July 7, 2020 anogo anüngdang 12:00 ako meta osang kar lazüka Tuli Police Station nungi police team kati Tuli town area nung gari mitba mapang, Longleng-i chiyungtsü belenba gari ka nungi ozüngi memelaba yi IMFL MC rum case 18 den brown sugar asütsü ta temulung malem bilemba gram 3 shi apu, ta Mokokchung Superintendent of Police-i sangdong ka nung metetdaktsü.

              Inüjisa Longleng-i aoba dumper truck ka nung IMFL MC rum case 3 apu. Item maparen dak sentakba ajakji Tuli Police Station nung case registered süogo, ta Mokokchung SP-isa metetdaktsü.

              Ano July 9, 2020 nü Chuchuyimlangi chiyungtsü abenba Bolero Pickup ka nung IMFL MC rum case 4 apuba maparen dak sentakba nung Tuli Police Station nung suo moto case registered asü aser tsüngsü tali bushitsü atema gari driver den handyman aser parnoki bena aliba osettemji pua lir, ta police osang nungsa metetdaktsü.

              Nagaland nung yi noktangtsü aoshi 1989 küm Nagaland Liquor Total Prohibition (NLTP) Act renemer küm 30 dak tali arur, aji saka, asen lima ozüngi memelaba yi shibelenba manenteter.