Clark Memorial Higher Secondary School (CMHSS), Impur tenzüker taküm 125 ajungba nüngtem nung küm piyong sentong tapu balala agiyonga arur külen Nov 6, 2020 nü tatembangbuba quasquicentennial benjong parnok school kilem nung ayongzüka takok manung kaogo. Iba sentong nung tejaokertem aser temulungertem den taoba mapang iba school nung azüngertem tesem balala nungi adenshia temenungratsüka tatalokba balala lemsatepa shilem tajung agia liasü.
Mapang ka iba school ya Assam rangben nung school tulutiba rongnung ka liasü, anungji, iba school ajanga Aor aser Naga nunger dang masü saka north-east India songjen atema education renlokba aser taküm melenshidaktsüba nung shilem tajung agia liasü, ta jubilee osang abener Ao Baptist Arogo Mungdang (ABAM) executive secretary, Rev. Dr. Mar Atsongchanger-i iba sentong nung jembidang ashi.
Nübur tenzükba mapa nung küm 125 tashi metitemi aruba ya tesüngmangtsüka lir aser tanü Nagaland iba jenjang nung aliba ya tamendakdakjibo iba school lir, ta pai ashi. Iba school ajanga jenti pur nem education tajung den kotaker senmang agütsü, anungji, iba school ya maneni taküm lidaktsütsübaji kanga tongtibang aser iba school taküm alitsü asoshi asenok ajak sakuku tongtibang lir, ta paisa shisem.
Iba school tenzüker arudang mapang shia timtem tapu jenti ajurua aruogo, talisa iba school centennial küm 1995 nungi tali okronga aru, aji oda, ABAM-i joko iba school ya 2016 küm nungibo home mission wadang ka amai repranga anepalua arur, ta ashi. Iba school ajanga putusa putu Naga nunger nem education tajung agüja arudar, maneni tajungtiba aotsü asoshi khuret tali abentsü tayongzükba ka agütsü.
Iba sentong nung ABAM tir, Rev. Temsu S, CMHSS Managing Board chairman L. Alemtemsu Ao, Mopungchuket village council chairman, Sungratsü village council chairman, CMHSS QQC Planning Committee convener T. Apok Jamir, CMHSS Principal Chubainla, ABAM Youth Secretary Toshi Sanglir, Pastor Rev. R. Teka, CMHSS Alumni nungi nisung kar den ano tangartemi tepela o den tayongzükba aser jubilee salem otem ajanga tesenteper ajungmeso.
CMHSS ya 1895 küm American Missionary-temi tenzüka yutsü aser Nagaland nung kaket riju lapoker metitemi tanü tashi taküm lia aruba rongnung tejentibaji iba school ya asütsü. Iba school nungi nüngtugu nisung aika adokogo, tat: mezüng Naga nunger Governor – Hokishe Sema ama, mezüng Nagaland chief minister – P. Shilu Ao ama, nüngtugu footballer – Dr. T. Ao ama, mezüng Naga nunger ordained minister – Rev. Supongwati ama, nüngtugu Laishir I. Ben Wati aser Dr. Renty Keitzar, aser ano aika. Mezüng iba school tenzükdang, American Missionary E.W Clark, F.P Haggard, S.A Perrine aser W.F Dowt nungertemi shilem tajung agiba otsü angur. Iba school nung Naga nunger mezüng head master-ji Gwizao Meru Zeliang (1915-1917) inyak. Mapang ka iba school nungi Aor dang masü Naga nunger kin balala arua azüngba otsü tanü tashi jembir.
The Nokinketer 