Covid19 ajanga linük ajunga nung timtem tenzüker külen nungi, Mokokchung IMDH mozü kidanga April 7, 2020 nungi tenzüka “Flu Clinic” ta sür ka radiation therapy atema asüba building nungto lapoka shirangertem anepaludaki. Iba clinic lapoker tanü tashi arudang nisung 60 dak tali anepalua reprangba osang angazüker.
Tokolak angoba den temang metaa ngoyangoshiba, nebtsübangtsü yima aketa shirangba, tangu junga mesashiteti timtemba aser iba dak sentakba timtem koba dang Influenza-like illness (ILI) mesüra flu-like syndrome/symptoms taa ajar, item tashitak agi shirangertem iba “flu clinic” nungji anepalua repranger.
Covid19 agi shirangertemji yimya agi Influenza-like illness (ILI) agi shiranger amai asür, anungji, tanga tashitak agi shirangertem (general patient) den memeyokteptsü atema iba flu clinic ya mesemtetba lir, ta iba osangbeneri Mokokchung IMDH Medical Superintendent, Dr. P. Medemmayang den jembidang pai metetdaktsü.
IMDH bushia arur patient-temji Influenza-like illness (ILI) agi shirangertemji general patient den memeyoktepi indang-indanga iba flu clinic jagi yoker aser general patient-temji akhi ama repranger, ta angazüker.
Influenza-like illness (ILI) agi shirangertemji clinic nungji tenüng züluoktsü, parnok jajaba otsü (travel history) ajak asüngdanga züluoka ayutsü aser tanga nungdakba ajak inyaker külen temulung melemtetba rogo (suspected case)-temji TrueNat machine nung tendangtsü aser yangji negative adokra iba mapang tashi atema negative asütsü aser positive adokra osang tali jangjatsü atema RT-PCR tuluba aliba tesem Kohima mesüra Dibrugarh-i yoktsü, ta Dr. Medemisa ashi.
PPE alidang kanga kümdangtsüla
Personal protective equipment (PPE) aliba mapang kanga kümdangtsüla, kechiyong tetsüngdai aiter nisung aika lir, iyongji aiben parnok nungi tashioktsüba ajurua arudaki. Anungji, ajaki mapang agiyongja certified süa aliba company nungi dang inyakyim shitak nung alitsüla, ta Dr. Medemisa nüburtemi meteta alitsü atema takümdangtsü o ka metetdaktsü.
The Nokinketer 