Laishibai sayuba ama ochi nung Naga lima yanglushitsü nungdak ta ajiteta temulunger  “Yanglushidi Sensaksem Sabang (YSS)” ta  telok ka tenteta mapang shia shisatokden sensaksem akar.  2021 küm mezüngbuba shisatokden omen “Naga yimden latet tebilemtsü nung Laishir ola” nung Prof. Imchayanger, Dr. Sentiwate Aier, (Dr.) Shiluienla Jamir aser Rev. Dr. Alem Lemtur parnok pezüi jembia liasü. Parnok den semloka sensaksem lenir Dr. Lolen, Pastor (ABAM President) aser Mrs. Lemdila Peter, Mokokchung yim, tenatia tanü Naga lima tebilemtsü, teraksa aser teyanglushitsü aika benoka jembi. Saka yangi shisatokden nung lemsatepba olong kar lemsar.

YSS nung adener ajak ola kaji Naga lima tejakleni odaktsünera ochi dangi meyiptsüla. Aji Laishir aser arogoi anir ainkar ochi ola adoktsü mapang tongogo. Naga yimden telatet indang jembia arur joko küm 70 jungogo, saka tanü tashi yimden latet kati marutetbaji ochimashi aser telungjem maliba ajanga lir. Sen meimba, tenük merem aser kin-ka anati dang lenisüba  amokbanger yunüba jakla ajanga telemsa adoker. India nunger dang aitsütsü nungdak madoker, saka Naga nunger Tsüngrem bushia ochi dangi meyiptsüla. Ochiba kimong sür yimden meyanglushira, Naga nunger aiatai jenjangi aitsü ana nung dang lir.

Nüchisoji Tsüngrem nungi tenzüker. Tsüngremi meimchir shia nüchiba nung yanglu, anungji shingaia Tsüngremi agütsüba nüchi senmangji agientsü makok aser arakmoka ayutsü makok. Alima yimden-yimli putu balala melenshia arur aser tarutsü nung nation-state tesendaktep, aser tanü asenoki benshiba loktii mulungba yimden yayim ya kobika, koda melenshia aotsü shiangaia meshitet. Ano nüchiso akaba kin/alinük ka atsüngteta bendanger yimsüsüba küboki anir aitbaji alimai aitsür  aser kin tulutemi tashiyim agi matsüngdoktsüla ta tangatetba nung aoba putu ka lir. Kobala yimden temelenshi arudir arung, Lai nung kechi ochi o zülua lir aji memelenshir. Anungji Lai tesayuba dak ajemdaker ochimashi mapa balala ajanga kin ka tashiyim agi arakmoka ayutsü merangba mapa aser asalendong anema ochi nung nokdaktsü Laishirtemi metsübur. Ochi nung nokdaktsü aser taküm tenla agütsütsü.

British nunger marudang nungi, Naga nunger bendanger yimsüsüba kübok kodanga lia maru aser iba putu “Naga” kin ta tejangja latet ka makai aru. Tetsü-tebou putu nungi Naga nunger nüchi nung aliba, India nüchiso ngur külen tashiyim agi India yimsüsüba küboki anir ait ta aija jembir, aser aji tai ta ashitsü makok. Saka tanü putu nung Naga nunger India den tesendakep maka aser teyari magi melitettsüba jenjang ka nung lir. Tarutsü putu Tsüngremi kechi mapang bener arutsütsü aji shingaia meshitet, saka tanü GoI aser nüchiso bushir sensaksem isab nung Naga nunger nüchiso mangutsü. India teyari maden Naga nunger tejakleni motettsü ta tema nung alir Naga sorkar aser telong nung alir anapronglai angateta, joko Naga yimden latet tatembang onük Naga nunger wako (flag) aser Temzüng (constitution) balaka agüjang ta takhangba o atsütepdar ta osang ajanga angazüker.  Saka ibajia magütsütsü südi.  Koba yimden latet südir arudir aru,  Tsüngremi kija, lokti  Tsüngrem mesükba nung yanglu. Tzü-mopung, ali  sobaliba aser oshi balala moatsü. Itemji wazüka ayutsü nokdaktsü. Lokti ka tejakleni odaktsütsü, yimjung yanglutsü aser lokti nung ochimashi, tashiyim mapa aser sensaker ajemoka yutsüba asalendong aser maparen anema Laishiri ochi kuli asütsü.

Nüchiso bushir, talisa NSCN-IM teloki, socialism or communist tesayuba aser maparen dak ajemdaker aotsü jembia arur. India-i Naga nunger temzüng balaka ayutsübaji memelatsü akok; melayonga Naga nunger Temzüngji communism ideology amai bener odi asü nungbo Naga nunger dak mapettsü. Temzüng kobai kija aser kin ka “freedom” alenbanga yudir ibajibo tai ta Laishirtemibo shiteter. Yimjung melena kiralongrar aika adoktsü aser iba jagi lokti nung taliang teraksa bener arutsütsü ta ajiteter.

Taoba mapang leniri “Nagaland for Christ” ta amshitsü lemtetbaji putu balaka, saka tanü putu yamaji amshitsübaji tim masü ta ajiteter. Iba yagi tamangba aser yimden tepila maka amai sayur aser Yisu Khrista tenüng mashi nung amshiba ta sayur. Ano deobarnü mesüra benjongbentsü nung dokan lapoktsü-melapoktsü ozüng agütsüba ya tim masü ta NBCC aser ABAM-i koba sangdongogo aji shitak ta agizüker. Baptist tamangi sayuba ama, aser Laishibai yimden aser arogo tepila tejangja lateta ayutsü sayuba ama arogo aser yimden inyakyim aotsüla.

Naga  nunger yimden aser arogo nung  “politics of exclusion”, tetsür metendaktsüba ochimashi sobaliba ka lir.  Naga hoho aser Ao Senden nung tetsür metendaktsür. Ibai ochimashi tera tulutiba ka ta angatettsüla. Naga nunger nüchiso indangbo jembir,  saka tetsür atsüngina yutsüba ochimashi indangbo mejembir. Koda sür 50 % nütsüng tebilemba  magi Naga yimden latettsü? Iba ochimashi sobalibaji melenshitsüla. Iba “culture of exclusion and erasure” ya memelenshi nungbo tetsür atema nüchiso jenjang makatsü. Lai tesayuba tamendakdakji tetsür-tebur ajak nüchiso, ajak tekümtet ta asüba ya lir. Iba “inclusive” aser “justice” nung ajemdaker Naga yimden latet indang jembitsübaji Laishir tangatetba lir.

Nagaland nung corruption ya tera nungi atsüteta meindokra, Naga lima tejakleni maotsü. Naga nunger ajak Khristan dang, saka Khristan jakla mesayutetba ajanga alima raksar. Naga nunger corruption nungi nüchiso tama angutsüla. Corruption anema Laishiri odia tasü ita pulpit aser lokti balala ajak nungi jembitsüla. Talisa, tatashim nung temelenshi asoshi ochi ola adoktsü tim.  Sen agi meyongnem ayokba, senso candidate ta tashiyim agi declare  sür telok kati telok ka arishitepba, senso nungi aridokba, züktepba, ki-o-jen raksatsüba, coup asüba mapa tamajung yagi Naga lima nung lokti mulungba yimden  bener mouteter. Ya mojing mapa ta angatetdi. Takar, yim tulu, kidong tulu, jopurjosti inyaktetteri dang tata menden nung amentettsüsa mapang ka bener aruogo. Anungji corruption nungi, talisa election temenen nungi, koda nüchiso ngutettsü iba indang maneni February, March aser April shisadokden akatsü terenemba agiogo. Tatashim temenen anema Laishirtemi nokdaktsü olemtep akatsü aser ajaki shilem tajung agidaktsüner ta ayongzüker.

Sd/-

Tezülur: Rev. Nungshi Pongen, Aliba

Rev. Dr. Wati Longchar, Serampore