IMDH Mokokchung nung dialysis unit tenzüker küm ka ajungba sentong nung IMDH MS Dr. Medem den IMDH Chaplain R. Nchumthung Humtsoe aser dialysis unit nung inyakertem külemi tangokba noksa nung angur.

Dr. Imkongliba Memorial District Hospital Mokokchung nung yaküm 17th Sept, 2019 nü Dialysis Unit amenoker külen, taküm küm ka ajungba tenüng nung tenüngsang agütsüba sentong tongmelang ka 17th Sept, 2020 nü IMDH nung agiogo.

                Iba sentong IMDH Medical Superintendent, Dr. Medem-i mapang tatsüka agia jembidang, timtem jenti liaka, iba unit tenzüker külen nungi nodal officer Dr. Alem aser Dr. Kilang nati anir technician aser nurse-temi temulung agüja küm ka tashi tezü metangi kanga junga bener aoba asoshi parnok ajak nem tenüngsang agütsü.

                Yimya agi dialysis agirtemji koda masürtem ang arur aser parnok takümji kopika alitsü ashitsü makok, kenü mesüra khenbosa iba tashitak jagi asütsü, anungji, patient shirnoksa dialysis agitsü arudir parnok ajak den jungtepa aser temeim agi benshitsü asoshi paisa teinyakertem ajungshia liasü.

                Sentong nung Dr. Alem-ia mapang tatsüka jembidang, iba unit ya yaküm pungmang ka amai tenzük saka tanü küm ka ajunger aser IMDH asoshi iba unit ya kanga dang tongtibang ka kümogo. Küm ka tsüngda nung patient 28-i setting 400 dak tema agiogo, ano maneni tagidak pura lir, ta ashi. IMDH nung ya dialysis machine 4 lir aser kenü nung dialysis asem tashi agiteter aser Deobar dak alaka tanga anogo ajak nung lapoker, ta paisa shisem.

                Küm ka arudang tajitetba kar lemsatepdang, patient tangalen nungi arurtem tayipdak/amungdak maliba ajanga talisa sensakertem kanga tuashir, patient karbo hopta nung 3 ben tashi dialysis agirtema lir, anungji, parnok asoshi tayipdak facility nungdaker, ta ashi. Patient-temji Mokokchung nungi masü tanga district nungi teimba arur, anungji, kija/telok kari danga iba atema teyari lenmang kar lapoktsüra jenti pur tajangzük angutsü imlar, ta paisa shisem.

                Dialysis jenjang setting shia senpak 1200/- agir. Saka kanga sensaker (below poverty line)-tem dangbo sen magir aser Ayushman Bharat Yojana Card akartembo sen yang nung jagi katir. Dialysis agidang sen aruba nungi iba unit ya anepalur, ta osang ajanga angazüker.                 Iba sentong nung IMDH Chaplain, R. Nchumthung Humtsoe-i ‘tenüngsang agütsüba’ onük nung ajemdaker Tsüngrem o tulu den paisa temoatsü meshia sarasademtsü. (Source: Tir Yimyim)