Mokokchung MMC Complex kübok Dilong Govt. High School anasa “Library cum Theological Research Consultancy” ta sür ka Rev. Dr. M. Rongsen Longkumeri meshiteta sarasademer lapoktsüogo. Iba library ya theologian Dr. I. Asongla Pongeni lapokba lir.
June 2 nü Rev. Dr. M Rongseni iba library lapokja jembidang, kechi mapa südir süaka mezüngbo tila ka nungi dang tenzüker, ibai asen lima nungbo mapa tasen ka lir saka meilongi tuluba aser tajungba aotsü teimla angur, ta ashi.
Nagaland nungbo iba mapa ya mezüngbuba asütsü südi aser Aor yimtiba Mokokchung nung ya amenokba ajanga theology azüngertem dang masü saka secular azüngertem dena teyari aser tajangzük tulu angutsü imlar, ta paisa moaja metetdaktsü.
Dr. Asonglai mapang tatsüka agidang, la taküm nung mapang teimbatibaji tesayuba mapa nung intok aser sayutsübaji lai jangraba ka lir, iba mapatong ya tajangzük bushiba mapa ka masü saka Tsüngremi la nem kempet moatsü jagi nübur tenzüktsü aser iba ya ajanga kaketshirtem degree balala bushidang talisa research maparen balala nung yaritsü aser lenmang sayutsü nükla yur tenzükba lir, ta ashi.
Iba den külemi lanurtem India aser bendang tesem balala nung theology züngnürtem atema college tajung tuyutsü aser lenmang balala sayutsü, lai mulunga lir. Iba library nung kakettemji angati azüngtsü akok aser kidangi bener onürtem nema mapang telatet yur bener yoktsü, ta lai shiogo.
“Library cum Theological Research Consultancy” ya Hombar nungi Brihostibar (Monday-Thursday) aser Honibar (Saturday) nung anepdang 10:00 ako nungi nikong 3:00 ako tashi lapoktsü. La indang library nung ya tangji thesis kaket balala densema temeyoktep kaket meyi ka dak tema kar aser yakta bibical commentary tajung ka arutsüba lir, ta angazüker. Dr. I. Asongla Pongen ya Longmisa tsür aser la ya küm talangka Clark Theological College, Aolijen nung tesayur inyaka liasü.
The Nokinketer 