Ongpangkong Arogotem Tenzüker Telungjem (OATT) 21 buba lokti mungdang “Tenzükba nung tebilemtsü” omen nung ajemdaker Meküli Baptist Arogo tenla kidang Jan 29, 2021 nü takok ngua kaogo. Iba sentong Covid-19 SOP-i melaba ama maparen ajak kanga junga achayanga inyaka liasü.
Iba sentong nung onük jembir Clark Theological College (CTC) Principal, Rev. Dr. Mar Pongen-i omen nung ajemdaker jembidang, tanü arogo nung tenzüker aser tenzüklatemi sen tali meimba, pei taküm asüngteta melitetba, Tsüngrem mapa dang nungi nija mapa nung tali temulung tagütsüba, pei-i/pei arogoi inyakba tali ulua bilemba/jembiba item tebilemtsütem kar bener arua lemsatep.
Paisa ashiba agi, tebilemtsü karbo pei dak tashi mait aliba nungia adoker, karbo asenoki junga anepalu/ketdang mesütetba nungia adoker, Laishiba tesayuba junga magütsüba tebilemtsü, tenüng agi dang amangba aser ano tanü tendak tamangertem aser arogo-i ajuruba tebilemtsütem kar bener arua lemsatep aser item onük nungji tesentepertem shisa balala tokdena sensaksem mapang agia liasü.
Iba sentong nung Ongpangkong Mungdang (OM) tir, Wb. Tsüktimeren-i mapang tatsüka agidang, yimden aser arogo anaji inyakyim balala lir, anungji, iba tebendangji angateta maparen ajak inyaksangshitsü asoshi tayongzükba ka agütsü.
(Source: Tir Yimyim)
The Nokinketer 