“First division nung dang takok ngura kecha masü ta bilema result ataa liasü, saka top 20-i aitsübo ni khenyongi imlaa malisü, iba asoshi Tsüngrem nem tenüngsang agütsür”, ta NBSE-i agiba class ter (HSLC) tatidang nung top 12 adoksang Queen Mary Higher Secondary Mokokchung nungi Sp. Imtisünep Jamiri iba osangbener den jembidang ashi.
Taküm kümbo Mokokchung district nungi HSLC top 20-i airbo pa kisüng liasü. Sp. Imtisunep Jamir ya Longsa nunger Mokokchung Compound Baptist Arogo nung Pastor, Lanuwati aser tetsü Moamenla na jabaso lir.
“Iba takok ngutetba ya tongtibangsa Tsüngrem nem tenüngsang agütsür, iba den ozü tsüraburi bendanga yariba den tesayuri nendaka sayuba, kü indang tutor Bendangaküm aser kü medemer aser kinungertemi tajungshiba agütsüba ajanga lir”, ta Sp. Imtisunepi pelaba lemsatep.
“Nai kechi inyakdir item ajak nungji Tsüngrem tama südaktsütsüla, iba den meranga azüngba, bendanga agütsüba aser temulungtetba ayutsübaji kanga tongtibang lir”, ta pai ashi. “Nai kechi jangrar iba nungji temulung agütsütsüla”, ta paisa shisem.
Tanü lanurtem aika computer, video game aser social media balala nung mapang teimba intokmar, iyongji lesson azüngba nung takok junga munguteter, ta paisa reprangtetba ka lemsatep.
Pa QMHSS nungsa maneni science azüngtsü aser kenü medical doctor ka akümtsü pa tejangraba lir.
The Nokinketer 