~ By Lanupokyim Longkumer

Oh Oba, na koda tasü tait akhüm taket.
Molusongzü tepong ama temulung tulu,
Tsükchirtem, metsübu-i tongpang – Nok amerji Na.
Tzüsem-yipru mopung tesashi nung,
Lungkirong medem na kü jenokdak akhüm.
Ne senti taküm laoakasa mesasai,
Ne akhüm nung kibong ayipjanga yutsür.

Obala, akhümpok nungi shisa rajem poktet.
Kü shisa mulung ajak rapoka lemsatepdak,
Obala miim shisa tarok sayu olenji;
Kü teka nung ajok aser kü tetsüng milen.
Itemji senti hon temeja agia malizüktet.
Kechiyong, ne sayubentsü sensamasara,
Ayatai! Tammangdak milen seplalang!

Akümli wadang khuret tulu agi neneter,
Taya-tzüra, terokong jenti ajuruaka,
Taku-tasen ajakji nai meyoktemer.
Temulung zürepaka, tepela-jak dener;
Oh Oba, ajemalua kibong khuret nai aben.
Ni ala-ashia, süktema meyutsünüdang;
Anüdok nungi anülu tashi anü-tzünglu tesashi den
Ne teka, tetsüng mazüngi inyakaa;
Kü taküm jenjang yangertsüogo nih!

Soli-süli yimkong akümliri mepaitoktet,
Meimchir taküm ya aih naro ka dang mesük,
Anüng nung mepet ama ilonga aor.
Tanü akümlir rongnung nabo medensem,
Saka ne temeim metsübo kodanga mesamar.
Na mali, talen semtu ka dang mesük;
Tsüngdangpia konga azüngmeyaka kümogo nih.
Nükpoker ket nung ajok mali medem,
Lungren lungpang memeteti atsüayonga jajar.
Nüngjang tatem tashi bushiaka,
Ne ochi temeimbo konga mengutet.

Yimti tezülen azüki teraksa ka süaka
Obala aliba kibongji,
Talang nungi wangshi-wangshia repranger.
Kechiyong obala den kotaker ain tashi dena lir.
Tanü akümliri aji rajema metetlasang,
Kibongtemji koda jangrademtsüka süla.
Akümli kotak tepela tsüki mesüka,
Obala akhüm nung kibong tepela angur.

Tanü iba senti anogo, alima rangben nung;
Kibong, lokti asoshi Obala mapa tajung bilemteta,
Akhüm tetsushi khonang senpetsür.
Obala dang maneni meimdi aser akhümtsübudi.
Alima kin kaji, kibong ka nungi jakzüker.
Kibong nung tokolakji obala.
Na ajanga meimchir otsü aser sobaliba yanglur.
Anungji, obalatemi maneni Tsüngrem tsübua;
Kibong rangben kotak anasabai anitsü.
Tsüngremi Obalatem arishi talang temlokjangma.


Amen!

Wb. Lanupokyim Longkumer