Ongpangkong Kaketshir Mungdang 38 buba lokti senden sentong “Rangben Temelenshi” omen dak rangloker Jan 28 anogo yangi Mokokchung town hall nung takok ngua mungogo. Alima tensa tia majungba ajanga taküm iba lokti senden Mokokchung town hall nung amungtsüsa aküm.
Covid-19 wara nungi kümdanga alitsü asoshi tetuyuba agütsüba “SOP” nung ajemdaker sentong ajak kanga kümdanga agi aser nisunga teshimtet dang jaoka munga liasü.
Iba sentong nung tetushi tejaoker, Mokokchung Deputy Commissioner, Wb. Limawabang Jamir-i jembidang, taoba küm ishika jakdang nungi OKM-i pei tetsü oshi wazüka ayutsü meranga sentong tapu balala achayanga agiba ya jangratemtsüka lir, ta tenüng sanga ashi.
United Nations Educational, Scientific and Cultural Organization (UNESCO)-i tanü alima nung anogo shia oshi ana-na samar ta bushiteta lir, aji doa, mekümdangra, Ao oshia samatsü lendongbang nung lir, anungji, yamaji mataloktsü asoshi lanu putu nem pei tetsü oshi sapudaktsütsü asoshi meneni ajungshitsüla, ta ashi.
‘Tanü alimai degree tulu masü saka wainshin aketba, sobaliba metetba, Tsüngrem akhümtsübuba aser tangar dak menendaki pei sasa tepok sünga litetba lanur nungdaker’, ta ashi. Paisa iba dak sentakba nung ashidang, ‘taoba mapang 3Rs (reading, writing and arithmetic) dang liasü saka tanübo 4C’s (critical thinking, collaboration, creativity and communication) agi melenogo, anungji, alima den jangyu medema aotsübaji kanga tongtibang’, ta paisa kaketshirtem ayongzük.
“Rangben temelenshi” ta asüba ya lenla ajak nung melenshiba dang ajar, anungji, shisatsü, tangatetba, sobaliba aser libaliru ajak nung melenshitsü asoshi ajungshia liasü. Mokokchung DC-isa OKM-i adokba “Limketer” ta sür nüngo kaket ka sayatsü.
“Tejakleni raketa otetba yimli asoshi shisamulung tasen” onük nung ajemdaker panel discussion sentong balaka agi aser iba nung shisalen sayurtemji; Lead District Manager, Mokokchung & Longleng – Wb. Kreho Athili, NABARD Mokokchung DDM – Wb. S. Amarjit Mangang, Mokokchung Chief AH & Veterinary Officer – Dr. B.M Sunep aser Retd. Principal – Wb. Akok Walling parnoki shilem agi. Sentong tanga ka nung Straightway Christian Mission Centre Mokokchung Administrator, Dr. Awala Temshi-i “Rangben temelenshi asoshi tsüngchi lanur” onük nung ajemdaker tagitsü o aika bener arua mungdang sangertem ayongzük.
Bangzüng itemi renem:
Bangzüng kar renema ayuba rongnung; tzü mopung kümzüka ayutsü nükjidong nung Ongpangkong jila balala ajak nung lirumedema sentong balala achayanga inyaktsü. Aor libajen kümzüka/wazüka ayutsü nükjidong nung Ongpangkong yimtsüng shia akhi yimya nung asüba Aor ki kaka asütsü aser iba ki dak sentakba nüngjakoja aser kisüba maparen ajak documentary yanglutsü lemtet.
Iba den rongsenkettsüng renlokba mapa nung nüburtemi tali jeta inyaktsü nükjidong nung Ongpangkong yimtsüng shia nung OKM-i achayanga ‘Financial Literacy’ sentongtem ayongzüka akatsü lemteta yuogo.
OKM ketdangpur tasen:
- Limatongzuk (Ungma) – President
- Lanuaküm (Kübza) – Vice president
- Waluniba kichu (Aliba) – General Secretary
- Süpongmeren Jamir (Moalenden) – Asst. General Secretary
- Takusunep pongen (Mangmetong) – Executive Chairman
The Nokinketer 