MASS MEDIA – TETSÜRTEM ASOSHI TAJANGZÜK ASÜ TAKOKSA?

~ Longchanaro Longchar

Noksa nung anguba aser asangsang nung anguba tetsüngta tulu lir aser ibaji bendangtsü atema asenok shisatsü nüngdaker. Tanü alima kangadang karaa ainba lima ka nung asenok alir ta bangbet süa jembiba asenoki meteta lir. Saka alima ainba den liromedema asen shisatsüjia ainer asü masü?

Tanü putu nung joko TV aser telephone ajanga dang masü saka internet, cable/satellite TV aser mobile phone ajanga osangtsüsang agiteper, noksa lemsateper aser nüngdakba tongtepratep ajak inyaker. Item amala “information technology” ya asenoki noktangtsü mesüra soita ayutsü makok aser technology-ji tajungba, tuluba, tekaraba aser tesashiba tang akümtsü. Iba ama alima meyipshishidaktsütsü tashi aketba technology putu ka nung alidang asenok shisatsü aser tangatetba koba jenjang ka nung lir?

Asenoki metet, “information technology” ajanga “mass media” ya tesüngmangtsü ka melenshidaktsüogo. Mass media nung asenoki tajung tamajung ajak angutsü saka asenok dak tajung aser tamajung bendangtettsü shisatsü alitsü tim. Tia kar maka, anogoshia aben asenok liyonga aodang item mass media ya joko asenok taküm nung shilem ka aser asen temang nung tenüktelen ka ama kümadokogo. Ibayongji yimya sübaba ka ama asenoki joko mass media ajanga bener arutsüba tajangzük aser takoksa asadangtsü mebilemer.

Mass media tashi amshia shishilembartemi nübur mesüzüktsü tasa jenti amshir. Terebrangertem puadaktsütsü aser parnok ket nungi sen mesütsü nükjidong nung shishilembartemi noksa tapu balala yanglua sayur. Noksa nung aiben tetsür tobur tajung süoshi junga masem sayuba asenoki angur. Ano TV, osangkaket aser magazine ajak nung tetsürtem mangsa ama sayuba asenoki angur. Item aiürtem ya asangsang nungbo tobur kanga tajungbo masü saka parnok noksa ya computer nung yanglushir (digitally manipulated) sayuba lir. Saka tetsür aikati item noksa nung adokba aiürtem ama renemtsü merangba asenoki angur. Ya kangadang tekümdangtsü ka lir kechiyong yamala mesükba ajanga tetsür ka tekolok shisatsü menentsür, loktiliba masüngteti kümdaktsür aser rongsenkettsüngba nung tabok badaktsür.

Küm 2007 nung American Physiological Association (APA) ajanga tebushidangba ka inyakba sülen tansütsü osang ka sangdonga lir. Mass media nung adokba tetsür noksa rebrangba ajanga tetsürchanutem shisatsü aser temang (emotional and physical health) raksatsür ta APA-i ngutetogo. Parnokisa ashiba agi, teintet tetsürtem dang nungi tetsürchanutem asoshi iba lendong ya anasaba lir.

Ano nüngtugu kentenertemi ken atenba nung ojang tamajung inoka atenba aser ken noksa (music video) nung nüktabangta noksa ama azüabonga sayuba ajanga lanurtem tekolok shisatsü koda raksaja alitsü! Ano tanüasüng lanurtemi Korea nungeri yangluba noksa nung sayuba jilo koda sapua ayir, asenok ajaki meteta lir. Korea nunger ya mapa kangadang meranga inyakba kin ka lir aser noksa nung sayuba ama parnoki asangsang nung malir. Noksa nung sayuba ya parnok shishilembatsü tasa ka dang lir saka tia maka asen lanurtemi parnok asangsang nung libaliroba masü saka noksa nung sayuba dang jilo ayir. Noksa nung Korea nungeri renemba jilo ayitsü melenbo asangsang nung Korea nungeri mapa meranga inyakba ama inyaktsü angazüknung koda jungla!

Mass media ajanga sayuba noksa kobasa tagitsü, kobabo tamagitsü, kobasa tajung aser kobabo tamajung – iba tetsüngta meteta shimdangtsü asoshi asen nübur dak shisatsü agi anünga aliba tulu ka rebrangteter. Iba tashidak ya lanurtemdak tang atemer masü saka tsüraburtema jenbua mali. Pei abuani toktsür tangar den nüktabangtaba, tangar nüngsenbangsena jembiba, balaluyaba, kibong nung tesünep maliba, chirnur mazüoktetba,  mapang mamshiba, azümesen, Chidiyungdi , bangdak kübok melitetba aser yamala yimya tamajung jenti tsüraburtemi mass media ajanga memeteti angazüker memeteti benshiadoker atar.

Tetsürtem, talisa tantsürtem aser chidentsürtemi Hindi serial kanga sapua rebrangtepba asenoki meteta lir. Ki mapa rebranga inyaktsü melena Hindi serial rebranga kazüba, nüngdak jembitsü melena Hindi serial otsü longa kazüba, oda office tashi nung Hindi serial otsü tatongi atonga kazüba – ya atangji ataloker! Hindi serial nung sayuba yimya timba ka Hindu nunger sobaliba aser Hindu tamangba yimsü nung ajemdaker sayur. Parnok sobaliba aser tamangbaji asenok den mabet ta meteta lidi. Sütoksünema rebrangba ka dang mesüra ‘entertainment’ ka dang ta bilemer rebranga alitsü akok, saka parnoki tenük agi rebrangba noksaji parnok tekolok shisatsü nung memeteti züngzünga rema yuadoker atar aser parnok asangsang libalirodang noksa nung anguba yimyato memeteti benshir.

Mass media onük ya kanga dang tulu lir aser iba ocet kija agi teperi masü saka tongmelang agi tangatettsü kar lemsatepogo. Iba ocet nung lemsatepa aliba tatishitsütem ya asen tendak tabet tesa lir. Information technology ya manenidang renloka aotsü aser mass media-jia tatem maka renloka aotsü. Alima yamaji aindang asenoka shisatsü arener asü mesüra menener, asen ajangzüker asü akoksar, ibaji kanga dang shisadangtsü mapang tongogo.