~Tiatoshi Longkümer

Okila:

Mapang-mapang nung asen Naga kin balala lungjemer senden alidang khen-khensa nia  sarasademtsü jaoker. Sarasademtsü maongka nung senden nung adendang kin balala lenirtemi tebilembatem lemsatepba angaa amener. Tejembir aikati kanga shisa kaa jembiteter. Item rongnungjia asen Aor lenirtemi jembiba O-temji kanga tajung aser tesangra lir. Aser yamaji, tanga kintemi asen Aor lenirtemi jembiba o temji kanga ladanga angar.

# Asen Kin Lenirtem dang Tsüngrem Akhümtsübuba Samar:

Ni adenba senden teimba ka nung asen Aor lenirtemi jembiba aser tangar kin lenirtemi jembiba tepilaji, Tsüngrem akhümtsübua jembiba (God consciousness) ya lir. Naga kin tila-tulu lenir teimbai Tsüngrem kanga akhümtsübua jembir aser yamaji alima onüktem lemsatepyonga Tsüngrem indang khuli süa aser Pa akhümtsübua okilar. Asen Aor lenir mesüra yimsüsür aikati kanga ngasangatema aser asenok tangar kin dang nungi tashiba aser temetetba amai jembishinür. Mezüng Khrista osang agizüka sangdongba kin sür nung asenok aikati tangar kin den yimden yimli jembishinüdang Tsüngrem akhümtsübua jembiba yimya kanga ajema akümer. “Asen Aor-i kechi ashir ta tangar Naga kintemi atar” ta bilemba tejen asüküm shisatsü to ano asenok aika dang alibayong, asenok lenirtemi Tsüngrem nungi shisatsü bushiba ajema lir.

# Tanü Putu nung Asen Ao Kin Meinlokba Tera:

Atangji, asen Ao kin ya asang-sang nungbo Tsüngrem akhüm metsübuba kin/lokti ka küma odagi. Küm tasen ka tenzükdang asen Ao kin lenirtem aser yimsüsürtemi anir Tsüngrem akhümtsübuba (God consciousness) shisatsü ka nentaka bushitsü kanga nungdaka lir. Ya roka-soa meinyakra asen kin kopi melii tangar sülen anitaktsü. Tanü putu ya tanga Naga kin, tila-tulu ajak kanga ainba mapang ka lir. Asen Ao kin tejenba putu nung Tsüngrem taochi ajanga shisaliok aser tamangba mezüng maongka ngua kanga ain, saka taoba putu nung ainba sülenbo asenok kangabo meinloker. Aser tanü putu nung asenok meinlokba tera tongtibaji, asenoki Mezüngbubaji Mezüng Mesüdaktsüba ajanga lir (First thing First). Mathi 6: 33 nung yamai zülua lir: “Saka tamasa nenoki Tsüngrem yimli aser pa temeshiba bushiang, aser item ajak nenok nem bendenloktsütsü.”  

# Küm Tasen nung Asen Tongtibangtiba Teinyaktsü:

Küm tasen ka tenzük dang taküm nung nisung shia teinyaktsütem jenti lir. Ajakji taginütsü tesa saka ajak-a tajangzük masü (1 Kor. 10: 23). Taküm nung mapa kar rongdak-nungdak (Urgent) lir, kar aritepa inyaktsüba (emergency) lir, kar kanga tongtibang aser rongdak (important and urgent) lir, kar tongtibang saka kanga maritepyonga ajungtsüsa lir (important but not so urgent), aser karbo tongtibanga masü aser meinyakyonga kecha masü ta lir (not so important and avoidable). Ne mapatemji koba kanga tongtibang aser koba metongtibang itemji tarensena shima aser shisadanga inyaktsüla. Tatishitsü agi, Kin-kidong otsü jembiba agi kidang mena melidaktsüba aser sentep-senshi aotsüa atsüayongdakjaa lira, itemji nai khen ajema kümdaktsüyonga tajungba dang. Ano na Second-hand dokan nung mapang intoka senzüba ajanga ki mapa aser tekülem sentep nungi piladakjaa lira, item dokantem nungi khen anisüngzük agiyonga tajungba dang.

Meimchir taküm shia nung tongtibangtiba (important & urgent) shilemji Tsüngrem Yimli aser Pa temeshiba bushiba ya lir. Khrista akar aser maker ajaki Pa yimli aser Pa temeshiba yabo bushitsü nungdaker. Kechiaser Tsüngrem o jagi ashir, nai iba ya bushiteta yura tanungba asen nungdak ajakji ne nem bendenloktsütsü.

Küm tasen ka tenzükdang, ne taküm nung nungdakba aika dang alitsü. Kija-kibong aser lokti ajak nung teinyaktsü agi sünga lir. Saka item nungdak ajak tema nung, asen teinyaktsü tongtibangtibaji, Tsüngrem yimli aser Pa temeshiba bushitsüba ya lir.

# Tebushiri Anguba Yimli aser Shisatsü:

Shir takümi anüng-akonga aser meperia ta bilemer parnoki bushijen bushia alir. Shir sensaka alir parnoki mapang ajak nung imlaseta aser bushia alir. Yamaji,  shir takümi Tsüngrem yimli aser pa shisatsü bushia alir parnoki kotak yimli aser pa shisatsü ngutetsü. Mathi 5: 3 nung ashiba amato, “Tanela nung anünga alirtem temoatsüba kechiaser Kotak yimli parnok meyong.” Saka shiri tanela nung peria lir ta bilemer parnokji tanela nung asükümertem lir, aser iba tatidang ya koktettsü kanga meita alitsüla.

Laishiba nung shisa takatiba chubaji Solomon ta shia lir (1 Chubatem 4: 30). Solomon-i pei nübur madang yimsütsü asoshi Tsüngrem dang shisatsü dang meshi. Solomon-i inyakba nungji Tsüngrem kanga temulung achi nung Tsüngremi pa nem shisatsü dang masü saka rongsen aser tenüngsang-a agütsü. Asenok lenirtem asoshi yangi tangatettsü tongtibang ka lir. Solomon shisa makaba agi pai Kibuba dang shisatsü meshiba masü, saka pa shisa akaba agi pai shisatsü dang meshi. Kechiaser shisa akari shisatsü bushir, aser temetetba alirtemi tali metetnür. Daniel 2: 20 & 21 nung yamai shia lir: “Teti tatem maka Tsüngrem tenüng temoatsü sang; kechiyong shisatsü aser tashi pa meyong lir. Pai mapang aser tsüngküm lemsatsür; pai chubatem agiinür aser chubatem mendaktsür; shisakar nem pai shisatsü agütsür, aser tangatetba pur nem pai temetetba agütsür.”

2021 küm tasen tenzüka aodang, asen Ao kin nübur shiai Tsüngrem dang shisatsü meshia tenzükdi. Alima nung ajak kar mesüra ajangzüker külen shisatsü makara asenok tangar menüdaktsüba jilushi airtem dang akümtsü. Saka shiri Tsüngrem nungi shisatsü aser ajemaluba senmang agizüker parnoki alima senmang amangtsü. Süra, shisatsü ya asen dangi koma arur? A. Shin 9: 10 nung yamai shia lir, “Kibuba tsübubaji shisatsü tetenzükba aser Temeshisang metetbaji tangatetba lir.” Atangji, shisatsü aser tangatetba ajakji Kibuba akhümtsübuba nungi tenzüker.

# O tembang:

Tang nungi shirbo asen kin yimden yimsüsür aser arogo aser lokti lenirtemi anir nütsüng nübur ajaki asen tebilemba nung, asen jembishinü nung, aser asen inyaksangshi ajak nung Tsüngremji mezüngbuba südakja amshidi. Asen tenüng mesüra kin melena Tsüngrem tenüng inokdi. Aseni shisadangba ajak nung tetenzük aser tatembangji Tsüngrem südaktsüdi. Asen jembishinü aser zülubanglu ajak nung okila aser O tembangji Tsüngrem südaktsüdi. Süra Kibuba Tsüngremi asenok dang taochi sayutsü aser asen kin nem shisatsü aser bangdak moatsütsü. Mezüngbubaji mezüng südakjang.