Nagaland higher and technical education & tribal affairs minister, Wb. Temjen Imna Along-i RD Minister Wb. Metsübo Jamir meyonga arur Nov 10, 2020 nü Ao Senden Kilem ki tatentep floor 1 nungi floor 3 lapoktsüogo aser iba kiji Ao Baptist Arogo Mungdang (ABAM) tir Pastor, Rev. Temsu S-i meshitettsü.
Temjen Imna Alongi iba sentong nung jembidang, par külem minister Metsübo Jamir par kibong nung ajungben timtem kar ajuruba den minister Tongpang Ozüküm temang majungba ajanga tena iba sentong nung medentet, anungji, parnoki marutetba atema tesasaba o shiokba lemsatepa liasü.
Ao Senden ketdangpur den iba ki achayanga asürtemi ki tobur junga renemtetbaji konang tulu aser ibai Aor ajak atema lir, ta pelaba o ka ashi. Iba den ano ali tenlar Mokokchung yim Kichu kidong danga paisa pelaba lemsatepa liasü.
Corona wara nungi kümdanga lidaktsünüba o ka ashidang, nisung aikati iba wara ya züzüa dang agir aser pei dakbo kodanga matongtsü amai bilemer, saka ibai süoki ia agitsüla aser iba nungi jenbua alitsü asoshi teinyaktsü kechisa lir, itemji kanga junga benshitsü asoshi mepishia metetdaktsü.
Corona wara aruba ajanga Nagaland dang masü India aser alima ajunga nung rongsenkettsüng takoksa tulu ajuruogo aser iba ajanga sorkar sentsüh tulu tsüloker odar, anungji, joko asenok ajak kümdanga alitsüba mapang ka lir, ta paisa ashi.
Iba ama mapang ka nung asenoki aluyimba maparen nung temulung agütsütsüla aser tangar dak nendaka melii pei sasa meranga inyaker taküm metitemi lia otettsü lenmang bushitsüla, kechiyong tangar dak nendaka ali tashi asenok kodanga tejakleni maotsü, ta paisa shisem.
Pai Naga political solution dak sentakba nung onük kar shipoka jembidang, tanga kini asenok dak rangloker, anungji, tang ama mapang ka nung tapi agi telemtetba magitsüla saka süngjema kanga junga bilemdanger dang telemtetba agitsüla aser telungjem nung asen kin tenoktakdakji tejangja asütsüla, ta ashi.
Centre nung BJP-i aniba NDA sorkari Naga nunger political solution ji latettsütsü asoshi meranga inyakdar aser asenok atema solution ji kanga tongtibang lir, kechiyong solution maru tashi asen lima kodanga merenloktsü aser yimden tebilemtsü ali tashi asenok tejakleni maotsü. Anungji, asenok lungjemer solution-ji meshitsüla aser tajung atemabo tasü itta noktaktsü, pai inyakdaktsünüba o ka ashi. Solution ji ataloktsübasa aser temelenshiji arulanglang, anungji, tensa den apet asenok renema atatsü asoshi paisa shisem.
Shisatsü nung amendakba kin ka akümtsü merangba den iba kilem nung Ao kin atema dang masü saka Naga nunger rangben ajungtsü asoshi jembiba aser inyakba ka südaktsütsü asoshi paisa moaja metetdaktsü.
Iba sentong nung MLA Wb. Amenba Yaden, Mokokchung Deputy Commissioner Wb. Limawabang Jamir, Ao Senden tir Wb. Chubawati Longchar, Ao Senden tatong tir Wb. I. Imkong Jamir, Ao Senden tezülur Wb. Imtipokyim, Ongpangkong Mungdang tir Wb. Tsüktimeren, Mokokchung yim Kichu kidong nungi Wb. J. Temjen Kichu, Aor Kilem construction committee nungi Noklen Jamir aser tangartemi shilem balala agia liasü. Iba Aor kilem 1st floor – 3rd floor ji sen lakh 66 shi intoka asü, ta osang ajanga angazüker.
(Source: Tir Yimyim)
The Nokinketer 