Alempang Baptist Arogo-i achayangba ‘MITA Ministry’ ta sür mapatong ka Nagaland PWD Housing & Mechanical Minister, Wb. Tongpang Ozüküm-i Feb 5 nüto ABA Pastor Complex nung meraketa tenzüktsüogo.
MITA ministry tetezü ‘Meranga Inyaker Taküm Alitsüla (MITA)’ ta asüba mapatong ka lir. Iba ya Alempang Baptist Arogo-i inyakba Social Ministry tongtibang shilem ka. Ibai tongtibangsa lanur zünger mapa mangur aser züngtor alir lanur teyakyak sempet aketer nem pei sasa mapa meranga inyaker tepok sünga lidaktsütsü asoshi maongka lapoktsütsü aser parnokji senso/tamanger tajung kaka kümdaktsütsü nükjidong yur tenzükba lir.
Iba mapatong lapokja Minister, Tongpang Ozükümi jembidang, arogo ya tamangba dak rangloker inyakba telok ka lir, aji süaka, arogo teinyaktsü dang nungi alia iba ama mera agiba ya arogo aika nung mangu, ta ashi.
Lockdown ajanga alima rangben langkoshishi kümatok, aji oda, India nunga mapa aika anentsüsa aküm aser iba wara ajanga state sorkara sentsüh tulu atsüh aser sorkaria mapa aika inyaktsü merangaka mayimjemteti aliba tensa ka nung, Alempang arogoi mapa tajung inyakba asoshi tenüngsang o ka lemsatep.
Paisa lockdown ajanga Naga nunger nem temoatsü bener arutsüba indang kar lemsatepdang, mezüngbuba nung – nüburtem anema alitsü asoshi inyakba ‘health sector’ tsütsü jenjang tajungba aküm, tanabuba nung – nüburtem jabangmayim pei sünütsü süa litepba mapang ‘Epidemic Act’ ajanga nüburtem tsüngda rongrongshirong madoki zep ta azüokba aser tasembuba nung – Naga nungeri iba wara ajanga mapa meranga inyaktsü yimdangi arudaktsüba aser ali dangi meyiptsü tangatetba agütsüba, itemji lir, ta ashi.
Tang Naga nunger rongnung Chakesang nungeri aluyimba (Agri and allied) tsütsü temulung kanga agütsür, anungji, mapa tajungjibo asenok ajaki parnok dang nungi ajizüktsüla, ta paisa mapa meranga inyakba kuli kar bener arua lemsatep.
Mapa tulu/tila ta kecha mali saka tanü Naga nunger business aser tanga mapa nung takok mangubaji nentaka aser bendanga meinyakba ajanga lir, ta pai ashi. Shirnoki mapa inyaktsü aaka bilemer parnoki tangar memeneptsü aser mapa meinyakra alima tejakleni kodanga maotsü, anungji, mapa meranga inyakba sobaliba angazüktsüla,ta paisa ayongzüka liasü.
MITA kübok food processing mapatong mezüng tenzüker aser iba mapa atema mezüngren nung lanur parnok 10 – tetsür pungu aser tebur pungu shima lir aser parnokji küm ka ABA-i lenmang balala nung yariteptsü aser meilongi pei sasa tokong songteta yoktsü sentong lir. Ano maneni MITA Ministry kübok an & ak metsüba (poultry & piggery) aser süngsen aser yongsen mapatong (furniture & handicraft) balala tenzüka aotsü sentong lir.
Tanü iba sentong nung ABA Pastor, Rev. Dr. Temsü S-i iba ministry tenzükba nükjidong lemsatepba den iba mapatong takok angutsü asoshi temoatsü meshia sarasademtsü.
(Source: Tir Yimyim)
The Nokinketer 