Nokpu/Saring Village Council yimsüsürtemi ‘Liagmen’ apu yanglushia liasü, ta osang ajanga metetdaktsü. Iba apu ya Saring yim aser artsü anasa aliba yimtem atema tongtibang taküm lenmang lir, ta angazüker.

            Yaküm July ita iba apu khen yanglushiba sülen khena meyanglui aru, joko iba apu kanga mejungi raksaa aoba ngua July 18 Honibar nüto yimsüsürtem nübutoka yanglushia amung, ta osang ajanga ashi.

            Nokpu Village Council chairman, Lanuchujang Walling den phone ajanga jembidang, iba apu ya artsü anasa aliba yimtsüngtem atema tongti lenmang lir, ta ashi.

            Lockdown aser Covid-19 wara timtem ajanga iba tesem nung alirtem nungdakba chiyungtsü alitsü dena Assam leni senzüsenpongtsü mesademi timatemer aser onok atema iba apu ya taküm lenmang lir, ta paisa shisem.

            Iba apu atema ya 2018 nungi state government aser concerned department dang maneni nenshia arudar, saka tanü tashi kecha inyaka maka, ta village council chairman-isa ashi.

            Yanglushiba mapa ya khen atema dang, anungji, gari tulubo mejajatettsü, ta ashi. Saring nung ya police outpost ka lir aser IR Bn. section ka lir, anungji, security personnel-tem gari tulu senzütsübajia aiben nungdak adoker, saka apu majungba agi gari tulutem mejajateter, ta paisa timtem ajuruba kar lemsatep.      

            Council chairman-isa iba tebilemtsü atema ya concerned administrative officer (Longchem EAC) dang iba apu ajanga gari tulu mejajadaktsütsü atema tenoktangba agütsütsüla ta tebilemba shidangogo, ta angazüker.   

Saring yim ya Assam artsü anasa lir aser mapang shia artsü dak sentakba nung tebilemtsü/timtem ajurua arur. Taoba hopta nungto tia junga keno tulu maodangashi artsü anasa timtem kar ajangshia liasü.

Photo courtesy: Nokpu Village Council