Tsürabur dak dang ajak meimlai asenokia langkabosa inyaktsüla. Tsüngremi asenok ajak nem sempet balala moaja lir, anungji, item sempetji tamshi shia amshitsüla, ta Sb. Toshiaküm-i iba osangbener den jembidang lemsatep.
Arishi küm 23 tain Sb. Toshiaküm ya Süngratsü nunger Medical Ward (Majakong) nung alir Wb. N. Limatemjen’er jabaso lir. Pa Dimapur nung B.A 3rd Semester (Education Hons) azünger. Pa lockdown mapang college shibanga aliba agi tangji tsürabur kidang atua mungdar. Pa atemabo lockdown mapang ya sen aahtsü maongka tajung kümogo.
Lockdown tepiyong kiyonger aser tanga ward nungi dena pa dangi ku (hair) mejepi arur. Aji dang masü karibo kidangi temejepi ajar. Pai ku mejepba taah senpak 50/- dang agir aser tangaleni mejepi aobajia senpak 10/20 dang talila agir.
Pa ya training kecha magi pasasa dang angazük. Yaküm küm nungi pa tenu/teti nunger aser medemertem ku mejeptsüdang pai iba ya shizük aser tangbo pa atema iba ya part time sen ayangdak lenmang tajungtiba ka kümogo, ta pai pelaseta lemsatep.
“Lockdown mapang tsürabur den arua kazüdang, iba mapa inyakba yagi ni azüngmeyak masür, iba den külemi yangi sen aahba ajanga tilateri alitsübo tsürabur dang memeshir, ajak dang alia pei sasa meranga inyaker aahtetba nung tepela balaka lir”, ta pai iba osangbener den jembidang ashi.
“Ku mejeptsüba ya mapa kecha balaka tasak masü, training balaka menungdaker aser ibai ajaki inyaktetba mapa ka aser junga dang inyakerbo yangi sen aahtsü lenmang satema lir. Ya kisüng inyakba jagia tepok sünga litetba mapa ka. Yangi ngujem tulu lir sürnung asenok nisungi ibala mapa inyaktsü aaker, mapa inyaktsü maaktsüla”, ta pai ashi. “Koba mapa südir süaka, tejangraba den meranga inyakba aser taremzük lia inyaktsüla”, ta paisa shisem.
Nisung kari danga ku mejeptsü atema pa nübu nungdaka bushira, iba mobile number (7005281941) ajanga tongtettsü. Par ki ya Mokokchung Civil Hospital (IMDH) kübok Nurse Hostel /Medical Fellowship pastor quarter anasa to lir. (Source: Tir Yimyim)
The Nokinketer 