29 buba MDCA Inter-Club Cricket Tournament ayongtsü atema MDCA o Titans Club tsüngda tenangzüktep ka agir külen, telok ana nungi ketdangsürtem külemi tangokba noksa nung angur. Mokokchung, February 13, 2021  

29 buba ‘MDCA Inter-Club Cricket tournament 2021’ Mokokchung District Cricket Association (MDCA) akhüm kübok Titans Club-i ayongzüktsü tanü officially tenangzüktep (MoU) ka Feb 13 nü yangi Same Old Place Restaurant nung agiogo.

                ‘MDCA Inter-Club Cricket Tournament’ ya T20 yimya nung MDCA-i kümshi ayongzüka akar aser takümji Titans-i iba asayamung ya parnoki ayongtsü maongka meshia asüngdang nung, tatsü-talang ajak asadanger parnok nem iba khuret lemsateptsü lemteta liasü, ta MDCA tir, Imlikumzuk-i osangbener senden ka nung metetdaktsü.

                Iba tournament nung MDCA-i arishi küm telemsa/tasazük balala atema asayar tajungtem shimteter aser Inter-district tournament akaba mapang District meyonga asayadaktsür. MDCA ya Nagaland Cricket Association nung züngokba Association ka lir aser NCA ya 2019 küm to Board of Control for Cricket in India (BCCI) nung züngokogo, anungji, maparen ajak BCCI tetuyuba nung ajemdaker inyaker, ta MDCA tirisa shisem.

                MDCA tenzüker tanü tashi arudang, district nung cricket asaya ajungketba den lanurtem nem maongka balala lapoktsüba maparen jenti inyaka arudaki, aji oda, ano arishi küm tasazük balala atema coaching den ano tanga nungdakba mapa kar inyaktsü tebilemba lir, ta MDCA tirisa metetdaktsü.    

                Titans ya MDCA kübok züngsema aliba club tajung ka lir, parnoki küm 4 tashi MDCA Inter-Club Cricket Tournament benogo aser par telok yagi cricket asaya nüngtugu kümdaktsütsü aser ajungkettsütsü asoshi kanga meranga inyaker aser parnok iba asayamung ya junga ayongtsü onoki tamang akar, ta MDCA tirisa ashi. Titan Club den MoU ya taküm 2021 küm asoshi lir aser ibai tetendangba mapang ka asütsü, ta paisa shisem.

                29 buba MDCA Inter-Club Cricket tournament-ji tan ita Feb 22, 2021 nungi tenzüktsü sentong renema lir aser onoki iba asayamung ya tajungba kümdaktsütsü aser asentenshitsü nükjidong nung MDCA dang iba asayamung ayongtsü asüngdangba ama, parnoki maongka tulu agütsüba asoshi parnok dang pelar, ta Titans Club tir, Imsuwabangi metetdaktsü.

                Onoki taoba mapang tournament tila karbo ayongogo saka tang ama tournament tulu bo ibai mezüngbuba asütsü, anungji, nüburtem nungi tenungitba aser teyaritep kanga nungdaktsü, ta Titans tirisa mepishia ashi. Taküm iba asayamung nung takok angur champion aser runner-up den ano nija senpet balala agütsütsü tebilemba lir, ta paisa shisem.

                29 buba MDCA Inter-Club Cricket Tournament nung shilem aginür atema Feb 15, 2021 nungi tenzüka Mokokchung Lovely Centre (Police Point) aser Fix & Fixation (Yongpang Market) dokantem nung form angutsü aser form-ji Feb 20, 2021 tashi nungbo meyiptsütsüla. Kari iba asayamung dak sentakba nung osang tejangja metetnüra iba number – 9089927155/8787613893 ajanga tayongertem tongtettsü.

(Source: Tir Yimyim)