(Training angati agütsür, anungji, raktepa agitsüla)

India lima tesem balala nung Pradhan Mantri Kaushal Vikas Yojana asembubaren tenzükba sentong takok ngua agiogo. PMKVY 3.0 tenzükba sentongji centre lapoka aliba tesem ajak nung online ajanga agia liasü. Aji oda, PMKK Mokokchung Centre (Empower Pragati) nunga online ajanga shilem agia denogo.

                PMKVY 3.0 ya Government of India indang flagship skilling scheme ka lir aser iba ya Ministry of Skill Development & Entrepreneurship (GoI) ajanga ketdang süa agir aser iba 3.0 phase yabo tanü alima tensa den apet mapa inyaktsü ashi metet (skills) balaka nung rangloker agitsü terenemshiba tulu lir.

                PMKVY mapatong kübok nisung lakh aika nem angati sorkari rongsen jenti intoka nungdakbapur nem training balala agütsür. Skill India Mission ya 2015 küm India Prime Minister Narendra Modi ajanga India ajunga nung tenzüktsü. Iba mapatong ajanga alima nung India ya ashimetet (skill) tsütsü tongtibang linük ka kümdaktsütsü nükjidong lir.

                 Tanü India lima PMKVY 3.0 tenzükba sentong nung sensaksemtsü asoshi centre 75 shimtetba rongnung Mokokchung centre-a densema liasü. Tangji Mokokchung Centre nung ya item training 3 ya agütsür; Customer relationship management (CRM) Business process outsourcing (BPO), Make-up Artist aser Room Attendant. Koba training agidir agiaka, Basic Computer Application den Soft Skill densema sayur.

                Tang tashi nung Mokokchung Centre nungi nisung 300 tema nem training balala agütsüogo aser item rongnung mapa angurtemji nisung 160-170 shi lir. Training angati agütsüba dang  masü training temer külenji private sector nung mapa inyaktsü lenmang bushitsür. Nagaland nungi ibala training agir alirtemji India lima tesem balala nung kanga sapur, kechiyong asenok dak jembishinüba aser wainshin sempet tajung keta, ta Centre Manager, Imtirenba-i osangbener den jembidang metetdaktsü.

                Jangratemtsü kaji PMKVY mapatong kübok tetsür tanur nem maoangka kanga agütsür. Tang PMKVY 3.0 January-March batch atema Mokokchung centre nem nisung 159 training agitsü melaogo aser tesayura talila shimoktsü asoshia temelaba arua lir. Shitakba agibo batch ka nung nisung 120 dang melar, saka Mokokchung nem talila lemzüktsüba asoshi Centre Manager-isa pelaba lemsatep. “Iba training ya angati dang agütsür, anungji, iba maongkaji raktepa agitsüla”, ta paisa ayongzük.

                Tanü joko alima ya balaka kümogo. College zünger degree anguba aser azüng züluba metetba kisüngji teperi masü. Taküm liyonga aotsü atemabo azüng zülu metetba denji ashimetet (skill) karbo angazüktsü nungdaker. Sorkar mapa ajakibo mangutsü aser private sector nung inyaktsü atemajia ashimetetba melira mapa mangutsü, ta Centre Manager-isa ashi. “Na skill dang lira pei sasa meranga inyaker tepok sünga litettsü lenmang aika lapoktsü”, ta paisa shisem.

India nung PMKVY 3.0 tenzükba sentong PMKK Mokokchung Centre nunga online ajanga shilem agia adenba noksa nung angur. Mokokchung, January 15, 2021