Youth Association Marepkong (YAM) nungi an metsütsü atema teyari angur par pungu den sponsor kibong Mr&Mrs (Dr) Bendangonen densema noksa nung angur. Mokokchung, August 15, 2020

‘Facilitating Self-Sufficiency Program – 2020’ omen nung ajemdaker Youth Association Marepkong (YAM)-i ayongzüka ‘Award of Poultry Beneficiary’ ta sür sentong tongmelang ka Aug 15 nü Marepkong Community hall nung kaogo.

              YAM-i lanur parnok pungu (5) shimteta an metsütsü atema teyari agütsü. Iba teyariji Mr & Mrs (Dr) Bendangonen aser par kibongi sponsor asü. Par kibongi item lanur 5 nemji an metsütsü atema hopta ana training agütsüba den an chanu, an metsüdang amshiba osettsüset, an chanu nem chidaktsüba chiyungtsütem aser ano tanga kar densema agütsüogo.

              Tanü Naga nunger teyaritep maliba den pei kisüng atema dang bilema inyakba ajanga lenmang aisü nung asenoki tangar memeneper aser takok munguteter, anungji, nisung ka ajungkettsütsübaji kati ka yariteptsüla aser nungitteptsü nungdaker, ta sponsor asür Bendangonen-i inyakdaktsünüba o ka metetdaktsü. Meranga inyaker Tsüngremer senmangtem amangtsü asoshi paisa lanurtem ajungshia liasü. 

Kiyong nung mapa mungui alir lanurtem aika küma aoba ngua iba mapatong ya tenzüker aser iba ya YAM nükjidong nunga lir. Ano tarutsü nunga ibala mesükba mapa balala inyakyonga aotsü tebilemba aika lir, ta YAM ketdangsürtemi metetdaktsü.

              Iba mapatong asangsang tenzüka otettsüsa Bendangonen’er kibongi Marepkong lanur par 5 nem sponsor asüba asoshi YAM ketdangsürtemisa pelaba lemsatepa liasü.

               Sentong nung Marepkong Ward Chairman, Toshikaba aser YAM President, Bendangsünep natia o tatsütsü jembia liasü. Marepkong Baptist Church Pastor, S. Mar Aier den iba mapatong takok ngua aotsü asoshi temoatsü meshia sarasademtsü.