~ Arsashi Ozüküm

Tanü lima akhi mapang ama masü, saka temelenshi tangatetba nung aor. Asenok ajaki metet, Arogo ya asen lima asoshi kanga tashi tait aser tamdakdak. Arogoi tanü temeim mapa jenti inyakba kuli tejangja ngudaki. Aji oda süaka, pei Arogo süki ulushia awajema inyakdang tekümdangtsü kar lir aser aji ni yangi shiner.

Mokokchung ya kanga tulu masü aser kiyongtem tetsüngda kangabo mali nungtepa aliba jila ka. Osang yakta angashiteper, olulu ah yamaji bulur aser yamaji timtem nunga tepela nunga karakara kati ka yaritepteter. Tanü technology lima nung ajak takok arishia mapatem inyaktepba tensa ka lir aser iba technology amshia Tsüngrem osang tapu balala ajanga sangdongteper aser aji kanga pela bilemer, kechiyong tsüngtong motetaka, pei sasep nung reprangtsü satema koka lir.

Aji oda, kü dak atalokba ka lemsateper. Temang nung mokokmein tera aliba ajanga yasüng ayipjanga amoa moteti kazür tanep sangwatsü 4:00 ako meta khen amozüka ao. Tatsüka tsüngda nung Osep (Mic & loud speaker) nungi tsüngen-ola angashia aoksar sak. Sannükeri Deobar anepdang züngia tekülem agiba angashi. Aonung sangwa nüken asü yong kanga dang nemjema jashia tenük neta sak. Aji ozü Arogo kiyong Pastor ola masü saka tanga kiyong ka nungi liasü.

Idak ya ni kechi shiner?

Arogo ah sür pei süki ulunüdang tangar nem timtem tuoshi agütsütsüsa mapa inyakra ajia inyakyim nung junger na? Hospital nung manemer timtetemer jenti anisüngzük junga mungui lir. Par asoshi züngia ayimtenbaji (loud speaker nung) tepela tesüngzük na? Shisaluyimertem, 4-5 nung saker kaket azünger asoshi iba ola agi ata ghonda shisatsü angazüktsü nungi meina soiter masü na? Internet ajanga kidang mener mapa balala tah agia inyakertem tanü putu nung lir. Parnok asoshia khen anisüngzükdang Tsüngremer yimyim süaka, aji agi memeinli ma?

Pei san koda anepalua lai o manna teperi mangaoktsüner, lenmang teperi satema lir ama bilemer.

Yimtsüng ka nung tangatetep nung inyaker süra ajia kecha mali saka town ka nung tanak temesüng arogo balala alidak yamala yimya yabo melenshi nung ajungtsü ta reprangteter. Benjongbentsü mapang ama süra oda ajia kecha masü saka anogoshia, hapta shia küm piyong bo majunga ama ajitetba lemsateper.

Ni iba zülu ya Arogo mapa anemba masü, Tsüngrem anemba masü mesüra sannüker kar anema-a masü. Ya arok asoshi yimyim ta angatetdaktsunür.

Yabo melenshidi arung!