aser memetetba nungi temetetba dangi anitetba. Education-ji readymade oset ka ama tesayuri yanglur tanur dak/nem inoktsütsüba masü, saka education tera (roots) ajak tasodang keter asor e.g. – aginüba- maginüba, pelaba- jashiba, item ajakji tasodang keter asor. Saka aji koba nung aginütsü aser koba nung maginütsü, tapet aser tajungleni anitettsüla. Koda pelatsü koda jashitsü item ajak mashiyonga liyonga aodang yimya nung angazükadoker aser itemji education lir.

Mahatma Gandhi: – Education tetezü tanur aser tain temang, shisatsü, tekolok aser tanüla kechisarena tajungtiba nung züindaktsüba dang ajar (by education I meant an all round development drawing out of the best in the child and man- body, mind and soul).  

Socrates: – Education jagi asenok nem tajung tamajung bendangdaktsür aser ochiba ngudaktsüba nung yarir (It helps us to dispel the error and discover the truth).  

Drever: – Education-ji inyakyim ka, koba agi lanurtem dak shisatsü, jaklaliro aser yimya yimbong metongshia yanglutetdaktsür (It is a process by which the knowledge, character and behavior of the young are shaped and moulded). Itemji ajanga asenoki angateter education-ji tekolok kija indaktsüba dang majar. Tekolok kija anitetbaji shiruru mesük, kechiaser sayurbo shiruru-ia angazükteter. Saka shirurui  tai aser ochi lenmang na mebendangtet, kechiba? Pa dak tanela mali. Tekolok techira aika education lenmang menguteti lir, tsüraburi kidang sayutsü mashi. Lesson mekokra tekolok mechira amai dang bilemer aser tuition yoka mark aika ngua azüoktsü meranger. Saka jakla yimya temerük, akhümtsübuba, temeim, tazüokba aser yimya awashi koba textbook nung zülua mali (non- formal education) itemji tim lenmang nung tetsü kadi tanurji anitettsüla. Tanü asen tensa nung tanurji tekolok agi anünger masü item kibok sayu o agi anünga lir.

• Education is soul winner: – Education ta asüba nungji tanela tekümtet densema lir. Temang, tanela, tekolok, temulungjang anitetba ta tetezüji agüja lir. Tanela tekümtet meteni education tetezüji mabensar. Dr. Clark-i asen limai tanela tekümtet indang bener arubaji education ajanga dang bener arutsü. Anungji, tsürabur kadi pei tanur kibong küma yokbaji education agütsüba tatembang ta bilema lira ibaji kanga dang tai. Iba dangji education makaba nisung ta ajar. Anungji, pai tanela anir marur. Education shitakba akarji tanela tekümtet kar tangar-a tamajung nungi tajung dangi aniba, tai lenmang metongshia ochi dangi aniba aser tanela anir aruba dang ajar. Anungji, education lenmang sayutsübaji tantsür, tambur, tanur, tain ta kecha mali, ajaki inyaktsü koka lir.

3.Education is a life long process: – Education-ji taküm tepiyong inyakyim ka lir: Sozükli nungi leperi mai tashi education angazüker aser nüngdaker. Tantsür, tambur aser kibong akümer tetsürtembo education nüngdak mali ta shiangaia mangatetsüla. Tetsü ka tanü nüngdak tulutibaji education ya lir. Training tapu balala, seminary, telok o lemtepba, kaket azüngba, telok mapa balala nung shilem agiba, aser tanur angatetsü (child physcology) angazüktsüla  aser  itemji nai  jangratsüla. Tanurji yashi dang nungi tanü kanga temetetba nung ainer. Saka na yashi tashi temetetba nungto dang alir asünung, nena majuruteper. Nai tanüba ya kanga sak-a bilemer aser tanurji yashi ama tosa  anitsü meranger. Iba dangji generation gap ta ajar. Tetsü kadi ibai kanga junga study süa pei tanur lenji-i aotsüla.