Photo courtesy: Temsükaba

Lockdown ajanga tzümartem talisa ku mejeper ajak amai Mokokchung toktsür pei limai omaogo. Parnok or iba mapaji shirnoki inyaktsü ta alidang, liso lanur ishikati ku mejepba mapa inyaktsü jangraba ngua nübur aikati jangratema aser nükshia bilemba den parnok service agia arur. Item rongnung Mokokchung yimer Anangmen Sector nung alir arishi küm 24 tain Sp. Sayumongba yaa ka asütsü.

              Pai taoba mapanga ku mejepa aru saka tang amai toklanga (full time) bo meinyak. Saka Lockdown sülen ku mejepba mapa ya toklanga inyaker aser meranga dang inyakra yangi sen jangratema aahteter aser ibai mapa tajung ka lir, ta pai kuli agütsü.

              Pai ku mejeptsü jangrabaji talisa Mokokchung nung alir liso nisung kati iba mapa inyakba ngua pa tejangraba angu, ta pai ashi. “Ni iba mapa ya jangrajangra inyaker, kechiyong ni inyakba mapa nung nüburtemi temulung asür aser parnok pelaba angudang nia kanga pelar”, ta pai ashi.

              “Kechi mapa südir süaka Tsüngrem mamatoki nentaka inyakra yangji temoatsü lir. Tanü lanurtem aika sempetbo lir saka lenmang mashilen jajartem lir, anungji, tangar/tsürabur dak dang metaloka melii nai kechi akoker ibajibo inyaktsüla aser nentaka inyakerbo yangji temoatsü lir”, ta pai lanurtem nem tayongzükba o ka lemsatep.

              Pai tarutsü nung inyaka aotsüba pa mangdang lemsatepdang, “Yasür ku mejepba dokan ka lapoktsü tejangraba lir”, ta ashi.

              Pa ya ku mejeptsü training-a kecha magi, saka tangar mejepba ngur pa sasa angazüka inyakba nübu ka lir.  Pai tangji par kidanga mejeptsür aser tangalena mejepa senzür. Pai ku kanga junga mejeper aser tzümar den sen tajemba agir. Ku mejepnürtemi pa ya anepdang 9:00 nungi nikong 4:00 ako tashi nung iba mobile number – 8837315833 ajanga tongtettsü.