By Dr. Senti Longlumer |
Alima tensa aser mopung melenshiba ya nisungi melenshitsü makokba aser menoktangtettsüba temzüng ozüng den saku lir. Ayongtem yimjen ayimer saka tanaben meyiba marur, tamaren chuba yimli kenübo laor aser mapang tatong nungbo tenem ozü tepena chizüka tsüker ta tar nunger otsü nung ashiba dang masü, saka asen nük agia ngua arudaki.
Alima tensa aser mopung melenshiba ya nisungi melenshitsü makokba aser menoktangtettsüba temzüng ozüng den saku lir. Ayongtem yimjen ayimer saka tanaben meyiba marur, tamaren chuba yimli kenübo laor aser mapang tatong nungbo tenem ozü tepena chizüka tsüker ta tar nunger otsü nung ashiba dang masü, saka asen nük agia ngua arudaki.
Asen Naga lima aser tongtibangsa Ao lima tekong trok sanger aliatsükrepa aliba lima, temeremsü abener bangdak yimsüsür wabong tajung agi yimkong sünger mongzüa meyimoktetba yimti aser yimzanu ajunga pei sasep yimjiyimjung nung lia aruba tamaren yimli to tanü putu tasen mopung agi onshiba ajanga apuapua azüngmeyaka kümogo. Tongtibangsa Mokokchung town Jungli Mongsen sanger yimtiba Ao kin ken o yanglua renemdak aser lepdang dak retreta akhüm aketba terunem to samaogo. Item tatalokba ajak ya nisungi yangluba alima tensa aser mopung ajanga lir, koba dang mashileni melenshiba ta ajatsü akok. Asenok akümlirtem nük agi ngua temelenshi tapu balala tajung aser tamajung jenti ajangshia arudaki.
Temelenshiba ya putu shia yimya aser lenmang balala nung asen meimchir dangi arur. Alima tensa aser mopung melenshiba jenjang ka nungi kati aidang asen meimchirtem tangatetba aser libaliru tera tajungba jenjang kati arua atar, aji ali pokli nungi tatalokba otsüren ajak nung keta lir. Sürnung taoba küm 10 (ter) tsüngda Naga lima aser tongtibangsa asen Ao lima nung atalokba temelenshi yabo tesüiba pututem nung atalokba otsü aser yimya den khenyongi balaka ta tetangshi senso tongtibangsa laishirtem bang nungi adokba ken o ajanga angashiogo aser kuli süogo.
Tsürabur otsü nung “shi akadang ango akaba ama” aser “jeba alidang ano khen maoktsüba” jilu mesükba temelenshi lima ka nung tanü asen kin alir ta ajangajanga angateta yudi. Tako marok menürema ajemba medem item ajunga alima nung alir meimchirtemi mapang ka nungbosa agitettsüba sobutsü ka ta dang kümdaktsüdi.
Menoknok anoktsü ghonda mesüra anogo ishika lia min nung aliba ozü sangnu aser tongtibangsa shingotem tipmedemi asaprang tali asür. Iba den mesüktepa 1990 küm meta ka nungi tenzüka linük nung tamangtir shinertem aser arasentsürtemi (soothsayer) Mokokchung town nung tesashi menoknok ka anoktsü, anentzü lendong ajurutsü aser yimdong sünga azü yima angur tasa mapang shia shinba angashia aruogo. Atangji, item mangdang ajanga chichiba lendong matalokdang nungi nüburtem tokolok yirua (mental trauma) temulung ali-i malui shisabulua liasü. Item tamangtsü shin o den ano tanga tatalokba otsü aika dang lir. Tatishitsü agi, gari tetsüng ka pokrep nung yimdong nung jajaya alir aser dokan nung shishirtem ajunga taoksa nung tetsübu ola adoka jepa atentena ajenba aser dokantem aritepa kishi shibangba mapang shia atalokba ngua aruogo. Ano mapang kakabo temalenburi teküboklen ta aser alulanglen alirtemi tuakilen kateper, nisung tepseter tasa rongrongtep, saka aiben kecha tatalokba lendong mali sürnung temoktenü agi anoknübasa liasü. Item tatalokbatem ajunga nüburtem tasü maitba agi masü, saka tetsübu olulu den mapang shia nisung tepsetba, merenshia aser raratepa nongnong ola agi nisungtem tokolok yiruba ajangshia liasü, koba dang asenoki TEMOKTENÜ ta ajar.
Kodang nisung koloki Tsüngremi memulungba aser nisungi maginüba temenen idir mojing kanga yakyaka akümer aser chichiba teraksa lendong matalokdang temoktenü ajanga tai maket nisungtem tasüa pokreba tsübudaktsür. NBCC, ABAM aser local arogo balalai mapang shia sentong tajung yanglur fasting aser bendanga agüsüba sarasadem agiba ajanga asen lima nüburtem tataloktsü yuja akaba lendong jenti nungi kümzükogo ta asenoki angatetdi. Saka alima kin otsü nung aitsü nüngtem mechi nung tako lendong tulu karbo kecha tashi agi menoktangteti asen meimchir dangi arua nüngshi süa tetshitsüsa ataloker, koba rongnung ka tanü asen yimti Mokokchung town nung nüburtemi ajangshiogo.
Naga lima tesem balala nung Christmas mungdanga aruogo, saka ajangshia aruba agi Mokokchung town nungsa telemlaba, telongsoba aser mera taketba amunger. Sürnung tesüiba mapang nungbo Christmas benjung amungtsü ano hopta ana asem jilia town kinük aser yimdong ajunga star agi sünger, oda anema alirtembo toktsür shiranger pei yipden nung ondaka alirtema kishi aser window nungi item tobur tajung petinutem benzüdang minute ishikabo shiranga aneper ama temulung pela-a anisüngzük angu. Saka 1994 kümbo Christmas petinu agi anüngba wara ka agi Mokokchung town semdang aser nüburtem tongtibangsa amangbapurtem tejak nung tejangraba aser teyongyaba ka meli-i alima mangmanga aküm, kechiaser nisung tepsetba osang, tetsübu olulu, itasen manguba aser Government department kecha nunga bill magütsüba den külemi kilen saru ka sulen ka ta maneni kikümbang ajanga aitba ajanga nüburtem temulung pela alitsü lenmang khenyongi mali kümatok. Ano town nung dokantem tongtibangsa daily bazaar area nungbo 2:00 P.M sülenbo aritepa shibangasa adok, kechiaser lanur azümesen sür tajung sobua linertemi tashiyim agi dokan nung rakzükratema jajameso, koba agi nüburtem tongtibangsa shishilembartem ajunga pei kolak nung aliba atsük agi meinba dang nungi tamajungba meintsü.
Iba tensa nung kenü anogo nikongtsütsü 2:00 ako meta ka tzümar süoshi ayoker nisung ka tejak tebang ajunga waker zübu agi sünger azü yima medemer kati ajunger kü clinic-i taneptsü bushia aru. Yimya agi kodang shiranger tongtibangsa yirur patient ka Doctor dangi taneptsü bushia arudir, mezüngbuba tatalokba otsü (history of the case) asüngdanger. Asangur chanu nisung pezü aruagi parnok ajunga par dokan nung tayoktsü itaka aliba sen magütsüi Jacket kaka asem, yokzüka akaba sen ajak meshi aser pa dak nisung anati kanga mejungi züker oatok ta ashi. Iba amala asen Naga nunger sobaliba dak maketba aser mapetba mapa tamajung inyakba ajak ya lanur kija taibo masü, saka linük nung policy yanglurtemi law and order mapa majetba den common people economy ajungketsü nükjidong nung sentong tajung kecha yanglua meinyaktetba ajanga ataloker ta nüburtemi ajangajanga angateta ayutsüla.
1994 küm Mokokchung town nung Christian kibong teimba ka nung süoshi aser tsüngsem tasen alitsübo toktsür Christmas card aser shi kg ka danga alia mechiteti benjung süidaktsü. Iba kasaji tanga tesem nung ataloker alitsü südi, kechiyong ayongti konga adokba den sapisaru tali poktet. Christmas mapang December 24 aonung 7 PM meta ka ni kidang mena lia tanur chanu ana teyi o tenu na torch light taseper ka remshia tsükloker arua ozü kima gate nung noktak. Ni kimai asema lur asüngdang nung tanubusangi ketsü tanü nikongtsütsü nungi tebok nung tasütsüra atua shiranger, anungji, taneptsü bushia na ajai aru ta langzü. Aritepa dang sü ka ajeploker tena den külemi ao aser Baralgan Injection ka agitsür tanüngba nüngdak mozütem zülua toktsü. Iba tetsürlaji Acute Appendicitis tashitak agi shiranger liasü. Christmas benjung mapang ka nung asünungji ni par tsükten reprangdang nung shi temelang tila ka danga kongdaka mangu, kechiyong asen Aor yimya agi kibong aser alima economic jenjang ajung majung tsükten aser tsüngbang melemba nungi ajiteter. Shi ya chiyungtsü tajung ka dang masü saka oboula nungi Lungtrok nung poker Jungliyimti lima alidang nungi kin aser yimkong nung tantsü tambu shilep ajanga dang meteter. Asen lima to shitakba kongatokogo ta kü mulung nung bilemer kidangi meyipa shilang. Tanünü kinungbu mozü züluba prescriptions slip to bener kidangi ni bushia aru. Jang taonung sorutsü maka nung sen kong akaba agi mozü alitsü ta nüktzü neta pai kü dang ashi. Par kidang akaba sen ajunga agi senpak 50 dang liasü, koba taoba Honibar aonung ajungben sarur nem agütsü ta angazük. Yisu khrista alimai aruba tepela benjung senpong nung poisajang ka danga mali, jangpong nung jangko ka danga mait sür kinüngtsü shiranger yipden nung ondaka yur tebu den tanur tila pezü chokka nung milak tila ka jangrua aliba mimong meketa nükjang maremshi-i shisabulua mena aliba tanü tashi kü nükla nung mesamar. Linük ka socio-political aser socio-economic tekübokba jenjangi aluba temaitsütemji item tatalokba agi tuyur. Anü luaka ano ita adoker ta tsürabur otsü aser shin o nung ashiba mesüka Christmas temulung süa memungtetaka New Year benjungbo junga mungtisü ta teimla tulu nung bilema alidang, ‘tsüah au’ ta asüba agi dangbo mulung manentsüsa Maratha Light Infantry-i New Year senpet taku jangzü 27th December ’94 anepdang 10.20 A.M shitak nung apuoktsü.
Ano iba den sendaktepa otsüren kar, 1994 küm September ita meta ka nungi tenzüka tanurtem school tatidang temer külenbo Mokokchung town nung lendong tulu ataloktsü ta kinük aser yimdong ajunga nung jembiba angashia aruogo. Atangji Mokokchung town ya Nagaland nung olulu moludak yimkong ka asünungji, shishia mesüi rapaleni dang angar toktsü, saka iba jagi nüburtem mulungbo atena toker liasü. Item tetsübutsü oluluji temenen mojingibo metetatoker tataloktsü aliba lendong indang asenok dangi jilia osang bener aruba liasü, koba dang pi oshi nung AURA or PREMONITION ta ajar, koba December 27 anepdang temai volcano ama pokteta adoka sentsü sayu.
Iba article ya tsürabur late Dr. Senti Longkumer-i züluba “27th December” Mulungko ’94 (Memory of 27th December 1994) kaket nungi mezüng chapter lanurtemi otsü mamatoktsü atema agiteta adoktsür.
The Nokinketer 