~ Wati Longchar, Serampore
Samaa aliba tanela anir aruba mapa, nütsüng züindakja arogo tasen tenzükja aotsübaji arogo tenyaba mapa tongtibang ka. Arogoi temang rangben tenyaba mapa inyakba ajanga nokdaktetdaktsütsüla. Lokti temenen, yimten yimsüsüri tashiyim agi inyakba anema tartsü o ashiba aser ochi nung noktakba, timtem, touchi nung yaritepba, asü lendong mapang teyaritep, taküm nung shisabulu (crisis) aliba mapang counselling agütsüba, Covid-19 mapang ama tsürabur aser tanur pilar shisabulua alidang, arogopur social discrimination ajurudang, tashiyim mapa ajanga, mesüra tamakok, lendong ajanga, balaluyu mapang nisung aika Covid-19 mapang amai koda masüba taküm lendong (trauma) ajurudang arogoi tanebtsüba mapa ajanga yaritsü Tsüngremi arogo jatet. Children, youth, tetsür, tebur asoshi tanela nung ainba sendong balala yanglua yaritepbaji kanga tongtibang tenzükba mapa. Item denji ano repsema mapa malirtem, tat. agi Covid-19 mapang meyipa arurtem, lanur zünger mapa malirtem asoshi tapet mapa tenzüka training agütsüba aser teyari agütsüba yaa tongtibang mapa ka ta bilemer.
Arogoi rongsen bushiba mapa inyakbaji tai ta angateta lir, saka iba tangatetba ya tai ta Covid19 wara mapang asenoki ajangshia aruogo. Temalen ashiba ama, lanurtem aika pei limai meyipa aruogo, ano Nagaland nung lanur aika zünger mapa mangu lir, parnok asoshi pei sasa inyakteta alitsü rongsen bushiba lenmang nung arogo shilem kar. Tangar ka ashiokja, tajangzük arishia, kelakkeponga aser ochimeshii rongsen arishibaji temenen, ibaji Laishibai aitsür aser arogoia aji tai ta sayutsüla. Saka ochi nung, tangara yaritsü, ajangzükdaktsütsü, aser teinyakera teyari ngutettsü asoshi ochi aser teyaritep nung rongsenren bushiba lenmang Tsüngremi aginer aser idakji arogoi shilem agitsü Covid-19i akhanger.
Covid-19 lockdown ya takar aser Govt. mapa inyaker, shirnok ita sen tulu agir, parnok atema shisabulu aikabo mali. Parnokbo takaba akümer, aser mapa meinyaki dang ita sen angur. Ashiba agi Covid-19 mapang world richest-tem 12% rongsen renloka aküm, saka sensaker 11% ajema aküm ta ashir. India nung GDP 23.9% first quarter June tashi nung ajema aküm saka Lockdown mapang India nunger takatiba Mukesh Ambani alima nung takar rongnung punguba jenjangi atu aser pa rongsen US $ 69.1 billion dang aliba ita trok tsüngda US & 75.1 billion aküm. Mozü aser temang anema aliba lenmang, telecom company, online nung oset ayokba company noklang nung noklang amai tajangzük angu ta ashir. Doctor karbo Covid-19 wara tenüng nung human organ ayokba osang aika lir. Private hospital aika takar akümba osang azünger. Anungji takartembo mapang tatsüka tsüngda nung nokdaktettsü, saka sensakerbo, talisa hajirawala, ita sen tila agir, küm aika nungang nokdaktettsü. Returnee shirnok mapa mali parnok atema khuret tulu lir. Lanur asoshi taküm nung tezüdang tulutibaji zünger tapet mapa makaba yaa ka lir. Anti-social – aour, rakzükraktemer tali adoktsü. Tepok tazüngi aoyatsübasa. Missionary mapa tanga bendang lima oa inyaktsü aliba dang nungi, asen atepdang teinyaktsü teimba lir ta Covid-19i jungkai adoktsür. Yongji asen nübur asoshi arogoi new normal tenyaba mapa kar, talisa rongsenren bushiba nung inyaktsü nungdaker ta ajiteter.
Anogo ishika süogo, MTBAi tenyaba mapa tasen ka inyakba Ao Milen azüngdang ngua kanga pelaogo. “MTBA Youth Department asoshi otsüsütsü anogo ka süteta, Fellowship 10 nungi lanur 40 nem an metsüba farm tenzükdaktsütsü nükjidong an techanu den an jang agüja liasü…. An techanu aser an jang den külemi teyari angurtem nem training agütsütsü….” (Aug. 19, 2020). Nia 1990s nung an farm tenzükdangogo. Jangratemtsüka dang. Yimlar arogo aser nüburtemi parnok 40ji yaria nokdaktetdaktsü nungbo lanur 40 mapa ngutetdaktsüogo aser iba jagi Naga lima rongsen lenmang bushiba nung renlokdaktsüogo. Hauni, putu aika arogo asoshi ibala mapaji “not normal”, arogo mapa masü ta bilema aruogo aser ano karibo bilemtsüa akok, saka Covid-19i asen nübur meyipa anir arurtem, lanur mapa malir nem mapa ngutettsü lenmang tuyuang, aser asen nübur tzüma lima nung aosu yur teli ta jangja janga dang sayur. Rongsen renloka odaktsütsü asoshi ochishia, meranga, yaritepa inyaktsü Tsüngrem O tesayuba den arogoi akok tashi songjen ajongtsü asoshi nungitteptsübaji kanga tongtibang ta ajiteter aser ibaji arogo tenyaba mapa tongtibang ka ta angtetdi. MTBAi dang masü jila nung aliba arogotem DABA, KABA ama, aser Mungdangi lanurtem nem skill training agütsüba, aser tanga limaia training yokba; ibala mapa tasenji arogoi new normal tenyaba mapa tenzüktsüla. Süra arogoi tanela chiyungtsü dang masü, saka shi temang chiyungtsüa peria agütsütettsü. Tanela aser shi temang nüngdak liromedema nokdaktetdaktsütsüla.
Asen lima ali temo, tzü-mopung tajung aser meranga inyaker aluyimer aika lir asü nungji inyaktettsü aser adoktettsü. Mapang ka nung süngmok (ginger) aika züsentet, saka aika shizüka indok; ano süngjanglijang naring, chiro, liso, polong amala aika züsentet, saka meyoktet. Aluyimer tezüdang alu. Asenoki teinyaktsü ka meinyakbaji food preservation trainingi meyoki farm ya tenzüker. Taküm Khiphri len apple aika atang, Longkhüm nung pingkana aika züsentet saka aika meyoktet. Asen lima nung tang nüngdakbaji food preservation, packaging, aser market network ya lir. Ya kijai meinyaktet. Govermenti yaritsü tim. Mungdang aser arogoia yaritsü tim. Arogoi temoatsü agütsür akokba lenmang nung nungita yaria lanur kari tumulung ulua inyak nungbo nüburtem atema tajangzük tulu asütsü aser lanur aika mapa ngutet. Ibala mapa nungji arogo sen aika indoktsü menüngdaker, saka arogoi ajungshia aser achaayanga marketing network platform kümtettsü nung lanurtemi inyaktsü aser aluyimer aika teyari angutetsü! Aluyimba dang masü, ango, ak, an, shiruru balala metsüba ajanga rongsen renloker. Ibala tenyaba mapa tasen inyakba ajanga arogo dang masü, Naga lima, India lima ajonga rongsen bushiba nung renloka kümdaktsür. Arogoi Tsüngrem O aiben ashir sür nung, lokti nung temelenshi aikabo mali aser ashi-kelaker, aour aser rakzükraktemer aika adokjen adokba ya arogoi rongsenren renlokba mapa nung tim shilem magiba agia lir ta angatettsüla.
Arogoi yaria tenzükdaktsüba food preservation factory tila ka ni Hong Kong nung angu. Kiburlaji amitsür, degree kecha mali, food preservation hopta ka dang training agiba. La raw materialji naring (orange), tasen (lemon) aser jemben (pomelon) (mongsen nung nasü ta ajar) teküp, tou, süngküp, tera, kongsang tilala, mopung aondang tejang titlala tsükbatem, bendenba nung sen aika meindoker, saka item jagi lai jam, pickle, tea aser mouth refresher aika yangluba angu. Lai yanglubatemji airport, super market aser foreign country tashi nung ngua kanga süngmang. Nisung kari tobur jung junga packaging sütsür aser kari yoktsür ta nisung aika dang mapa nguteta inyakba angu. Asen lima arem nung anguba süngjanglijangtemia sünga yamaji chiyungtsü aika yanglutet. Iba ama training tapet arogoi Govt. den sendaktepa achaayangtsüla aser nüburtemi sadem sadema inyaktettsü atema inter-state, country balala den tesendaktep Govti yanglutsütsüla aser chiyungtsü melala mela bener oli aruli ta senzütettsüsa lenmang tajung yanglutsütsüla, aji Govt. mapa. Nüburi aji akhangtsüla.
Yimya mesübaba agi alitsü südi, asen nüburi/arogoi lanurtem asoshi `long term’ maparen nung onsarabo meyarir aser lenmang mesayuteper. School nunga pei inyakteta alitsüba maparen ya junga mesayur amai. Arogo nunga tamburtem karibo musical instrument teperi alitsüogoto, aji tagi dang teperi ta bilemba ajangshia aruogo. Ashiba ama tenlaki tejenbato junger sür nung, bendoker tenlaki tuluba, tajungba yangluba nung rongsen crore aika melalui, lanurtem nokdaktetdaktsüba maparen aser training balalai yok nungbo aser chiyungtsü preservation, packaging atema machine alitsü nungbo koda jungla. Sen croresa crore tenlaki asüba nung mendoki arogoi, yimden dena teka amteper JCB ana-asem mesüra aluyimba machine yimtsüng shiai nung alir foothill nung agriculture, horticulture, fishry amala terenlok mapa nung indok nungbo, aser foot hill nung tangar aika arua anisüngzüka kazünütsüsa yim küma lua ali nungbo lanurtem mapa asoshi shisabu makala, cityi oa ala-ashia melila ta bilemer. MTBAi tenzükba mapa amaji arogo shiai new normal tenyaba mapa kakabosa tenzük nung asen lima temelenshi tulu adoktsü.
The Nokinketer 