~Lanu Atsongchanger

Kodang lanuwa bilemteter,
Tsüraburi nenok alima tensa tajung nung alir ta shia aru.
Aji shisadangdang tsürabur shisa tatongi ashibaji shidak liasü.
Adangji lanuwa tensaji alima tajung liasü.

Kechiba ozü putu tajung ta ashir,
Oda tang ama alima ajunga tongtonglatsü atutsüsa,
Aser shisabulutsüsa mesen aser wara majuruka.
Yongji putu tajung ta jembia arur.

Oh! tanü reprangangjo, asen tenu nungertem,
Talisa asen chirtem, ya koda asütsü!
Iba putu ya kechi nung tempangtsü, nibo meshiteter?
Covid – 19 ya kechi ali meimchir atema atakatem?

Asen putui asen chirnur atema ya tashianga aazüka yutsür no?
Kima yimdong nung mesenzütettsüsa,
Shisaliok wadang nunga menokdaktettsüsa,
Alima tepur tajung mereprangtettsüsa aazüktettsü no?

Asen chirtem, parnok shisa lanu, temulungjang teindang,
Pari kechi tai inyakba iba Covid-19 ya poktetdaktsü?
Ya shiba tai asütsü? Shir putu dak tongloktsütsü?
Oh! tanü asen putui khen aroka shisadangtsü lir masü no?

Joko ya Tsüngremer terasaba asen dangi arur asü?
Asen putui Tsüngrem dang kokoa tatok meshitsü ali masü no?
Asenbo jangratema liogo asen chirnur nem kechi ajangzüka yutsür?
Tsüngrem jak bushitsü mapitetter no?

Iba Covid – 19 den raratsü sorkari nebur nem teyari balala agütsür,
Iba yagi Tsüngrem terasaba anendaktsütettima?
Tsüngrem O-i ashir, “Hau, anüng nung tzü ozüi pei tatazük mapang
meteter saka kü neburi KIBUBA temalaba ozüng memetetter”

Adangji ya asen putui khen shisadangdi,
Asen chirnur nem kechi ajangzüka yutsütsü,
Asen temoatsü ma nung chirnur jangratema lidaktsütsü
Oh, azenket putu nung alirtemi Tsüngrem jak khen bushidi.