Dept of Industries & Commerce (GoN) ajanga achayangba Food Processing Cluster dak sentakba nung Changtongya town hall nung preview meeting ka akadang Advisor Imnatiba-i anir sorkar tongti ketdangsür aser shilem agirtem noksa nung angur.

Govt-i mapatong tapu balala bener aruaka yangji nüburtem teyaritep aser amalitep melira ajakji amajok asütsü, anungji, nüburtem nungi tenungitba nungdaker, ta Nagaland Industries & Commerce, Labour & Employment, Skill Development & Entrepreneur, Advisor & MLA Imnatiba-i metetdaktsü.

Pai iba o ya Sept 30, 2020 nü Changtongya Town hall nung Dept of Industries & Commerce-i achayangba food processing cluster mapatong dak sentakba nung telungjem senden ka aliba mapang ashi. Iba senden nung sorkar ketdangsürtem den Changtongya circle yimtsüng balala nungi meyongertem arua shilem agia liasü.   

              Iba food processing cluster ya department-i süoki ia agiba mapatong ka lir, anungji, ibai takok ngua aotsü asoshi nüburtem nungi amalitep aser tenungitba nungdaker, ta paisa ayongzüka ashi.

              Political lenir kati nübur taginüba ajak khenyongibo mataloktsütettsü, ibaji ataloktsüsaji lenmang teti dangbo sadema malir, kar ataloktsü akok aser karbo mataloktsü, aji saka, kenü pei bilemba mataloktsüdang tajung inyakba ajak raksaja lenir ka anema jakla malitsü asoshi paisa melenshidaktsünüba o ka ashi.

              Putu melenshia aoba den ongdang (gap) madokdaktsüi külemi lungjemer lirumedema aotsü merangtsü aser kechi mapa nung südir süaka pei tajungtiba agi shilem agitsü asoshi paisa ayongzüka liasü.

              Office ka amenoktsübaji mapa temela masü, aji oda, Nagaland Chief Minister-i anir külem cabinet minister-temi Changtongya town nung Sub-DIC amenoktsüsa maongka agütsüba asoshi parnok ajak dang pelaba, paisa shisem.

              Tanü iba senden nung NIDC Managing Director – P. Zuvito Waths Sema, Employment Skill Development & Entrepreneurship Director – Chiten Yaden, Industries & Commerce Director – K. Hokishe Assumi, Mokokchung DC – Limawabang Jamir, Commissioner & Secretary Industries & Commerce – Kekhrievor Kevichusa, Changtongya SDO (C) – Moakumzuk, Akhoya Village Council Chairman – Tiatemjen, Changtongya Village Council Chairman – Tiasunep Lkr, All Ward Union Changtongya Town Chairman – T. Meyi Longkumer parnokia o tatsütsü jembia liasü.    

              Tanep Commissioner & Secretary, Dept of Industries & Commerce (GoN), Kekhrievor Kevichusa-i Sub-DIC Changtongya Town office lapoktsü aser Changtongya town nungsa multipurpose hall tasen ka Industries & commerce Director K. Hokishe Assumi lapokja liasü.  

              Iba food processing project ya Liroyim nung amenoktsü aser iba atema ali 11.30 acre agüja lir aser iba mapa ya yakta tenzüktsü, ta osang ajanga angazüker.