~ Wati Longchar (Serampore)

Tetsü Oshi aser Kin latet

Meimchir shilu/kin balala, tat. agi, Ao, Konyak, Phom, Sangtam, Lotha, a.a ta jangja janga ayak benteta yudaktsübaji “Oshi”, “Ali” aser “Sobaliba-Tamangren” ajanga lir. Tetsü oshi balala jembiba ajanga shilu ka nungi ka tepilaji sayur. Item senmang asem rongnung kodang ka danga samadokdir, kin kaji tesama akümer. Senmang asem rongnung yangi “tetsü oshi” indang shinür.

Kodang “tetsü oshi” ta südir nisung ka sozükli mezüngbuba tetsü, tebu aser kinungeri jembiba oshi dangji ajar. Iba oshiji kidang jembir aser aji jembia tanur ka intetdaktsüba dangji “tetsü oshi” ta ajar. Tetsü oshi jembir jagi ojang (vocabolary) tasen bendenloka tangatetba tasen agütsür, tat. agi meyongnem (vote), talangngu (telescope), amerlongtsü (bicycle). Tetsü oshi ajanga tepela, tejashi kecha tetsükdak makai jembir, ken-ten menü, sayu o aser tebilemba sadok sadoka lemsateper aser rasaa shiteter, parnok dangji tetsü oshi jembir ta ajar. Tetsü oshi ya meimchir rongnung tesendaktep adokdaktsüba oshi dang masü, saka tetsü oshi nungji shisatsü, wain-shin, tamang sayu o, aser sobaliba tera yanga kar. 

Tanü alima nung zülumen akaba oshi 7,117 lir ta ashir (zülumen makaba oshia aika lir). Alima nung nütsüng teimtibai jembibaji English aser Mandarin (Chinese) oshi ana ya lir.  Mekümdangra 40% oshi mapang tasüka nung samatsü jenjang ana nung lir ta ashir. Oshi 20 shi tanü nisung 15,000-25,000 agi dang jembir; oshi karbo nisung 5000 tekübok agi dang jembiba lir. Itemji küm ishika tsüngda nung oren ishika (tat.agi, anepdang tajung, chiyunger na, salem, ni na meimer, a.a) ta mamaba dak alaka mejembiteti samatsü ta ashir. Euchee oshi (Native American oshi ka) parnok asemi dang jembir (otsüla, ojala aser jabaso) ta nisung ka ajuru, saka Osep zülutsü meranger ta ashi. Kodang nisung 10,000 shi agi oshi kaji jembidir, parnokji kin ta ka kümteta yim balala nung liakasa putu ka-ana nungbo iba oshiji samatsü ta ashir.  Tanü Ao oshi, Naga nunger kin balala oshi koba jenjang nung lir?

Oshi Jenjang Asadangba

Joshua Fishman-i tuyuba oshi jenjang asadangba den Naga nunger oshi koba jenjang nung lir medemdangtsü akok. Pai Level 8 nungi 1 tashi yamai sayur:

Level 8            Tetsü oshi otsüla o oboula nunger rogoi dang jembir. Lanurtemi mejembir (Tetezü tetsü-tebou arishi tembangba den iba oshiji küm 20-30 tashi nungbo samatoktsü).

Level 7            Kijung lanurtemi tetsü oshiji parnok o parnok tsüngda jembir, saka pei chir den mejembir, aser mesayur. Tanuria tetsü oshi agi tsürabur den mejembir. Tanur tsüngda nung pi oshi agi dang jembir (Tetezü tsürabur arishi tembangba den iba oshiji küm 40-60 tsüngda samatsü)

Level 6            Tetsü oshi yimkongi jembir aser tetsü oshiji tanur ajak nem angazükdaktsür (Tetezü iba oshi küm noklang tema alitsü)

Level 5            Tetsü oshiji kin ka ajungai jembiba den kaket-ken-o adoka kin ka ajungai amshir. (Tetezü iba oshi putu aika alitsü aser tashi itta renloka aotsü lenmang sayur).

Level 4            Tetsü oshi ajanga kaket riju nung sayutsütettsüsa kaket aika zülua lir aser tetsü oshi agi dang sayur (Tetezü iba tetsü oshiji mesamatsü)

Level 3            Aseni jembiba oshiji pa/lar kin rongnung dang masü, tanga lima (Tat.   Assam, West Bengal, Germany, America lima amala) nunga mapa balala inyakdang jembir aser tangaria angazüker (Tetezü kin ta rongsenren, aser shisaliok balala renloka aoba ajanga tangari angazüktsü merangba, international language akümba) 

Level 2            Oshiji local nung dang masü, saka regional (e.g. NEI) ama nung telok balalai lokti tongtepratep (mass media, osangtsüsang e.g. radio, t.v, etc) nung jembir (Tetezü, Assamese, Bengali, Telegu, a.a. nisung aikati sabua jembiba aser angazükba)

Level 1            Oshiji kaket riju, mapa inyakdak, mass media, government mapa ajak nung, country ka rangben nung jembiba aser agizükba (Tetezü aseni jembiba oshiji official national language akümba)       

Asenok Naga nunger rongsen renlokba mapa (industry balala lapoka aoba) aser shisaliok nung Korea, Japan, Chinese, Germany, US, a.a. ama mekümra Naga nunger oshiji level 4, 3, 2, 1 tongtettsü makoktsü. Tat. agi.,  Korea aser Japan ya alima tila, saka parnok rongsenren kanga renloka ao nung par oshi angazüktsüsa akümer; China nungeri oset-tsüset aika yanglur aser shishilembaba maparen alima ajonga nung prokshia oa ali nung, nisung aikati Chinese oshi angazüktsüsa akümer.  German nungeri shisarajem kaket aika, talisa Laiputi kaket aika zülua ali nungji, research agidang parnok oshi angazüktsüsa akümer.  Level 6 aser 7 jenjang nung Naga nunger tetsü oshitem teimbaka lir aser mekümdangra level 8 aser 7 jenjangi atutsü ana nung dang lir. Naga nunger tetsü oshitemji Level 8 aser 7 jenjangi koda sür metudaktsütsü iba lenmang bushitsüla aser koda sür tetsü oshi wazüka ayutsü ibaji aroka bilemtsüla.

Kechiba Tetsü Oshi Tongtibang?

Tetsü oshi ya Tsüngremi meimchir nem agütsüba sempet tulutiba rongnung ka ta metettsüla. Meimchir rongrong tesendaktep, temeimtep aser tangatettep adokdaktsütsü Tsüngremi oshiji moatsü. Küm ishika süia ogo, ni America nung, Assam nung missionary inyaker aoba tantsür ka ajuru aser lai “Apuar nam ke ase? Ami Golaghat de beshi posor takeshe” ta ashidang tsürabur tajung ka ajurur ama bilem. Taiwan nung alidang küm ka shi Aor shinga majuru aser tejak o tejak jetepba Ao oshi mejembi rongjenseta alidang Mokokchung nung soa ainba Nepali nunger ka ajurua, Ao o agi asen lima nung atalokbatem sensaksema amendang kanga dang pelaa bilem. Oshi ka ajanga kinunger mesüra yimer ama tesendaktep adokdaktsür.  Oshi metetba ajanga ainer kajia pei nisung ama agizükdaktsür aser nübur tsüngda tebendang samadaktsür. Bendang lima nung asenoki kodang lisopur oshi mashi mashi ka dang süaka jembidir, idangji parnok pelar aser tesendaktep tajungba yangluteter. Anungji oshi ajanga kin ka ayak (identity) agütsüba dang masü, saka nübur rongnung temeim, telungjem aser tesendaktep adokdaktsür. Ano oshi jagi putipuyang, wain-shin aser sobaliba aroka kümdaktsür, ratettsür aser kaket-ken-o renloka kümdaktsüba ajanga tarutsü putu asoshi shisatsü rezünga yutsür. Yamaji oshi renlokba ajanga kin ka tejakleni odaktsür. Tanü alima aika nung tejangja “tribe” ka ta sayutsü asoshi ishitiba agi nütsüng yongsük 2000-5000 tashibo akatsüla aser tejangja tetsü oshi jembitettsüla ta ashir. Tetezü, oshi ka kümteta makara kin kaji tesama akümer. Oshi ajanga ni iba kin ta shitetdaktsür.

Tetsü Oshi Samaa aoba Kuli kar

Taoba putu küm 300 tsüngda nung alima nung tetsü oshi 500 shi samaogo ta ashir, aser ano küm ishika tsüngda nung aika samatsü jenjang nung lir ta ashir. Tashiyim agi tangar lima atsüngteta yimsüsüba putu (colonial rule – Arakmoker kin yimsüsü putu) talisa temesüng nungeri alima atsüngteta aodang lisopur aika tepset. Alinük kar nungbo kin ajunga meshimeshia atsüngdoker alimaji agiyonga ao. Arakmoker kin (colonizer) yimden yimsüsüba tasen nungji lisopur azüoka ayutsü asoshi par sobaliba melenshidaktsü aser mamshidaktsü. Iba dangji sobaliba arakmoker (cultural colonization) ta ajar. Tetsü oshi meshimeshia mesamadaktsüra sobaliba arakmoka ayutsü makok, kechiaser tetsü oshi nungji lokti taküm, sobaliba wazüka aser tera yanga taküm lidaktsür. Anungji tetsü oshi samadaktsütsü asoshi arakmoker kin, talisa British, Japanese nungeri tashiyim agi yamai inyak:

  1. Hostel nung tanurtem oshi balala jembir anitena ayutsü aser arakmoker oshiji angazükdaktsütsü. Pei tetsü oshi jembira merenshitsü. Tsürabur-adianu den kümsa küm, pei oshiji mama tashi, majurutepdaktsütsü. Tetsü-tobu sobaliba aser oshi jembibaji maksü amai, luja, nemja tanurtem kolok nung enoktsütsü aser angatetdaktsütsü.
  2. Lokti senden, shisaliok riju ajak nung tetsü oshi ozüng agi mejembidaktsütsü. Ozüng raksartem dang senchi achitsü aser merenshitsü. Tamangba lokti senden balala, shishilemba maparen, office nung, bendanger arakmoker kin oshiji dang jembitsü melatsü.
  3. Arakmoker kin oshi nung tanurtem tenüng (Wilfred, Augustine, George, Sylvia, a.a.) yimtitem tenüng, ayong, tenem, lenmang, lenjem arakmoker nüngja agütsütsü, melentsütsü aser lisopuri tetsü-tobu putu nungi tetezü kaa amshia aruba temaitsü (symbol) kecha tetezü makaba noksatemi melentsütsü.
  4. Shisaliok riju nunga arakmoker oshi agi dang sayutsü aser kaket-ken-o adoktsü; tetsü oshi nung kaket adoka lira itemji bendena rongdoktsütsü
  5. Arakmoker amung-tsümong aser benjongbentsü tashiyim agi mungdaktsütsü aser aji par yimsü ama kümdaktsütsü.

Yamaji arakmoker kini tashiyim agi inyakba ajanga Australia, US, Canada, Argentina, Brazil, Taiwan lima ama nung lisopur tetsü oshi aika sama ao. Pei tetsü oshi agi tenünga sünga mejadaktsüba agi Taiwan nungbo “Return our Name” ta lisopuri longkak aita takhangba liasü. Tanga lima nung atalokba ama British nunger yimsüsüba mapang Naga lima nung matalokba asoshi Tsüngrem tenüng sangdi. 

Akhi putu nung arakmoker kini inyakba ama tanü Govermenti “national integration” tenüng nung nübur teimbai jembiba oshi tashiyim agi angazükdaktsütsü merangba angur.  Tat. agi, Myanmar nung Government school nung Burman oshi dak alaka, school nung tanga lisopur kin tetsü oshi mesayudaktsür aser mejembidaktsür. Lisopur tetsü oshi (Kachin, Chin, Mon, Karen, a.a.) oshitem ajak Sunday School nung dang sayur. Kasaji Cambodia nunga Khmar dak alaka kin balala tetsü oshi sayutsü memelar. India nunga BJP yimsüsüba kübok “One Nation, One Language, One Religion” ajungkettsü tangatetba nung tashiyim agi Hindi angazükdaktsütsü aser jembitsü telemtetba anema ola adoka arudagi. BJP yimsüsüba kübok India nunger ajaki Hindi aser Hindu tamangba yimsü dang angazükdaktsütsü aser benshitsü sentong aika benokba asenoki ajangshia arudagi. Ashiko, küm ishika BJP yimsüsüba kübok dang ali nungbo, küm ishika tsüngda nung  Naga nunger tetsü oshi aser sobaliba samatsü ana nung dang lir.

Naga nunger rongnung Oshi tasen ana Terenlok

Nagaland nung English aser Nagamese kanga karaa renloka kümdaki aser ibai ajanga tetsü oshi rajang kümdaktsütsü ana nung dang lir.  Naga nunger kin tila, saka oshi aika jembir asü nungji, Naga nunger o Naga nunger na tsüngda tazüngla tulu amai liasü. Yongji English 1967 official language agitsü Governmenti renemba sülen nungi English karaa renloka odagi. Tashir o tashir na tsüngda, aser official, media, kaket-ken-o nung kanga renloka odagi. Ano shisashir aika akümba ajanga English oshi aikati jembiteter. Joko Nagaland nung English oshi jembir 50-60% asütsü südi.  Putu ishika tsüngda nungbo lanurtemi English tetsü oshi amai jembitsü aser zülutsü südi.

British nunger aser missionary marudang, aser Roman zülumen mekümtetdang, Naga nunger ajak sendakteptsüsa Assamese nunger nungi senmang tulu ka angubaji Nagamese ya lir. Ibai temoatsü tulu ta Assamese nunger dang pelatsüla. Ahom chuba yimsüsüba mapang nungi Naga nunger, talisa Ao, Lotha, Phom, Konyak nungeri Assam lima nung shishilembaba, kibalembu aser akhang temba ayimba ajanga oshi angazüktepa aoba otsü azünger. Ano Nagaland state ngur jila kümteta aoba, office balala kümteta aoba ajanga, küm ishika tsüngda nung Nagamese karaa ainba angur. Tanü Nagamese nung anogo shia osang kaket adoker, radio aser TV ajanga osang agütsür, osep kaket, Tasen Lai (tang Tejen Lai meyipdagi), ken kaket, school nunga Nagamese agia sayur, sayutsünger, sarasademer, ken mejema atener. Joko Nagamese jembir arogoa 89 tashi züina akümba ajanga Nagamese Churches’ Association ta tenzüka maparen balala achaayanga arudagi. Yimtak-yimtsüng nung tantsür-tambur kar dak alaka ajaki Nagamese jembiteta kümdagi. Kin balala kibalembu, jila nung meyoktepa aliba putu asü nungji putu ka-ana tsüngda nung Nagamese ya Naga nunger ajaki jembiteta akümtsü südi. Naga nungeri Naga nunger kin oshi sabua mangazüknütsü. Taoba putu, Angami nunger oshi  den meküttepa aliba kin aikati jembi, saka tanübo tantsü-tambur dak alaka lanurtemi Nagamese teimba jembir. Kasaji Ao oshi Eastern Naga kin aikati jembi, saka tanübo lanur aikati mejembir. Tarutsü nungbo Nagamese ya Naga nunger ayak oshi akümtsü. Ashiko, tanü amai dang Nagamese renloka ao nungbo küm 50 tsüngda nungbo Nagamese ya official language akümtsü shibai metet. Nagamese renlokdaktsütsübaji tongtibang aser sabua amshitsü nungdak.

English aser Nagamese renloka aobaji Naga nunger ajak asoshi tajung aser renlokdaktsütsü lenmang bushitsüla, saka lendong kaji English aser Nagamese renloka aoba ajanga pei tetsü oshi mesamadaktsütsüla. Nagaland nung English School kar nung pei tetsü oshi jembiba agi merenshiba, fine agiba aser tanur maaksüdakja temerenshi agütsüba otsü lir. School kar nungbo pei tetsü oshi jembir dang küm piyong sarutenba fine agi ak alia Khristmas benjong achiba otsü lir. Tetezü taoba putu arakmoker kin-i ozüng tesashi amshia pei tetsü oshi mejembidaktsüba amai asen nisungi pei tetsü oshi anema inyakba angur. English junga jembira “ner chir yabo kanga smart aser tekolok tejera” ta jembir; English shira alima ajonga nung mapa inyaktettsü. English junga mejembitetra “bostiwala” ta luja jembiba. Item ama mulungsentsü ajanga lanurtemi pei tetsü oshi angazüktsü mejangrar. Nagamese junga jembitetra, Nagaland aser Assam nung senzüsempongtsü kecha tasak mali ta tangatetba nung Naga nunger oshi masü, saka Nagamese-ang angazüktsü meranger.  Anungji mekümdangra pei tetsü oshi putu ishika tsüngda nung samatsü südi. Naga nunger oshi kin ana-asem ka dak alaka, College & University level nung degree ngua züngtettsüsa tetsü oshi nung kaket-ken-o peria mali. Naga nunger kin shibaisa pei kin ta ayak jangja janga yunera aser tejakleni odaktsüner pei tetsü oshi wazüka ayutsü sentong balala yanglutsü nüngdak.

Khristan Tamang aser Tetsü Oshi Terenlok

Roman Catholic anema Luther, Calvin, Züngli aser tamangdir aikati anir Arogo Teyanglushiba (Reformation) putu nung mangdang kaji – nütsüng shiai pei tetsü oshi nung Lai züngdaktsütsüla ta asübaji liasü. Laishiba ya Tsüngrem O, tekümtet lenmang tejangja sayuba kaket ka, Laishiba pei tetsü oshi nung  azüngba ajanga dang tekümtet ngutet ta angateta, Protestant missionarytem koba lima aser shir kin dangisa Osangtajung sayutsü ao, par oshiji tama angazüka, Laishiba meyipzüka tamanger nem züngdaktsü. William Carey-i oshi 43 nung Laishiba meyipzük. W.C. Clark-i Tasen Lai meyipa, ken aser Ao osep adokdaktsü aser Ao oshi tarutsü putu asoshi kimung mesema yutsü. Miles Bronson-i Assemese oshi renloka kümdaktsü. Kasaji Angami, Lotha, Sema oshi nung missionarytemi Laishiba, ken meyipa yutsü. Alima aika nung Protestant missionary temulung agüja lisopur oshi balala nung Laishiba, Ken kaket aser Osep tepong küma kaket yanglua meyutsü ka asü nungbo arakmoker kin yimsüsüba mapang tetsü oshi aika teti asoshi samar lila ta jembir. Tanü Naga nunger rongnung kaket-ken-o nung koba jenjang tongteta lir ibaji missionarytemi kimung mesema yutsüba ajanga lir.

Laishiba aser Oshi balala

Laishiba nung tetsü oshi koda tongtibang iba indang kaket aika nung angutsü. Khristan ajaki meteta aliba otsü anaji Lipok 11:1-9 aser Tenyartem Mapa 2:1-12 ya lir. Lipok kaket nungji  Babel lungki yangluba aser Tsüngremi oshi babala lemsatsüba indang shia angur, aser Tenyartem Mapa kaket nung Tanela Temeshi ajanga oshi balala nung jembidaktsüba aser angatetba indang shia angur.

Lipok 11:1-9

1Alima ajak nung oshi ka aser o ka dang liasü. 2Parnoki anüdokleni aodang Shinar lima nung lenten ka angu, aser parnok idakji ali. 3Aser parnok kati ka dang ashi, “Arung asenoki ajongli menoka lungru merang ama rudi.” Parnoki lung melena lungru, lishi melen süngnaktzü agi. 4Parnoki ashi, “Asenok alima ajak len prokshia oa lir, asenok tenüng ayutsü asoshi yimti ka lungru agi anüng tashi tua yangludi.”

5Meimchirtemi yangluba yimti aser lungkiji reprangtsü KIBUBA alu, 6aser Kibubai ashi, “Ajiang parnok kin ka aser oshi ka dang jembir. Parnoki kechi mapa inyaktsü ali aji tangang tetenzüker, aser parnok madang kecha tamakoktsü malitsü. 7Asenoki ludi aser parnok o parnok na o jembibaji mangatetteptsüsa parnok oji benjatsüdi.” 8Anungji Kibubai parnok alima ajakleni prokshidaktsü, aser parnoki yimti yanglubaji anenadok. 9Iba yimti tenüngji Babel ta aja, kechiaser idakji Kibubai meimchir ajak o benjatsü, aser parnokji alima ajaklen prokshidaktsü.

Tenyartem Mapa 2:1-12

1Kodang tenemnübuba Benjong anogo atong, parnok ajak külemi tesem ka nung sentepa liasü, 2aser aoksa dang kotak nungi mopung tesashi aonba ama ola aru, aser iba jagi parnok mena alidak ki ajak asüng. 3Mi jangruba temeli ama parnok dangi adok aser aji lemsar parnok shia dak amenlok. 4Parnok ajak Tanela Temeshi agi asüng, aser Tanelai parnok nem jembitsü tashi agüja bendanger oshitem nung parnoki jembimeso. 5Tang anüng kübok aliba kin ajak nungi aruba, yimsü nung keta asenba Yihuda nungertem Yirusalem nung anena liasü. 6Kodang iba olaji aru, telokti külemi sentep aser süngmangtep, kechiaser nisung shiai pei oshi nung angashi. 7Parnok ajaki aoksa aser süngmanga ashi, “Ajiang, item tejembir ajak Galil nunger masü no? 8Ajangla kodaser asenok shiai asen pei pei oshi nung angashir? 9Parthia nungertem, Media nungertem, Elam nungertem, Mesopotamia, Yihuda, Kapadokia, Ponta, Asia, 10Frugia, Pamfulia, Ijip, aser Kurini meketa aliba tesem kar nung alirtem, aser Yihuda nungertem, aser Bendangertemi Yihuda yimsü amangertem, Rom nungi tesemdangertem, 11Kreta aser Arabia nungertem, Tsüngremer tesüngmangtsü mapatem asenoki asen pei pei oshi nung parnoki jembia angashir.” 12Parnok ajaki süngmang aser rata-a kati ka dang ashi, “Ya kechi tetezü?” 13Saka tangartemi atala-a ashi, “Parnok yi lanu agi mesepogo.”

Kechiba Tsüngremi nüburtem rongnung oshi balala lemsadakja, alima ajakleni prokshidaktsü? Kechiba Babel lungki parnoki yanglunü? Mezüngbuba nung, parnoki bendang lima, talisa Babylon (Babylon aser Babel ta asüba ojang ya tetezü ka dang) yimli kübok lungru ki tululu yanglua aliba dang nungi tuluba (anüng tashi tua) yanglutsü, ibaji ajanga putu aika asoshi parnok tenüng (Tsüngrem tenüng masü) mamai ayutsü; tashi toktepa, asüküma aser mezümeküma pei nüngsang bushi. Pei khonang masü, meimchir tashi dak tamang akaba masü, saka Tsüngrem sentsüwangshidaktsütsü akhanger. Meimchiri Tsüngrem tashi den toktepba, meinchir rongnung tetoktep ajanga telemsa adokba indang sayur. Tanüa kodang mapa tamajung nung toktepdir telemsa adoker. Tanabuba nung, iba putu shir kin-i bendanger yimli makteter par yimsüsüba kübok arakmoka ayu, par sobaliba aser oshiji dang jembidaktsü aser benshidaktsütsü. Oshi samadaktsütsübaji Tsüngrem sentong masü ta yangi angur. Tasembuba nung, yimti tulu yanglua yangji dang merenmeren alitsü jangraba angur. Yimti tuluba tuluba yanglua meimchir yangji dang linüba ajanga lendong aika bener arutsür (Covid-19 tashidak ama city nungi prokshiba kuli lir). Tsüngrem sentongji – alima ajungai meimchir prokshia oa alitsüla. Tetezü, oshi balala ya Tsüngrem atakatem ka masü, saka temoatsü ta sayur. Oshi aika alibaji Tsüngrem nungi temoatsü tulu aser wazüka ayutsü tongtibang ta sayur.

Tenyartem Mapa kaket nungji Tanela Temeshi tashi ajanga oshi balala jembidaktsüba aser angatetdaktsüba angur. Rom yimli kanga merenba putu, parnoki Europe aser Middle East alinük balala Parthia, Media, Elam, Mesopotamia, Yihuda, Kapadokia, Ponta, Asia, Frugia, Pamfulia, Ijip, Kreta aser Arabia (tekong 9-11)  madak yimsüsüba putu nung Luk-i Tenyartem Mapa kaket ya zülu ta ashir. Item lima ajonga nungji yimsüsür Augustus Ceasar-i  “One culture and one language”, tetezü Rom nunger oshi aser sobaliba dang jembitsü and benshitsü sangdong. Rom chubaji tenük agi anguba Tsüngrem ta sangdonga, sen nung chuba kolak ajenlok, alinük ajak nung chuba süngyanglua yanglua külemdaktsü, Rom nungeri amongba amungnü, benjongbentsü agi melena ao. Yimtitem tenünga melen, tat. agi., Samaria yimti tenüng Sebaste ta melen. Yamaji Yihuda nunger tetsü oshi aser sobaliba tashiyim agi samadaktsütsü sentong yanglua inyakba putu ka nung tenyar Peter-i yimjak nung tasü ita pei tetsü oshi agi Khrista sür shia aruba osang sangoktsü. Rom yimsüsür ozüng anema Peteri jembi. Oshi balala jembir shiai Tsüngrem temeim, ochi aser yimjung indang Peteri sayutsüngiba angatet. Koba Rom yimsüsüri pei tetsü oshi mejembitsüla ta ozüng yanglu, aji tai ta Peteri ayimoktsüba ajaki hau ta agizük. Rom yimsüsüba ozüng anema tasü ita nüburtemi pei tetsü oshi nung jembimeso aser angatet. Parnoki Yisu shia aruba indang pei tetsü oshi nung kuli asü. Pei tetsü oshi mejembidaktsübaji tai ta nüburtemi Rom yimli anema ayimtenba ola yangi sayur. Tetezü, pei tetsü oshi mesamadaktsütsüla kechiaser ibai Tsüngremi moatsüba ta takhangba ka. Ano Putir den dang masü, saka nüburtem, shirnok ajemoka aser mashi-memetetertem dena Tanela Temeshii amshitsü akok aser pei oshi nung Khrista sür shia aruba kuli asütsütet tenemnübuba benjong nung atalokba angur. Tetsü oshi-ji senti aser wazüka ayutsüla ta sayur.