ABAM-WM ASOSHI TAYONGZÜKBA KA
~Wati Longchar, Serampore
Arogo otsü nung tetsürtemi arogo rongsen ketdangsüba nung shilem tulu agiba otsü aika dang lir. Tetsürtemi anir lokti aser arogo tejakleni odaktsütsü atema mapa kar yangi tatishitsü shiner:
Fellowship of International Least Coins (FILC) ya India tsür Santi Solomon mangdang ajanga 1956 tenzük aser ibai tanü tashi tetsürtemi achaayanga arur. Mezüngbo temulunger ishikati dang tenzükba tanübo country 170 nung iba telok tenteta lir. Parnoki sen aika agütsütsü majungshir. Paika ya sarutet ta (total) sayuba dak alaka tagütsür tenüng magütsür. Temulunger tetsürtemi ita shia coin kaka-anana bendenba, mesüra küm nung tetsür telungjem sentep nung ken temulunger tenla saruba ajanga iba telok kanga tashi ita tanü tashi aor. Iba sarutetba ajanga tetsürtem aika nem scholarship agütsür, training balala, natural disaster mapang teyari, victims of rape pur nem teyari, single mother aser mapa makar pei sasa noktakba mapa balala nung teyari aika agütsür. Taküm May ita Amphan cyclone-i West Bengal nung teraksa tulu adoktsüba mapang parnoki teyari tulu agütsü.
Meghalaya aser Mizoram nung tekabojang (handful of rice) saru ta sür kanga junga aser tashi ita aor. Asen lima nunga kenbo tenzük aser iba yokzüngba sen ajanga Arunachal nung core aika indoka missionary yariba, ETC, CTC ama nung tetsür hotel yangluttsüba angur. Mizo Presbyterian arogo nung tetsür teloki mission church (tenlaki) 1910 küm asüdang mapa inyaker nem sorochioka agütsütsü atema jang tekabo kaka tamanger kibong shia nungi saru. Tenlaki süzüker külena ano maneni sarutsü lemtet aser 1913 nungi “Bible women” tetezü tetsür evangelist ka shimer jang yokzükba sen jagi ita sen agütsür ayu. Tesülen yimtsüng aika nung iba sen jagi school lapoka tesayur ita sen, drug achir anebaluba, zutsüra (leprosy), HIV & AIDS agi shiranger anebaluba aser ketdangsür ita sen agütsür; aser tenlaki, school ki yangluba nung teyari agüja aru ta ashir. Tekabojang 2000-2010 küm tsüngda yokzükbaji Rs. 492,768,404 ta ashi. 2019-2020 financial year (April, 2019-March, 2020) nung tekabojang yokzükba ajak agi Rs. 18,91,24,196.00 ta ashi (iba ya arogo general sarutetba maten). Iba yokzükba sen yagi missionary aika ita sen, school tesayur, hospital nung doctor/nurse itasen, pastor’s pension, arogo nung toklang tenzüker hospital expenses amala nung teyari agütsür ta ashi.
Kasaji Mizo Baptist – Baptist Church of Mizoram-i (BCM) inyakar. BCM züngsem ya ABAM dang nungi 2,624 agi dang teimba. BCM tetsür telokia tekabojang (Buhfaitham ta par oshi nung ajar) 75% bendenba (25% local arogo ketdangsüba mapa nung amshitsü ayur) saka ABAM general aser mission na meyoktepera sünga parnok tekabojang yokzükba tiemba angur. Iba Buhfaitham ya tetsürtemi 1915 yimtsüng 5 nung kibong ishikati timtemer yaritsü nükjidong nung tenzük. Tetenzükdangbo tetsürtem jang sarui aodang mamangertemi azümasen yimsü amangertem ta, meshimetsür telok ta atalaa lung agi aon ta ashir. Saka nübur rongnung tamanger-mamanger ta mebendangi, tetsürtemi iba jang yimtak yimtsüng nung maka-maiteter, tantsür-tambur aser shilu-manemer nem lema agütsü. Lia lia arudang, ibai lungjemer timtemer yariba mapa tajung ka ta nüburtemi angateta yimtsüng aikati ajizüka ao; yimtsüng kar nungbo mamangertemi iba saru agütsü ta ashi. Tesülen, iba teyokzükba jagi tetsür evangelist ka Rs. 5/- den, jang-a tera agütsür ayu. 1947 nung jang yokzükba jagi First Nursery School Mizoram nung lapok ta ashi, 1960 küm yokzükba sen ajak agi Rs. 10,499/- dang liasü. 1972 nungi iba sen bendang lima mission mapa asoshi amshitsü lemtet. 2000-2010 küm tsüngda nungbo teyokzükba sen ajak agi Rs. 119,015,326 aküm. Mizoram nung Baptistiba yongsük ajak agi 1,22,070 dang, saka tekabojang 2019-2020 financial year (April, 2019-March, 2020) yokzükba sen ajak agi Rs. 8,53,67,328 (arogo general sarutetba maten aser 25%-bo local arogo mapa balala achaayangtsü maten) ta ashir aser iba sen ajanga missionary 1001 bendang lima yaridar ta ashi. Asenoki BCM den kodang medemdangdir, 2019 küm Aor baptiba züngsem ajak agi 1,19,446 aser kibong ajak agi 45,188, saka ABAM general sen sarutetba ajak agi Rs. 5,41,68,074 aser mission mapa atema tenlaba sen ajak agi Rs. 2,66,57,022 ( meyokteper Rs. 8,08,25,096) tetezü BCM nung tetsürtemi tekabojang yokzüba ABAMi madoksa. 1915 küm nungi tanü tashi takok ngua inyakbaji “Christian Giving” tejangja sayuba ajanga ta ashi. Tambur kati yamai langzü, “Ozü ki takdang trok, gari ana, TV, aben-süoshi, osettsü aika, item ajak ya Tsüngremi moatsüba lir. Ki ajonga nung jangbong anasa melok tila kaji dang Tsüngrem meyong. Ken kenbo Tsüngrem dang ni kanga akha bilemer, saka iba jangbong melok tila ka nungji chi soroba shia tekabo kaka jang inoktsüba jagi ozü kibong kecha timtem mali, saka iba yagi mission mapa nung ozü kibongia shilem tila ka agidar ta sayuba temaitsü.” “Jangbong tila ka tangar yaritsü atema ayubaji konang ka aser Mizo nunger sobaliba amai” aküm ta ashi. “Deobar shia jang tabeni arubang temoatsü meshia sarasademtsür aor” ta ashi. Mizo nungertemi tekabojang bendentsü atema molok tila ka ayuba (tanü asüngbo jila nung alir jang melen sen juli (charity box amai) ayur aser iba jagi khuret amai mebilemer, saka tamanger ka teinyaktsü ta angateta ajaki mulungsoa ayur ta ashi. Tsüngremi mulungsoa aser ochi tenla meimer; aser iba nungji temoatsü alir. Anungji Laishiba memelaba rongsen tenlatsü majungshir, tat.agi., yi ayoker kidangbo tekabo jangbong mayor aser sena memeshir. Tekabo janga saru ta asüba ya tila-tiri mapa ka amai, saka Tsüngrem sayatenya mapa amai, kibongtem nem khuret kecha magütsüi dang, küm songtema arudangbo rongsen aika kümer atar ta ashi. Jila balala nung Kolkata, Delhi amala nung aliria karibo sen bener yoker ta ashi. Tzüah! ta bilema anga.
Ano Germany nung Christian Education Fund ta sür tenzüka lir. German nunger South India nung missionary kibong kati, India nunger sen makaba agi school nung tanur, talisa tetsürtem, aika mezüngtetba aser school toktsüba angu. Missionarybar kibong 1959 küm Advent Christmas mapang Germany oshia ata, aser nübur aikati lalushiponga chia-ajemba ngua. Missionarybar kibongi hoi yamai rongsen mashii chia-ajemba nung melaluli India nung sensaker chirtem atema school fee agütsütsü tenla agüjangkoto ta ajungshi. Yamaji, Germany ajak nung masü, saka Kassel area (Mokokchung district dang tilaba asütsü, nütsünga kanga agi tajemba) nung Advent Christmas mapang khen tenla sarubatsüba ajanga tanü tashi scholarship agüja arur. Tanü sensaker student 2500 nem scholarship India, Indonesia, Kyrgyzstan, Brazil, and African countries nung agütsür. India nunga theological college trok (Eastern Theological College, Jorhat-a yangji tena lir), aser arogoi lapokba school 5 nem scholarship agütsür. Nia iba scholarship angu, aser Aor/Naga nunger Laishir aika tanü tashi teyari ngua arudagi.
Mezüng Ao arogo lenirtemi tekabojang bendenba ya ajungtsü ta asateta kenbo inyakdangba angur. Tesayur Noksanglai arogotsür rongsen lenmang bushiba indang yamai zülua angur, “Mezüngbuba tetsür teloki yimtsüng arogo sen lenmang asoshi jang tekabo ka chi soroba shia agiteta ayuba agi sen kümer yimtsüng nung tenüngdaktsü akaba purtem yari”. Yamaji süngjang-lijang, an, nübuyok aser ola-angla mapa balala ajanga arogo rongsen renloka kümdaktsü. Küm shia mapa balala inyak nung tapetba asütsü ta bilema iba mapa tajung anentsüsa aküm südi. Saka iba putu arogotsürtemi iba rongsen ajanga mapa tajung aika inyakba angur. Anungji Mizoram nung 1910 küm nungi tanen makai dang tekabojang ayuba amai, ABAM-i tenyaba mapa nung shilem tuluba inyaktettsü atema “Growing Together in Solidarity” (“Külem Teyaritep Asoshi” or “Ammalitep Melok” or “Ammalitep Senbong” ta sür nükjidong pezü yur tenzükshi nung ajongtsü: (a) Tetsür leadership development atema aser tarutsü asen ajalatem jenjang tajungba tongtetdaktsütsü; (b) ABAMi Medical College ka lapoktsü; (c) Timtimer arogo aser nübur yariteptsü; and (d) Nagaland, India aser international telok balala den Tsüngrem wadang ulushia tesendaktep nung aotsü.
Tetsür leadership development atema aser tarutsü asen ajalatem jenjang tajungba tongtetdaktsütsü – Ao arogotem nung leadership nung mainba kaji teinyakdak mapang shisatsü bushilokba (in- service training) facility makaba yaa ka lir. Tanü Aotsür theology zünger Asso. Pastor dak alaka tanga teinyaktsü lenmang aika sadema mangur, parnok in-service training nungdak, international organization balala den ministry exchange (ita 1 nungi küm 1 tsüngda tashi) nungdak, community terenlok mapa balala (both within India and Foreign) inyaker angazüktsü nungdak, national and international seminar balala nung tentettsü lenmang bushitsüla. Yamaji süra, parnoki tasü itta arogo aser lokti nung shilem agitettsü aser arogopur aika ajangzüktsü. Parnoki Tsüngrem Oa tarokba sayutettsü. Iba den lanurtem aser tetsürtem rongsen bushiba lenmang balala nung yariteptsü asoshi tapet training aika nungdak, talisa skill-oriented training nungdak, sensaker shirnok züngner, saka teyari mali ta aliba pur nem scholarship, book grant, tuition fee agütsütsü aser ajungmesotsü asoshi award balala agütsütsü nungdaker, aser kokra tetsürtem mapa balalai yoktsü national aser international telok balala den tesentaktep yanglua teyaritep lenmang bushitsü nungdak. Ano toklang tenzüker koda masüba lendong ajurudang, hospital nung operation tulu agitsüsa akümdang teyaritep nungdak.
ABAMi Medical College ka lapoktsü – Iba dak sendakba nung ni ocet ka “Covid-19-i Arogo Budget Ashishir” ta sür züluogo. Arogoi temang anema aliba maparen temulung magütsüi lir. Amrican Baptist missionarytemi hospital lapoka yutsüba dak alaka, asenoki tajungba küma meinyakteti lir. Asen lima Hospital and Medical college maliba ajanga asen nübur rongsen jenti tanga lima nung indoker. Tanü rongdakba tongtibang kaji Medical College & Hospital ka nungdak lir.
Mungdang ka kübok, saka yimtsüng arogo aser jila nung alir toklang tenzüker ita sen liro memedem. Pastor, Asso. Pastor, Youth aser Children ministry nung inyaker aika secular degree den BD/MDiv zünger ita sen `poverty line’ nung yuja lir. Tanü India nung taliba jenjang asadangba nung nisung ka ita nung Rs. 3,705 (kibong nung kinungtsü aser tanur maten) chiyungtsü alitsü nungdak ta ashir (Ibai mozü, aben-süoshi aser tanga oset-tsüset aliba, medical insurance maten). Iba senji mungutetra pa/laji poverty nung alir ta ashir. Arogotemi mangatetba ajanga, arogo nung tenzüker taa junga magütsüi toklang tenzüker aika timtema aliba angur. Tanü tashi ABAM kübok Asso. Pastor Rs. 5000/- tekübok angur parnok 6 lir; Rs. 10,000 aser tekübok angur nisung 27; Rs. 15,000 aser tekübok angurtem nisung 28; Rs. 20,000 aser tekübok angur nisung 15. Rs. 40,000 tema angur nisung 2 dang. Local arogo 17 nungbo tanü tashi tetsür teloki dang ita sena agütsür. Ano Pastortem ita sen repdangdangra kangsa majung: Tanü tashi Pastor 9, Rs. 10,000 aser teküpok angur; 15,000 aser tekübok angur 39; 20,000 aser tekübok angur 38; 25,000 aser tekübok angur 26; aser 40 tema angur 23 dang lir. Tetezü, pastor aser tesayula aika Government nung, fresh graduate teacher itasen tashi angurbo ishika dang, tiemba ka fourth grade dang tamajungba ita sen angur. Pei pastor nem ita sen junga magütsüi yur, Ao arogo missionary sending church ta ajatsüba maksü. Ya melenshitsüla. Liro medema aser ita sen tajungba agütsütsü lenmang bushitsüla.
Nagaland, India aser international telok balala den Tsüngremer wadang ulushia tesendaktep nung aotsü ABAM international ministry tenzükogo. Missionary aika arogoi yaria tanga lima nung missionary inyakdaki. Ano international aser national organizations balala nung sempet aketer lanur tajung yoka inyakdaktsütsü rongsen dang lirbo lenmang aika lir. Tarutsü lanur asoshi ibala lenmang bushitsü nüngdaker.
Anungji iba “Growing Together in Solidarity” ta sür Mungdangi mission mapa tali inyaktettsü aser yimtsüng arogotem shirnok timtema lir parnok yaritsü asoshi ABAMi tetsür department nem nunglokja temulunger arogotem nung member shikati dang süaka tenzük nung, lanur aika ajangzüktsü aser lokti nung temelenshi aika bener arutsütsü.
Ibai mapa tasen ka asü nungji, tetenzük nung Ao Baptist arogotem sasep temulunger ajungmesoa tenzüktsü, saka tarutsü nung international nükla yur tenzük nung ajungtsü. Temalen shisemba ama, tetenzük nung aikati ratatsü, saka Tsüngrem asen den tenra takok angutsü. Asenoki meranga inyakra küm ishika tsüngda nung Baptist arogotem regional aser international level tashi aotsȕ akok, tat. agi, American Baptist Churches women groups, Myanmar Baptist Convention kübok mungdang aika lir, Philippine Baptist Convention kübok ano aika. American Baptisti tentetba arogotem Asia, Africa aser South America alima den tanem tanemi tesendaktep yanglutsü. India nunga baptist associations, conventions balala aika lir aser Nagaland nunga kin balala den sendaktepa inyaktsü koka lir aser iba jagi amangba pur rongnung teyaritep, liromedem aser temeimtep aika bener arutsütsü. Iba amaji international level nung inyaktsü nükjidong yur inyak nung takok angutsü lenmang lir. Aor kibong 45,188 lir aser item rongnung kibong 10,000-15,000 agi danga iba nungi shilem agitsü mulungtet nungbo küm nung 1-2 crore-bosa (average Rs. 1000-2000) tenla arutsü aser iba yagi mission mapa tuluka inyaktettsü. Ni Asso. Pastor shisa tokden mapang logo aser tanga maparen kar lemsatepogo aser idakji ajemdaker mapa tenzüktsü shisadangdi ta ayongzüker.
The Nokinketer 