Mokokchung nung tang nüburtemi kanga bulua jembiba riju kaji ‘Mokokchung Growth Centre’ ya asütsü. Iba centre ajanga “strive to live” omen nung ajemdaker kaketshirtem nem India lima talangi moi pei atep nung mener digital technology (V-SAT) ajanga tangalen ama chichiba education agütsüba maparen inyaker. Iba maparen ya Mokokchung district atemabo otsüsütsüsa mezüngbuba lir.

Tangji iba centre (MGC) ajanga inyakba tongtibang mapatong ana inyaker; kaji ‘Mokokchung Growth Centre – Eden Academy Coaching Classes for National Eligibility cum Entrance Test (NEET), Joint Entrance Examination (JEE) aser Nagaland State Entrance Examination (NSEE) amala technical tatidang atema tesayuba agütsür, aser iba ya 2018 November nung tenzük. Iba coaching ya Class 12 (Science) zünger alir shirnok tatidang balala ajanga takok ngur pei jangraba luyim (branch) balalai onür, parnok asoshi lir. Iba coaching ya V-SAT (online) ajanga Delhi nungi tesayur mongintemi sayur.

Iba coaching ya tenzüker talangkabo masü saka tang tashi nung yangi nungi NEET nisung 3, JEE nisung 6 aser NSEE nisung 3-i ajangtetogo, ta Mokokchung Growth Centre anepalur kati iba osangbener den jembidang ashi. NEET takok angur rongnung katibo 2020 kümto MBBS (doctor) azüngi aotsü jenjang ajangzükteta iba centre asoshi konang bener arutsüogo. JEE nungi nisung 2 Civil Engineer, 1 Mechanical Engineer aser 1 Architect Engineer ta adokogo, aser NSEE nung adokertem parnok 3-ji; Agri B. Sc, Pharmacist aser ka Laboratory Technology ta adoka tazüngi ogo. Iba coaching ya küm shia March nungisa tenzüker.

Mokokchung Growth Centre-i inyakba mapatong tanabubaji; Civil Services (UPSC/NPSC) tetoktepba nung jangrartem asoshi 2019 August ita nungi “ALS (Alternative Learning System) IAS coaching classes” ta sür ka coaching class ka tenzüka odar. Iba ya küm shia June – July meta nungisa tenzüker. Iba coaching nung mezüng batch purji parnok 23 aser tanabuba batch pur 8 lir. Parnok shinga ano tatidang khena magütsü lir.

ALS coaching ya Delhi nungi V-SAT ajanga live sayur aser yangi tesayurtemji India lima nüngtugu civil service tatidang nung mongintem teas lir. ALS ya India nung civil service tsütsü coaching class agütsüba rongnung tajungtiba ka ta züngshir. Tsüngdong Delhi tashi maoyonga yangji or agir amai Mokokchung centre nungi angazüker aser Delhi nung tesayurtem den sensaksemteter aser mangatetbatem asüngdangteter. Ano tajung kaji tang ya alima tensa mesüngjemba ajanga marur dangashi, ALS Delhi nungi tesayurtemji mapang shia Mokokchung centre-i arua class agir. Aji oda, alima süngjema kümra parnokji arutsü, ta ALS achayangerisa ashi.

Mokokchung Growth Centre ya Nagaland RD Minister, Wb. Metsübo Jamir aser par jabaso Nagaland Minerals & Mines, CEO, Sb. Temjenmoa Jamir nati nükla tulu yur bener aruba lir, aser bener aruba dang masü saka item coaching atema Admission/Course fee-jia shilem (percentage) teimba tenati inoktsür, ta angazüker. Ibaji ajanga kaketshirtem aser tsüraburtem khuret kanga pongbatsür.    Iba centre ya nükjidong tulu yur tenzükba ama, mapang tatsüka tsüngda nung meilongi asünunga nükjidong ataloka aoba ngua nüburtemi pelaa repranger aser tajungba aotsü imlar. Yamaji iba ya ajanga Mokokchung district nüburtem talisa koda masür kaketshirtem lenla aisü nung tajangzük ngudaki. Iba centre lapokba ajanga meta talangi rongsen jenti intoka maoyonga aser chirnurtem meta talangi yoker tsüraburtem shisabuluba kecha melii, pei atep nung ayongayonga mener India nunger nüngtugu tesayurtemi sayuba angazüktsübaji koda jangratemtsü. Anungji, nüburtemi iba maongkaji raktepa agitsüla.

~ Source: Tir Yimyim