~ Wati Longchar (Serampore)

Wati Longchar

Indigenous culture in Taiwan is marketed. Today Mountain People (indigenous people in Taiwan) are a disadvantage group.  This group of people is similar to other indigenous people around the world – loss of land, collapse of traditional culture, loss of language, poverty, sense of inferiority, alcoholism, sale of daughters as prostitutes, sale of unskilled labour in fishing, mining and construction.

                                                                                       – Michael Stainton

Hornbill Benjung

2000 küm nungi Nagaland nung December 1-10 tashi Tenem Ozü Benjungmung (Hornbill festival) munga arudagi. Naga nunger tar nunger otsü aika nung tenem ozü indang shia lir. Asen lima nung joko tenem ozü mali, saka tanü tashi tenem ozü ama tobur tajung, teyakyak, jeretpera, akhüm taket, jenjang tulu aketba ozü ta jembia arur. Tetsü-tebou putu nungi yar-tsüngsang, benjung-bentsü mapang, talisa nokinketertemi tenem ozü teben thenko nung enoka asemer aser ibaji ajanga mera keta ajir aser yimti lemladaktsür.  Naga nungeri benjung aika amonger, saka aluruba benjung ya anogo balala nung August ita nungi tenzüka November tashi Naga kin ajaki munga arur. Iba den December 1 nung Nagaland state anguba benjungmung amunger, yongji Governmenti anogo ter “Festival of Festivals” – benjung rongnung tetsüdi, tulutiba ta ayonga munga arudaki. Medemeri Nagaland semdangner ta ashidang December tetenzüklen arung tasa ashir kechiaser iba mapang hornbill festival lir. Pei bendanger, medemer kenang arutsüji pelaa munger yokner aser tangar dang Naga nunger sobaliba takar ta sayutsü mapang tajung ka. Iba hornbill benjung asatetba atema lenir dang peladi.

Naga nunger kin 16 sanger aser state balala nungi tejaoker kintem ajak kilem ka kübok anogo ter tashi longsotepa, yar tsüngsang, kenten-menü, ola-angla sayuba aser ayokba, chiyungtsü balala, sai-sapong tapu balala, tetoktepba balala (Raja mertsü chitepba tashi), naro, herbal mozü, fashion show sayuba ajanga Naga nunger telungjem sayur. India nung tongti leniri anir alima tesem balala nungi nisung 2.50 lakh tema, aser foreign lima nungi 3000 tema arua semdangbaji takok tulu. Jangratemtsü ka. Ano tanga lima nungi aruri Naga nunger sobaliba tajung angazükdaktsüba dang masü, Naga nunger rongsen ketsüng nunga renloka odaktsütsü nükjidong nung iba benjung tenzükogo. Hau, tashimait aser temelenshitsü aika jembiba angashiogo aser nguogo; karibo nungdak mali, jabujari tali, anentsüla ta ashiba nguogo.  Saka ni angatetba isab nungbo tourism industry ya asen den alitsü. Menokdangtettsü. Sensaker aika iba industry dak metalokter taküm  alitsüsa akümtsü.  Joko Nagaland ta süra “hornbill festival” ta ajak mulungsentsüi aittsüsa renloka arudagi. Ya koda sür tajungba, nisung aika arutettsüsa tajungba yanglutsü ta asüba nükjidongjiang asütsüla. Iba benjung ajanga Angami nunger takar ishika Kohima aser Kisama temeket nung alir, mesüra Government nung inyaker ishika tajangzük asoshi dang masü, saka koda sür Naga nunger yimkong ajangzüktsü aser alima dang koda Naga nunger sobaliba tajung angazükdaktsütsü, iba nükla nung hornbill festival asa-lendong asütsü nungdak ta ajiteter. Kohima nung Hornbill festival akaba dang dang masü district shia nung, tzükong aser yimtsüng shia nung, tenok-tenem balala nung tourist puatsüsa aser parnok lesson tajung angazüker aotsüsa yanglutsüla. Hornbill festival mapang dang masü, küm piyong Nagalandi arunütsüsa yangluba ajanga nübur aika tajangzük ngutet.

Look East, Act East

Tsüngremi tobur tajung lima den, aener dang jungnüba, temeim sayunüba, sobaliba tajung aser sempet tajung kar, sentsü-bangtsü  tobur tajung aiür-asangur aika aliba ajanga tourism industry yakta züintsü ta ajiteta  Governmenti anir inyaka arudagi.  Congress yimsüsüba mapang “Look East” ta jembia aruba,  tang BJP Governmenti “Act East” ta melenogo. Tourism industry takok ngua inyaktet nungbo India rongsen ketsüng renloktsü nükla tulu lir. Kechiba India-i North East nung tenük yoker? North East India ya alinükbo tila ka dang, saka country pungui – China, Myanmar, Bangladesh, Bhutan, aser Nepal – meketbanga lir; India denabo alima trok ajurutepba (golden triangle) tesem ka. India denbo NE ya 22 kms agi dang sendaktepa lir (chicken neck ta ajar), saka China den 1,395 kms, Myanmar den 1,640 kms, Bangladesh den 1596 kms, Bhutan den 455 kms aser Nepal den 97 kms agi sendaktepa kar. Meketbanga aliba linük denji dang masü, tanga lima Thailand, Vietnam, Singapore, Malaysia ama dena gari lenmang agi mela mela sentaktepa shishilemba mapa renloktsü temela. Anungji tourism industry lapoka aoba ajanga item temeket country den India rongsen ketzüng maparen balala nung terenlok adokdaktsütsü nükjidong nung “Act East Policy” sangdongogo. North East India nung lenir aikati, Neiphiu Rio, Comrad Sangma, Kiren Rijiju nunger ajaki tourism industry  ya “motor of development”, yimchiyimjung aser rongsenren renloktsü aser lanur aika mapa ngutettsü ta jembia arudagi. Airport, lenmang aser tanga terenlok mapa renlokdaktsüba ajanga nüburtem tajangzük angutsü ta tangatetba nung mapa aika inyaka arudagi. Tourism industry dang “smokeless industry” ta ajar, iba industry ajanga  mapa tajung dang bener arutsür amai bilemba agi arogo aser NGO balalai ola madoker. Saka tanü tourism development yagi shiba tajangzüktsü angur ta asüngdangtsü mapang ka tongogo ta ajiteter?  Ibai temoatsü ka asütsü asü, atakatem ka asütsü? Government, arogo aser civil society balalai tourism dak sendakba lokti tememen menokdangra temoatsü melen, meyiper lokti dangi teraksa jendi bener arutsütsü.

Tourism industry züinba

Alima nung industry tulutiba pungu rongnung tourism industry ya dena lir.  Industry tulutemji: Oil & Gas, Automobile, Arms, Pharmaceutical aser Tourism industry ya lir.  300 million shi, tetezü meimchir noklang nung 10-bo tourism industry dak  sendakba mapa inyaker. Küm ishika tejaklen temesüng nungeri dang leisure travel oteta liasü, saka tanü rongsen renloka akümba ajanga leisure travelers China, Korea, Japan, Malaysia, Singapore aser India nungia aika akümer. UN sangdong ka ajanga ashiba agi, 2019 nung international tourist alima balalai 1.5 billion oa liasü, aser 2020 nungbo 1.6 billion imlaa liasü, saka Covid-19 wara ajanga tourism industry laodaktsüba ajanga  nisung aika mapa maka aküm ta ashir. Tanü leisure travel senzür 2019 Asia nung yamai arua liasü (kar dang tatishitsü sayur):  India – 10.7 million; Nepal 1.17 million, Thailand 40 million, Singapore 19.11 million, Malaysia 26.1 million, Taiwan 11.84 million, Nagaland 5577 liasü. Alima balala repranga senzürtemji shirnok? Takartem. Takar lima kar nungbo, kinunger ajonga, mesüra medemer telok telok, kiyonger, zünga balala, tantsü-tamburtem telok balala, yakümto iba country to agi aoji, takümbo iba lima jagiang odi ta küm shia sendong balala yanglur senzüba ajangshia aruogo. Country balalai oa alima repranga senzütsübaji sensakeri pongmang nunga mepongmanger; kima atena aotsüba sünga tasak. Foreign-i aobaji kotak tongtet amai akhüm keta repranger. Anungji sensaker shirnok kecha limaia mouteter, parnoki tourist arudang kechi bilemya alitsü! Jangratemtsüka, alima nung aso talang ta bilemtsü. Tourist ajak takar ta bilemtsü, jenjang temaba nung alirtem ta bilemtsü. Aser tourism industry dak metaloker alirtemi  koda sür tourist puatsü (attract), parnok peladaktsütsü, parnok jangratemdaktsütsü mapadong asameyangtsü aser inyaktsü. 

Bendanglen Jajajartem

Nüburtem mapang shia bendanglen, ainlen jajatsüsa akümer. Tongmelang agi ainlen senzübaji tapu asem küma lemsatsü akok: (a) Nungdak atema jajaba (b) Tamang akangshitsü atema aoba, (c) Shi jangratem angutsü asoshi jajaba.

Nungdak atema senzüba – Tanebtsü bushia mozü ki alima tangai bushia aoba, shisaliok tebushi aoba, taoba putu tatalokba otsü-olem angazüktsü bushia aoba (tat. agi, Vietnam nung America nungeri koma teraksa adokdaktsü, World War II nung atom bombi Japan poksatsüba, Pol Pot-i Cambodia nung nübur rishikangshiba aser tepsetba, India nung Taj Mahal, China nung Great Wall), sobaliba balala angazüktsü, shishilemba mapa balala atema senzüba, telok nungdak asoshi senden (conference, meeting, a.a), balalai aoba, missionary mapa inyaktsü aoba, kinunger, chirnur, pei medemer semdangi aoba, mapa balala inyaktsü aoba, a.a. Alima tesademba, tajungba bushia oa yangji aliba.  Yamaji nungdak balala atema aenlen senzütsüsa akümer aser aji tongtibang.

Tamang akangshitsü aser tanela asüngsashitsü atema senzüba –  Tamang yimsü aikati yimsü tetenzükdak tesemji temeshi yimti/lima ta wazüka ayur. Muslim nunger shiai, iba lima nung taküm alidang, temeshi yimti Mecca, kong Mahammad aso, iba yimti jagi kenbosa oa külemtsüla ta sayur. Hajj aoba ajanga taoba temenentem pongitsü aser taküm tasen küma soshir ta amanger. Ibai 7th century nungi tenzüka tanü tashi kanga metsünga reta Hajj-i aor.  Küm shia million aika Mecca yimti bushia arur. 2019 küm 2.5 million tema hajj atema alima ajaklen nungi Saudi Arabia bushia aru. Yamaji Khristan-a tamang akangshitsü asoshi Yisu asodaki  “Holy land tour” aor. 2019 nung Holy land tour Yirusalemi aortemji 4.7 million liasü ta ashir. Buddhist-a yamaji Buddha asoba jaka Bodh Gaya bushia arur aser yaküm küm (2019) nung lakh 5 temai semdang ta ashir. Kasaji India aser Nepal nung Hindu tekülem ki, ayong, awatsüng  tesem balala temeshi ta wazüka yua lir aser itemji tanela asüngsashitsü atema semdanger. Yamaji alima ajak nung tamang asüngsashi atema jajartem jendi lir. Item dang “pilgrimage”, tetezü tamang akangshidaktsütsü, tanela asüngsashi asoshi jajaba ta ashitsü akok. Sensakeria sünga, taküm piyong sen bendener temeshi limaji semdanger.

Shi jangratem angutsü atema senzüba – Kodang  commercial tourism industry ta asür, iba dang ya  pei sasa pei shi jangratem atalokdaktsütsü bushia jajaba ta ashitsü akok (self-seeking pleasure). Iba yabo takari dang senzür. Takar karbo sen kong-anga meindoki lir, anungji parnoki alima tesem balala repranga senzür. Ano Company aikati mapa inyaker nem tour package agütsür. Küm piyong kanga dang lendong aketba mapatem inyaka arur, mesüra ammang-sangwa mebendang kibur tajangzük atema shishilemba mapa balala inyakdakja arur, parnok peladaktsütsü aser kibur anema mepelaba ola madokdaktsütsü, mesüra longkak maitdaktsütsü asoshi, parnok küm piyong talenba kübok inyaka aruba tekurem sala yoktsü atema tour package agütsür. Ano country tila aika nung tebur ajak military training agidaktsür. Küm ana-asem timtema training agia arur, parnok peladaktsütsü atema Govt.i tour package agütsür. Ibala tourist-i tangar sobaliba, temeket wazüka ayutsüba, mesüra meimchir taküm kecha hau ta mali pei senütsü süa, pei shi jangratem dang asa inyaker. Item tourist jagi alima dangi teraksa tulu bener arutsür. Goa, Bali, Chiang Rai, Bangkok ama nung item shi jangratem bushir  tourist-i teraksa tulu bener arutsüba otsü azünger.

Tourism ajanga Mapa aser Sen: Atangji na?

Tourism ajanga mapa aika adokdaktsütsü aser sen, talisa dollar aika ngutettsü ta teyimla nung Governmenti tourism industry züindaktsütsü meranger. Sen aika endoka Nagaland Governmentia hornbill feastive kanga meranga küm 20 alima dang sayua arudaki. Bendanger asen limai aruba aser parnok inyaksangshi balala anguba aser metetba ajanga nüburtem libaliro melenshia tejakleni aotsü ta bilemer aser temelenshi lemang aisü nung bener arutsür. Atangji na? Takar ishia tajangzük asoshi sensaker aika alar tiai aitsü. Tajangzük, sen aser shi jangratem asoshi inyakba industry ka asü nungji, kecha marendaki dang sobaliba ayoktsü, tobur tajung tenem, ayong aser moaputem  ayoktsü. Talisa, Tsüngremi yangluba meimchir temang, talisa tetsür tourist shi peladaktsütsü asoshi ayoktsü. Itemji ayokba ajanga dang sen angur. Takar, tuluri itemji mayoktsü, saka sensaker, tilari ayoktsü. Meimchir aser teyangluba (God’s creation) ajunga shishilemba oset ka amai kümdaktsütsü. Tourism promoter aser Government nung asa-lendong yanglur aser teinyaker ajaki sensaker mayok nungbo, mashioktsü nungbo, tajangzük makatsü ta meteta lir, saka tourist arudaktsütsü aser tajangzük atema “Incredible India”, “Amazing Thailand”, “Malaysia Truly Asia”, “Remarkable Indonesia”, “Beauty has an address: Oman”, “The Heart of Asia: Taiwan”, “Cambodia: The Kingdom of Wonder”,  “Marvelous Melbourne”, “Infinitely Yours: Seoul”,  “Golden Burma”, “Hornbill Festival, Nagaland”, etc.Sen, tajangzük, shi jangratem asoshi inyakba industry ka asü nungji takar kar dang tajangzük angutsü, saka sensakerbo taliang sensakba tiai yoktsü.  Shiba ajangzüker, koma ajangzüker shisadangtsüla.

Tourism ajanga Lokti tebilemtsü 

  1. Terenlok mapa: Terenlok mapa tourist aruba tesem nung dang inyaktsü. Airport, lenmang, hotel, tzü, light, mozü ki aser tanga infrastructure ajak tourist aruba yimtitem nung dang yanglutsü. Medemdangang, Longleng o Dimapur district ana lenmang tepila. Nagaland nung yimtsüng aser tourist aruba tesem anaji kenyongi balala. Yimtsüng nung facility kecha maka, saka tourist alidak facility ajak agütsütsü. Nagaland budget teimba ka  Kohima aser Dimapur nung dang indoker. “Hornbill festival atongerji Dimapur yimdong, lenmang ya terabo yanglutsü alitsü” ta aikati jembiba bilemteter. Tourist arura terenlok mapa inyaktsü, marura terenlok mapa inyaktsü nungdak mali ta bilemba shisatsü. Tourist atongdak tesem dang lenmang yanglutsü asü, nübur ajak asoshi lenmang yanglutsü? Light tourist alidak dang agütsütsü asü, pei nübur nema agütsütsü?
  • Tourist puadaktsütsü aser junger ta bilemdaktsütsü asoshi slum lira ozüngi tanga rural tesem balalai aridoktsü mesüra miimbangtsü merangtsü, tat. agi. Trumpba Indiai arudang Modi-i airport lenmang nung slum mungudaktsütsü asoshi aritepa atsü atsüba indang ajaki züngogo). Alima kar nungbo, tourist arutsüji ta sür, mesüra foreigner arutsüji ta sür city nung meshimetsür kaseta indokba mesüra miim agütsür südaktsüba otsü lir. Tourist kümzüka ayutsü asoshi police balaka kümteta anebalutsü, saka pei nisungbo senzüka yutsütsü. Nagaland nunga hornbill festival mapang tourist anebalutsü atema police balaka training agütsür, uniforma tasen balaka agütsür ayuba osang nguogo. Touristbo kümzükner, pei nisungbo kümzütsü nungdak mali ta bilemba mulungsentsü sayur.  Alar mulungsentsü (Slave mentality). Tourist ken arur atema  mapadong asameyangtsü asü, lisopur sadok sadoka yimchiyimchung alitsü asoshi lemang bushitsü?  
  • Tourist ajidaktsütsü aser sen ahtsü mechi nisung kar, kin kar shiruru museum nung ayuba amai  angutsü. Tat. agi, Andaman Islands nung Jarawa kin shiruru zoo nung ayuba amai yua kar. Iba dang anthropological museum ta ajatsü akok, tetezü meimchiri meimchir taji arutsü atema wazüka ayuba. UN-i iba amaji inyaktsü memelar, saka “People of the jungle” mesüra “Wild tribes” ta tourist tour achaayangertemi item nisungtem mangsa aliba reprangtsü koda jangratemtsü ta puadaktsür tourist tereprangi aor. Tanü tashi noksa agitsü melaba dak alaka, parnok nem chiyungtsü, tajemtzü, süoshi, mozü agütsütsü memelar. Asenoki achiba aser ajemba ya agütsüra tepoki aor aser shiranger ta ashir. Tiyazü o. Tourist senzütsü atema, lenmang tajung Govt.i yangluja lir, saka school lapoka, süoshi abendakja, ki yanglua nüchi kümdaktsütsü mejangrar aser memelar. Parnok nüchi aküm nungbo tajir marutsü aser sen mangutsü. Aiatai mapa. Shiba tajangzük asoshi kin ka yamaji ayur? Takar ajangzüktsü asoshi. Takar kar ajangzüktsü asoshi Jarawa kin ajunga tanü tashi shiruru ama yuja lir. Temulung shirangtsü ka. Iba ama mesükba ka anthropological museum ka Cambodia nunga awatsüng manung yimti tulu ka (floating village) Chong Khneas ta ajar. Kibong 1000 ka shi rong nung ki tilala, rong nung schools,  poksüdak (restaurant), dokan, dispensary aser tenlaki ka angu. Ken ajidangbo jangratemtsüka amai, saka taküm piyong tzü nung alitsübaji koda tesüngmangtsü. Tsüh, ango, alu dang, per amala dang tzü nung alirashi koda sür meimchir tzüma nung taküm piyong alitsü! Meimchiri meimchir memeimer ta asüba kuli ka.  Parnokji Vietnam nunger, rara mapang jena aobatem. Vietnam-i meyipa moteter, aser Cambodia Government-i  par senso mekümdaktsür.  Saka iba awatsüng meketaji  bus, gari, hotel, ola-angla ayokdak dokan aika dang kar. Tourist aika dang parnok reprangtsü arur. Rong nung mener touristtem meketa repranga senzür, saka rong nung senzüba paraji parnok nem magütsür. Temai adokra police-i apur, saka aiürtembo pei temang ayoktsü nikongtsütsü trok sürbo adokdaktsür ta ashi. Sen mechi asaa meimchir shiruru amai ayuba ibajia ka. Tanur tila, tantsür-tambur timtema aliba ngur kanga temulung shiranga bilem.  Iba dangji ano “objectification of human” ta ashitsü akok, tetezü meimchiri meimchir reprangba ajanga sen bushiba maparen. Iba dangji meimchir ayokba, shishilemba ta ajar. Tesüngmatsü mapa tamajung. Takartemi aser governmenti yamaji meimchir alar tiai yoker. Sen shimtsü asü, Tsüngremi yangluba meimchir shimtsü? Takar asoshi sensaker, pei sobaliba ayoktsü na?
  • Tanü putu oset-tsȕset ka amai dang meimchir shishilembateper. Taoba putu, temesüng nungeri tanak nisung bazar nung bener oa alar asütsü ayokba ama,  tanüa  küm shia 6,00,000 – 8,00,000 pur oa mesüra tiyazü mapa agütsütsü ta mesüzüka anir oa ayoker ta ashir; ken kenbo sentsü yong tsüraburi ayokba lir.  Item rongnung 70% shi tetsür, talisa aiür chanutem. Parnok alar dang tamajungba shibanga ayur aser bazar oset ama, iba tetsür gondha paika asoshi iba jenjang ta ayokba; ano alima kar nungbo ita trok, küm ka asoshi kibong kümdaktsüba (contract marriage) aser karbo makamait ajanga pei temang ayokba jenti adoker. Anungji commercial tourism aser sex industry  ana ya sentaktepa lir. Tazüokba mali, shi-azü jangratem inyakba ajanga HIV prokshiba aser AIDS agi nisung aika anojungi asüba osang ngugo. Chiyungtsü peria mungutetra ibala japujari mapa inyaktsü. Takar ishika asoshi asen jala, asen chirnur ayoktsü asü,  kümzüka ayutsü, education agütsütsü?
  • Kobala mapasa tourism ajanga nüburtem (lisopur) nem bener arutsür? Siem Reap nung (Cambodia) 12th century nung yangluba Angor Wat ta sür Buddhist temple ka lir. Meimchiri yamai tekülem ki yangluteter no ta tanü tashi alimai süngmanger.  Iba temple reprangtsü tourist aika arur. Siem Reap nung hotel, restaurant, bus, gari, supermarket aika lir, saka item ajakji  Korea nunger indang amai dang angu. Korea nungi tayimtsü anogo shia anana arur aser Korea nunger yimti ka amai Korea oshi nung sign board lir, aser Cambodia nunger aikati Korea oshi jembir. Korea nunger aika aruba jagi Cambodia nunger mapa kobala angur? Rongsen bushiba maparen koma renloker? Korea nunger tourist ajak Korea nunger tayimtsü nung arutsü (Cambodia nunger tayimtsü keta Koreai maor), Korea nunger gari, bus nung senzütsü, Korea nunger hotel nung anentsü aser chiyungtsü. Angazükba agi Angor Wat-ji Tourism minister den som sür Korea nunger kati achaayanger ta ashi. Tetezü, Korea nunger aruba tajangzük mali, sen ajak parnok dangisa meyipa oadoker. Rikshaw nung tourist anir senzüba, nemshitsüba (massage sütsüba), ko mejemptsüba, ola-angla mapa kar ayokba dak alaka tajangzük kecha mali. Kobala mapa – seasonal mapa, tetezü tourist arudang inyaktsü, marura ita sen mali, mapaa mali. Chowkidar, naro anebalur, shidok-shirar, hotel nung awazür mapa dak alaka mapa tulu magütsür.  Cambodia nunger aser Korea nunger rongsen maparen nung tepila uluraba ajanga, lisopur pei lima nung tangar kübok alitsüsa aküm. NE country pungui (India dena trok) meketpanga lir ta pelateper, saka asenok rongsen maparen nung tangar den tepila tulu ali nungji Cambodia nunger jenjangi aitsü ana nung dang lir. China nunger company ka dang aru nung ola madoktettsü. Tanü Myanmar nung armyi coup sütetbaji China nunger company teyari ajanga ta aikati ola adokba azünger. Mekümdangra, lisopur pei lima kilir akümtsü. Süra takar ishika tajangzük asoshi tourism promote asütsü asü, lisopur  aser sensaker terenlok asoshi inyaktsü?
  • Alu ayimtsü jaka tajung aika airport yangluba, lenmang ulushia yangluba, park balala, golf course, horse riding, hotel yanglua aoba ajanga agiadoker. Itemji shirnok atema? Takar atema. Sensaker shiba golf asayaa kazür? Ball shima aser ajok apur senzürtemji sensaker.  Hotel temeket ayong, tzüyimküm anasa jana-rüja, plastic, bottle amalai mennentsüba agi shiruru asür aser tzü alia ajemtsüsa akümer. Takari taliba tzü dang ajemer, saka sensakeri koda sür tzü alitsü? Tzüyim anasa hotel kiburi ango aputsü memelar, tourist tzü chikodaktsütsü aser ango ajidaktsütsü asoshi, saka angupur mapa mali kümdaktsür. Ano tourist pelaa anü wanga tzüyimküm nung mejanga kazüdaktsütsü asoshi tzüyimküm anasa aliba süngdonglidong ajak lepdoker merük merüka ayur. Ashiba agi, 2005 nung Indian ocean nung tsunami adokdang tzüyimküm nung  süngdonglidong melepdoki ali ka asübo, teraksa patekato madoktsüla ta shiteter. Alima nung 4-7% mopung menena kümdaktsübaji tayimtsü ajanga ta ashir; tzüyim nung rong tulu ka aoba agi gari 12,000 shii mopung menentsüba den saku ta ashir. Item ajakji tourist takar ishika shi jangratem asoshi inyaker. Shiba asoshi tourism development? Lisopur aser sensaker, aser Tsüngremi yangluba wazüka ayutsü asü, shi-azü jangratem bushir tourist ishika atema alitsü?
  • Sen atema pei culture akhüm metsübui ayoktsü. Taiwan nung medemer ka, Turuku nunger,  ka den cultural performance reprangi ao. Kodang Turuku nungeri tsüngsangtsü ta ashi, pa kanga pelaa kü dang rasaa ashitsü tejangraba nung ataa liasü. Saka pa ola madoki aküm. Kechiba rasaa mashir ta asüngdang nung, pai süoshi dang Turuku nunger süoshi ashi, tsüngsangbaji kecha tetezü mali. Tourist peladaktsütsü style tsüngsang ka dang ta langzü. Yar-tsüngsang, ken-ten menü ajak tetezü ka lir, saka tangar shi jangratem atalokdaktsütsüba aser sen ajangzüktsü asoshi pei sobaliba ayoker. Ya metetdi: “Traditionally, indigenous customs, rituals, sacred shrines, places of worship, sacred music, and ceremonial dress were held with much reverence. Today they are commercialized for tourists’ advantage. Musicians, dancers and other artists perform, exhibit and sell their creativity to earn some income at the cost of their self-respect. Today indigenous sacred music and dances have turned into mere cabaret performances for enjoyment.” Ashiko, hornbill festival nunga pei sobaliba akhüm metsübui oset-set ka amai yokya alitsü! Sobaliba ya tayoktsü oset ka asü masü? Hornbill festival ajanga dang pei sobaliba wazüka yutet asü, tanga maparen ajanga wazüka ayutsü? Sen tajangzük asoshi sobaliba ayoktsü asü, tetezü keta amshitsü?

Tourism industry ajanga teraksa aika bener arutsür asü nung takari nüburtem longkak maitdaktsütsü atema mapa tajung inyaker amai sayutsü. Ni Marian beach, Chennai nung, Taj Hotel kiburi temeküt nung alirtem asoshi yamai inyakba angu. Ita shia jang kg 5, dal 1 kg aser totzü litre ka agütsür.  Iba den primary school ka angopur chirtem züngdaktsütsȕ lapoktsü. Kechiba süra Taj Hotel-i 3 kms temüket nung ango mepudaktsür aser angopur mapa mali aküm. Anungji nüburtem longkak maitdaktsütsü asoshi  mapa tajung inyaker amai sayuba. Kasaji reprangang, tourism ajanga hotel, lenmang, airport yamai terenlok ta ashitsü. Saka nüburtemi shiba ajangzüker ta asübaji asüngdangtsüla. Tourism dang sentakba tongmelang agi itemi tebilemtsü ya meteta yudi: 

  1. Tourism industry renlokdaktsütsü asoshi lisopur senzüka yutsütsü, parnok alu, arem, tzü tourist atema agiatoktsü; nüburtem pei talidak melitettsü aser alu meyimtettsüsa ozüng yanglutsü;
  2. Tetsür aser tanurtem ashiokja anir oa alar mapa inyakdaktsütsü;
  3. Pei sobaliba akhümtsübo, tetezü kecha makai ayoktsü;
  4. Takar ishika kanga takar akümtsü kechiba süra parnoki hotel, restaurant, transportation ajak azüoka ayutsü;
  5. Jenjang atutsü aser sensaker taliba jenjang tali  tasakba akümtsü;
  6. Azümasener, drugs achir züintsü aser ashikelaker aika adoktsü;
  7. Alinük (country) shirnok rongsen ketzüng nung tashi taitba lir, par kini shishilemba maparen ajak azüoktsü aser lisopur pei lima nung alar süa alitsü, harjiawala akümtsü.
  8. Shi jangratem bushia jajartemi tzü-mopung menentsüba ajanga tashitak balala adoktsütsü;
  9. Japujari, nüktabangta mapa balala aika jateta adoktsü;
  10. Chiyungtsü tajung ajak tourist atema, tamajung lisopur achitsü;
  11. Lisopur jalatemi takar tourist bushia senzütsü aser parnok temang ayoktsü;
  12. HIV & AIDS, temesepba mozü achir züintsü;
  13. Nisung aika anojungi iba lima nungi arishi lepdoktsü.

Item ajak ya lokti tebilemtsü. Tourism dak sendakba tebilemtsü  yanglushiba nung Governmenti, yimtsüng yimsüsüri, arogo tenzükeri dang temelenshi bener marutet, anungji nütsüng shia shilem kar ta metettsüla.

Laishiba aser Tourism terenlok

Laishiba nung nungdak balala nung nüburtem oli-aruli ta jajaba otsü aika shia angur. Tsüngremi Abram aja. Pa aser par kinunger Haran nungi Kanan lima bushia ao aser yangji tenladak ka yanglu (Lipok 12:1-9).  Herod chuba nok nungi kümzüktsü, Yosep aser  Mari nati kinü tanur Yisu Egypt limai anir ajen aser yangji Egypt nunger den ali. Mosa and Aron nati anir Israel nunger Ijip lima alar tia nungi  aniteta Kanan limai anir ao. Yamaji aienlen jajaba otsü aika dang lir.  Anungji taküm kümzüktsü, taküm jenjang tajungba ngutettsü asoshi alima balala bushia aobaji tim, saka shi jangratem bushia meimchir shishilembaba oset-tsȕset amai, Tsüngremi moatsüba sobaliba tetezü makai, aser Tsüngremi yangluba tobur tajung lima mapayui raksaja, meneja senzübaji tai ta Laishibai sayur. Laishiba nung shi jangraba bushia jajaba aser lokti dang teraksa bener arutsüba kuli aika angur.

Mezüngbuba nung, Tsüngremi meimchir – tetsür-tebur – ajak Tsüngrem mesükba nung yanglu (Lipok.1:26-27). Tsüngrem tashi ajanga taküm lidaktsür and taküm ajak Tsüngrem meyong.  Tsüngremi yangluba taküm kaji shingaia agientsü makok, akhüm metsübui amshitsü makok; alar ama benshitsübaji tai. Ajak meima, akhümtsübua amshitsüla. Tsüngremi yangluba taküm ka sen yong ayokba aser alar ama amshibaji Lai tesayuba masü. (Anitet 22:25-27, cf. Züng. 15:12-17, 24:6,17).  Tajangzük aser shi jangraba atalokdaktsütsȕ tetsür dak benshira, sobaliba akhümtsübo mesüi mebenshira, sensaker ashioktsüra commercial tourism anema noktaktsüla aser jembitsüla. Arogo aser tamanger teloki ibala mesükba ochimashi mapa anema tasü ita ochi nung nokdaktsüla.

Aener dang meimtsü aser aeneria lispour meimtsü Lai nung yamai angur. Levi kaket nung yamai shia angur, “Ne den aliba aenerji nai senso pur ka ama benshiang. Na ama parnok danga meimang, kechiaser nenok Ijip lima nung aener süa liasü.” (19: 33-34). Aener shirnok asen dangi arur, parnok tashioktsü, meimang, aser yariang ta ashir. Ano Anitet kaket nungji yamai ashi, “Tangar dang ayoktsü mesüra pei kidang alar ama ayutsü asoshi shibai nisung auyadir, pa atangji südaktsütsüla” (21:16). Tenyar Paul-i Rom nunger dangi yamai zülu, “Kati ka den meimtepang, saka shinga dang sentsühtsür teküm, kechiyong shibai tangar meimer, pai ozüng atalokdaktsüogo. … “Nai nüktapangta tebenshi, nai tetepset, nai tauya, nai tenükshi”… nai ne kiyonger pei ama meimang. Temeimi kiyonger dang majung meinyaker …” (Rom 13:8-10) Meimchir tajangzük, takar kar tajangzük asoshi nisung kar alar ama mapa inyakdaktsüba, pei temang ayokba, sobaliba akhüm metsübui ayokba mapatemji tai. Tourism industryji nungdak, saka lisopuri aener dang koma benshir? Aener shirnok rongsen aika akaba yong shi jangratem bushia senzür, parnoki lisopur oset-tsȕset ama mamshitsüla, mereprangtsüla aser pei shi jangratem atema alitsü memerangtsüla.

Tanabuba nung, Tsüngremi taküm ajak poktetdaktsü. Tobur tajung lima aser yangji alibatemi Tsüngrem mulungjang sayur. Tsüngrem tashi ajanga anüng-ali taküm lidaktsür. Tsüngremi yanglu aser Pa item ajak madak kibur asü nungji, nai aser ni sen arishia itemji mashimashi raksatsütsü makok. “Alima aser yangji aliba, alima aser yangji alirtem Kibuba meyong lir. Kechiaser pai aji tzüyim manung, aser ayongtem manung yanglu” (T. Ken 24:1-2). Meimchir ajak nem Tsüngremi yanglubatem timi achaayangtsü khuret aser temeima asen nungdak yari agitsü moatsü, saka kibur küma raksatsütsü, tayoktsü oset-tsȕset ka ama amshitsü magütsü.  Tsüngremi yangluba ali, tzü aser mopung ajanga taküm ajak lidaktsür  anungji sen tajangzük asoshi Tsüngremi yanglubatem mapayui raksatsübaji lendong ta angateta Jubilee amongtsü Tsüngremi ozüng agütsü.  Ali, shiruru aser alar nem anisüngzük agüjang ta ashiba tetezü, meimchir taginüba, shi jangratem bushiba tatakzük ka alitsü akhanger.   Saka tanü takar ishikati dang, mesüra takar lima nung company kibur ishikati dang Tsüngremi yangluba alima  aser yangji aliba rongsen bendenadokba ajanga nübur aika alar tia nung yuja lir. Iba yongji Tsüngremi “teyangluba lima ajonga tang tashi külemi timtem tekangshi nung anünger ta asenoki metet” (Rom 8:22). Tsüngremi yanglubatem timi achaayangtsübaji meimchir nem khuret agüja lir. Tourism terenlok mechi sensaker ket nungi Tsüngremi moatsü teyanglubatem rakzüktsü makok.

Anungji tourism industry ajanga takari Tsüngremi yanglubatem taochi makai raksaja, nübur madak tashiyim amshira iba anema ainkar ola adoktsü akhanger.  Hornbill festival ajanga shiba aser shirnok tajangzük angur? Naga nunger ajonga tajangzük angur asü masü? Yimtaklir tajangzükba lir mali? Kobala tajangzük ngua ali? Aener shirnoki asen lima semdanger parnok koma anebalur? aser parnok dang asen sobaliba koma sayur? Hornbill festival tenüng nung Kohima aser Dimapur dang renloker asü, tanga district nunga kasaji terenlok mapa odagi? Temesepba, achi-ajem mazüokba, shi memerük tali adokdaktsür asü?  Yi mayoktsü nokdangba agi asü, hornbill festival ajanga teraksa teimba bener arutsü? Sen mechi asen sobaliba akhüm metsübui amshia ali asü? Arogotemi, ABAM aser NBCCi tajangzük aser tesaksa bushidanga lir asü mali? Shisadangi.

Teyanglushitsü mapa kar

Temalen shisemba ama, commercial tourism industry asen den alitsü. Ashiko tiemba züina aotsü shibai metet. Nagaland nung tanga industry mali nungji, tarutsü nung iba industry dak metaloker Naga nunger aika alitsüsa akümtsü. Nübur sensaker anungji parnoki pei temang, sobaliba aser Tsüngremi yanglubatem ayoktsü, züp ta azüoka yutettsü,  aser takar aser Government tajangzük angutsü ta ajiteta tourism renlokdaktsütsü merangtsü. O tajung jembia,  bangtak yimsüsüri ashitsü, iba industry tashi ita kümdaktsüba ajanga alima nübur balala rongnung yimchiyimjung, tangatetep, amalitep maparen bener arutsütsü lemang aika lir; aser meimchir lokti balala rongnung tesendaktep tajungba bener arutsütsü ta ashitsü.  Saka ya metetdi: Sen aser tajangzük bushiba industry ka asü nungji, mekümdangra teraksa aika bener arutsüsü ana nung dang lir. Iba industry asen den alitsü asü nungji koda tajungba aser lokti ajak ajangzüktsüsa, talisa sensakertem ajangzükdaktsütsü, koma yanglushi nung ajungtsü iba nükjidong nung nüburtemi ola adoktsütsüla. Tebilemdangtsü kar: 

  1. Takar kar, kin ka-ana dang masü, saka nübur ajak tajangzük asa-sentong yanglutsüla. Talisa sensaker koda sür ajangzükdaktsütsü, taliba jenjang tajungba kümdaktsütsü ta asüba maparen ajungmesotsüla aser teyari agütsütsüla.
  2. Terenlok maparen, tourist aruba tesem, tat. agi Kohima, Dimapur dang masü, ajak lirumedema tejakleni renloka odaktsütsü mapa inyaktsüla.
  3. Lisopur sobaliba tajungtem sayutsü, akhümtsübua amshitsü aser wakzüka ayutsü sentong asütsüla. Asen sobaliba ajanga alima rangben dang yimjung aser tesünep bener arutsütsü iba wain-shin maparen angazükdaktsütsüla.
  4. Tourism terenlok mapa balala ajanga lisopur aluyimtsü makai ali, arem, ayong, awatsüng, tenem balala governmenti tashiyim agi magitsüla. 
  5. Tourist guide tajunga shima shi jangraba bushia jajaba pur dang lokti taküm nung teraksa adokdaktsüba maparen meinyaktsü ajungshitsüla aser sayutsüla. Temulung melenshir tangazükba tasen nung pei lima meyipa aotsüsa asa-sendong lisopuri inyaktsüla.
  6. Tenem nung dang masü, saka tenem tsünglen yim küma, aluyimba mapa balala tenzüktsüla. Kisama nung hornbill anogo 10 amongba amai dang masü, tesem balala nung ola-angla mapa sayuba, chiyungtsü tapu tapu yangluba, sobaliba dak sendakba sayu, art balala, naro tsüki, süngjang lu, süngdong tapu balala, ozü amongdak, shiruru balala, enrivornment kümzüka ayuba atsü, ibala mesükba aika yanglutet. Rongsen dang arishia masü, shisatsü angazükdak tourist tesem tajungtiba lima ka südaktsütsü mapadong balala Government, arogo, yimtsüng shiai inyaktsüla.
  7. Shi jangratem bushia senzür kisüng dang masü, saka shisashiba tasen bushir, sai-sapong, yimtsüng taküm aser libaliro angazükdak, aser tanela asüngsahiba tourism tenzüktsü ajungshitsüla.

Aeiner anir senzürtem nem training tajung, tat. agi.  sobaliba, otsü, ola-angla tetezü balala aser koda akhümtsübua amshitsü, ibala sayutsü asoshi lanurtem mapang shia training tajung agütsütsüla.