“TESASATSÜ TEMBAR ANA”

By S.T. Yapang Lkr|

Ibai alima süng lung lanu mapang atalokba otsü. Iba tendak nisung o shiruru na o jembitepa liasü, ano lunga karbo arakzüa oli aruli ta senzüa liasü. Iba mapang yimti ka nung kijasor takar asangur kati keyi tulu ka den tembar yimtep. Tena mapang shia aremlen senzüa nüngdak ajak jembi. Ibaji tsürabur aser kinunger ajaki majung ta shiaka pai yangji temulung ila mebilem.

Pa ya nashi aser san aika aliba takar ka, tetemba keyi jaki konung pa dang ashi “Temba ni ner nashi ya angati nüktsüdi nii?” Nashi anüktsü asoshi mapa tasak asünung pai pelashishia dang tetemba keyi dakji mulung lema “Nai dang nüktsüdi süra, senotsü talang tashi ta mesüaka nia na süngujemtsübosa agütsütsü ako, anepalua nükjangma” ta shiloka yutsü.

Mapang tatsüka tsüngta nung nashiji ishika sama. Ibaji tetemba keyi jaki kuli tajung aika shia kar lungbang nung tsükset ta, ano kar jinzüi chitsü ta, karbo arem nung mim chisemer süatok ta sa ashi.

Lialia nashi to ajak samar tesüsa tetsüti tuluba ka, techanu meputsü mapang tatonger, ibaji dang anünga liasü. Iba mapang tetemba keyi jaki ashi, “Temba ner nashi ya ni junga menükteter, oda san ya dang nüktsüdi ni…?”

Pai par yimer aser adianui ‘Keyi den tembar mayimtsüla’ ta ashiba to iba mapang ang tera angateta arua ashi, “Nai nashi tezü aketba shiruru, pei sasa kümzüktsü akokba shirura süngla junga menükteter nung kodaser san amala khenyongi pei sasa kümzüktsü makokba shiruru temulung lemteta nükdaktsütsü aka? Ibajibo tamakoktsü. Ozü meimchiri senotsü ishika nung temulung melemtet nung kodaser senotsü aika shiloka yutsütsü ta sa tatishitsü küma jembir ako.”

Keyi jaki kangasa jashiseta langzü “Medemer atema taküma tenlatsü akok, mesüra takaba ajak agi yariteptsüa akok, saka nabo nashi ishika samaba atema yamai jashir noo!”. Iba o angashia nisungbaji kechiang mesayangi ola madokteti tena senshi.

Tananü tetemba keyi nem süngujemtsü kar bener par nashi komasa anüker ibaji reprangdangtsü atema arem jaki ao. Iba mapang nashi tetsütiji techanu mepua liasü.

Pai talang nungi ibaji ngua tetemba keyi jaki koma anepaludir ta repranga ali. Tetemba keyi jaki yakta dang techanuji ajepa arur tekong nung angotsü lia pai ayimoktsü “Hai… ibaji shiba? Kü indang nashi chanu ngoseta achitsüba asür?’

Ibaji pa temba, nashi kibur to arur ta angateta keyi jaki metzü yangzüka alua nashi chanuji ali nung tanemi ajungzüka yutsü aser ashi, “Ner nashi chanu kangasa temeimtsüka mepuba agi khen menakshirba dang ako.”

Iba anogo nung pai tetemba keyi dak nungi jakla tamajung ajiteter joko pa nem nashiji menükdaktsütsü mulungteter tugu.

Aonung tesü tashi ataaka tetemba keyi jaki nashi to anir madok. Pa mulung nung ‘Kechi asü?’ ta shisadanga par yimer nisung taintemi “Alemli nungi keyiji jakla tamajung, azü memerük, awashi maka, chidiyungdi, ochimashi, külakküpong agi sünga lir, anungji pa den medemer makümtsüla”, ta ashiba kangasa sasaseta bilemtet.

Pai tashi mangaba ajanga tsürabur temulungjang tashitak adoka süatok, asangubai kidang kimang shinga dangia kisemtsüsemi mao, ibaji küptoka par kinunger shingaia par kim alema maketdang.

Joko tesü mejangtsü aliba mapang par kishi nung adoka tetemba keyi to agi akoshitsü, pai yakta lapok nung tzünglu agi medenbeter ashi, “Temba ner nashi tetsüti ka den techanu ka dang aliba to lungren nung tsüka lir, anabo asüngnep yakta tekümzüki odi ni…?” Ibaji kümzüki aotsü renema jembir keyiji atep külen aser pa külen ta mi wanga mejang.

Anepdang yakta saaker arem jaki aotsü apuso, lenmang tanüla asünung nisungba jaki nü ka mejir apuso. Pa tama aser tetemba keyiji tesülen ta ao, pai tetemba dangji “Nashiji kong tsüka aliar nai ang meteta alinung na tama jajang” ta shiaka keyi jaki tesülen dang jajatsü ta shia atsüngzük.

Joko arem min tiyong nungji tetemba keyi jaki arua pa dak pongloktsü atema joka aru, ano keyiji tom nung aliba mapang nisungbaji lenmang tanüla nungji ajutoker alang. Pa alangdangji nüoji (nü taju lenji) tesülen shitsü, iba jaki keyi dakji tebok nung tar sateta atu, paibo ibaji memeteti inyakba liasü, saka tetembabo pa ngoseta achitsü tebilemba liasüba takok mangu.

Keyiji tar sateta tur lungbang lenji longa alu, idangji nisungba jaki yakta saaka lung tulu kati soketa atu. Tetemba keyijia lung züng nung tebokji nemiter arua mener tangu tashi agi hüü… hü… hü… ta nünga ashi, “Temba ner nashi ajak ni ngoseta chitsüogo, tanü naa ngoseta achitsü tebilemba liasü, saka Tiatsüri anata na tia tuluba tiatsüa liasü südi, iba yongji tanü niang asür.” Iba oji shia tetembaji asü.

Nisungba jaki pongzüka lur süngujong ka kozüka zükbanga yutsür tugu. Iba jaki tanü tashi nisung o keyi na tembar mayimer.