Tuli Paper Mill (NPPCL) aser Sugar mill ya mangdang tulu yur tenzük saka tanü itemji tamakok aluogo, aji saka, teti dangbo mapang tamajungji malitsü, mapang tajungjia arutsü imlar, ta Advisor for Industries & Commerce, Labour and Skill & Entrepreneurship, Imnatiba-i teimla o ka metetdaktsü. Pai iba o ya Tuli Dobashi Court nung sorkar ketdangsürtem den Merangkong, Kangtsüng, Wameken putu yimsüsürtem aser mulungtet telok kar den telungjem senden ka Oct 1 nü amendang lemsatepa liasü.
Joko Tuli paper mill ya tanaben shilua marutettsüsa tatembang kati aruba osang angazüker, aji saka, Tuli area ya Nagaland nung Dimapur sülenbo tongtibang tesem tanabuba asütsü aser yangi ngujem tulu lir, iba tesem nung Govt-i meilongi mapatong balala inyakyonga aotsü sentong renema lir, anungji, ya kodang renloka odir, Tuli area nüburtemsa tajangzük tuluba angutsü, ta paisa teimla o ka shiogo.
Tuli paper mill shibangaka iba tesem nung Govt-i mapatong balala inyaktsü bilemdar, anungji, tarutsü nung terenlok maparen inyakba mapang timtem madoktsüsa Tuli paper mill ali temeket ajakji wazüka yudaktsünür, ta Advisor Imnatibaisa ali agütsür yim asem sanger dang inyakdaktsünüba o ka ashi. Sorkar li kwi lir, itemji wazüka ayutsü atema nenok nungi amalitep nungdaker, ta paisa shisem.
“Tuli nüburtemi mapang tajunga ajuruogo aser tang ya mapang tamajung ajuruba tensa lir”, aji saka, “teti dangbo yamai malitsü, mapang tajungjia arutsü imlar”, anungji, “tesüiba tamakok indang kangabo mejembili” saka iba nungji tatishitsü agir “tarutsü atema lungjemer inyakdi”, ta paisa Tuli area nüburtem tezü metangi alitsü asoshi tayongzükba o ka agütsü.
Paper mill tesem nung ya Industrial Training (IT) project kar tenzüktsü sentong lir aser ibaji taküm küm nungibo tenzüktsü asamayangdar, ta Department of Industries & Commerce (GoN), Director, K. Kokishi Assumi jembidang teinyaktsü kar lemsatep.
Nagaland Pulp & Paper Company Ltd (NPPCL) ya 1982 July nung tenzük saka tia maka küm 10 dang lirbo 1992 October ita nungi mapa meinyaki tanü tashi arudar. Iba mill atema Merangkong, Kangtsüng aser Wameken nungeri ali ajak senteper acre 700 küm 99 atema HPC Ltd. dang ayok. Iba mill ya mapa meinyaki joko küm 28 shi arur aser iba mill-ji tanaben shilua marutettsü südi ta arendaker, anungji, iba tesem nungji I & C department-i tanga project kar tenzüktsü amai osang angazüker.
Iba senden nung Industries & Commerce nungi ketdangsür kar den Tuli ADC Imsongmeren, yim asem; Merangkong, Kangtsüng aser Wameken nungi putu yimsüsürtem, Ao Kaketshir Mungdang (AKM) aser Langpangkong Kaketshir Mungdang (LKM) nungia ketdangpurtemi tebilemba balala lemsatepa liasü. Iba senden temer külen Advisor-ba den department ketdangsürtemi Tuli Paper Mill ali tasazük/temeket ajak repranga jaja.
The Nokinketer 