~Tiatoshi Longkümer
Coronavirus agi asen lima tonger nübur ajak tetsübu tatenten nung timatemdang, government-i anir temulunger telok aikati mapa tajung inyakdagi. Iba asoshi kanga dang pelar. Iba temeim mapa inyaker teloktem rongnung asen Aor lokti balalai inyakba yasa tang tashibo ajak dang tajungtiba ta nibo bilema kanga temulung asür. Delhi nungi Bangalore tashi aser Punjab & Gujarat nungi tenzüker Mokokchung tashi nung asen Aor kong telong junga tenteta lir, item ajak nungji tenla tajung agütsütepa taküm kümzükba mapa tajung inyakba ya tesüngmangtsü, aser ano yamai mapa tajung agi melaki inyaktsü merangtepdi.
COVID-19 wara anema Nagaland ajonga renemshidang mezüng tenlartemji asen Ao arogotem liasü. Mokokchung Town Baptist Arogoi mezüng süa PPE alitsü nüngtem nung Mokokchung D.C. nem sen lakh ka tenlaba asenoki nguogo. Ano Kohima Ao Baptist Arogoi Nagaland C.M. COVID-19 fund nung lakh asem agütsüba den District 11 quarantine centre atema district shia nem lakh ka-ka tenlaba government-i metetdakja liasü. Quarantine centre atema government-i ladang dang, ABAM-i Impur hospital amshitsü melaba den ano yangji tanenertem ajak asoshi chiyungtsü dena agütsütsü sangdongba den senotsü tenlaba aser iba sülen Mangkolemba arogoi par arogo rest house quarantine centre amshitsü melaba asenoki osang ajanga angashiogo. Delhi nung aliba Ao arogo aser Aor telongjemi yangji aliba Aortem asoshi mapa tajung inyakba, Bangalore, Mumbai aser Chennai nung yaritepba aser Aor NCF pastortemi Naga nunger timtimertem metetpela yariba item ajak ya temulung tangtsüka inyakogo, aser alimai aji ngua lir.
May 22 nikongtsütsü Chennai nungi Shramik special train nung Naga nunger 1469 bener Dimapur atongba sülen Naga lima nung mapang tatsüka tsüngda COVID-19 positive cases aika renloka ao. Tangalen nungi arur Naga nungertem quarantine center-tem nung yur anepalutsü asoshi khuret tulu adokdang, Dimapur nung aliba Ao arogotem aser Ao union-tem ajak lungjemer Dimapur Ao Baptist Arogo-i anir kanga tasü itta quarantine centres ajak nung Naga nunger temulunger ajak yaritsü lemteter rongsen aser nubu jenti tenlatepa inyaka aruba angudang kanga pelar aser tangar Naga nunger matsüngdang asüküma bilemer. Tang wara mapa sendakba nung mapa tajungtiba rongnung kaji iba ya lir ta bilemer. Quarantine centre achaayangba sendakba nung ano Kohima nunga KABA-i arogo meyong Jubilee Memorial Centre frontline workers (docs & nurses) quarantine atema melar amshir aser ano arogopurtemi tanga quarantine centre asoshi sorochiokdak yariteper. Item ya tenla kanga tulu lir aser capital nung kin aikati meinyaktetba mapatem lir.
Mokokchung town nung DC Limawabang Jamir-i anir Coronavirus wara anema raraba mapa inyakba ya Naga kin aika atema tatishitsü kanga tajung lir. Mokokchung town nung government nung inyaker, arogo aser local bodies ajak teka amteper quarantine centre-tem nung alirtem taküm aser tanela achayangba tarensen mapa inyakba ya tang tashibo tajungtiba rongnung ka lir. Aser tesüngmangtsü kaji iba ocet züluba mapang tashi nungbo Mokokchung quarantine centre nung positive case ka danga puteta maliasü. Ibai Tsüngremer maongka ulura aser asen mapa tajung ajakji Kibubai reprangoka ayur. Kasa Shramik special train nung Chennai nungi aturtem dang sür nung dimapur aser kohima nungbo mendijang arodang apoker amai tashitak puteter, saka asen Mokokchung nungbo tang tashibo ka danga positive case malibaji koda tepelatsü. Ya Tsüngremer mapa ta angateter.
Asen Ao kin ya Tsüngrem nungi mezüng maongka anguba kin lir. Yongji putu aika Naga lima asen Aortemi anir arogo aser yimden bangdak nung yimsü süa aruogo. Tangar kini Ao kinji advanced tribe ta ajia akhümtsübua aruogo. Joko alima ajonga melenshia arurji, tanübo asen Aor dang masü tanga Naga kintem-a tazüngba aser temetetba nung ajak sakusa kümogo. Tanübo Naga lima nung Aor dang nungibo tangar kin ang teimba yimsüsürtem lir. Aji tim dang. School tatidang nung passed asüba aser mapa anguba yabo shiri meranga inyaker parnok shilem asür. Saka linük aser nübur asoshi temeim mapa inyaktsü temulungtetba yabo ochi tangatetba nungi adoker. Temeim mapa inyaktsüba yabo shisatsü nung “advancement” ka melira oda meranga azüngba aser rongsen akaba kisüng agi meinyaktettsü. Yamaji asükala, pei kintemi ang iba temeim mapa tenlaba ya tuluba inyakteter lila.
Atangji, iba COVID-19 wara mapang asen Aor aser Aotsürtemi lungjemer Naga kin ajak asoshi pei akokba tajungba agi temeim mapa inyakba ya tangatetba nung “advanced” asüba temaitsü ta nibo tasü itta shiteter. Tanü alimai asen Aor dang ibaji ajitetdar. “Anungji asenoki tajung inyakba nung melakli, kechiyong asenoki temulung makai mekümra, mapang shitak nung arutsü.
Anungji, asenoki mapang ajak nung inyaklen lira, nisung ajak asoshi aser tongtibangsa tamangertem asoshi tajung inyakdi” (Galatia 6: 9-10).
The Nokinketer 