Minister, Tongpang Ozükümi Sungkomen Ward nung ku mejepdak dokan ‘Hairitage Salon’ lapoktsür külen, lanur sempet aketer Sb. Sayumongba aser Sb. Sentiwabang aser tangartem den külemi tangokba noksa nung angur. Mokokchung, October 30, 2020

Mokokchung town atema otsü asütsüsa Sungkomen Ward, Mokokchung nung ‘Hairitage Salon’ ta sür liso nisungtemi ku mejepdak dokan ka lapokogo. Iba salon ya PWD Mechanical & Housing Minister, Tongpang Ozüküm-i senotsü teyari agüja lapoktsü.

                Iba salon nung ya lanur sempet aketer Sungkomen Ward nung alir Mokokchung yimer Sb. Sayumongba aser Tongdentsüyong ward nung alir Mongsenyimti nunger Sb. Sentiwabang na amentsü.

                Oct 30 nü Minister, Tongpang Ozüküm-i iba salon lapokja jembidang, iba ya ‘livelihood program’ dak sentakba mapatong ka lir. Kasa mapatong kübok tawa to Alempang Ward nunga two wheeler taxi service ka tenzüktsüogo aser iba taxi service ji junga inyaka aoba angashia kanga pelar, yamaji iba salon ya-a takok ngua aotsü imlar, ta ashi.

                Coronavirus arua lockdown aliba ajanga asen lima nungi tzümartem ajak amai pei lima bushia ogo, iba mapang sempet aketer liso nisungtemi pei sasa apiteta mapa meranga inyakba nguogo, ta paisa pelaba olen ka lemsatep.

                “Tanü lapoker asüng shibangatokra, amajok tulu asütsü aser nükjidong mataloktsü, anungji, temulung agüja meranga inyaktsüla”, ta paisa lanurtem temulung atangtsü asoshi ayongzüka ashi.

                Coronavirus aruba ya asenok asoshi temoatsü ka ama mapa meranga inyaktsü yimdangi arudaktsür amai bilemer, aji oda, mapa inyaktsüba ya kecha taaktsü mali aser ku mejepba mapa ya tilateri ka masü, iba ya rongsenketzüng jenjang ajungketba mapatong ka lir, ta paisa mapa ajak sakuku bilema meranga inyaktsü ajungshia liasü.

                Iba salon ya Lenjem Hospital nungi tatsüka dang pilar AM Road anasa angutsü. Taküm küm asoshibo Minister Tongpangi dokan para (house rent) ajunga agütsütsü. Lanur Sentiwabang aser Sayumongba tena tashikang metentet tashi Sungkomen Unit (24 Angetyongpang A/C Independent party)-i reprangtsü, ta angazüker.

                Sungkomen ward yimden Chairman, Wb. Limanungsang aser 24 Angetyongpang Assembly Constituency, Independent Party, President, Wb. Nungshimangyang aser ano tangar karia shilem agia liasü. Sungkomen Baptist Arogo Pastor-i iba ‘hairitage salon’ meshiteta sarasademtsü. 

(Source: Tir Yimyim)