~ Esther

Alima nung kodang kin ka ta südir yangji oshi, sobaliba, tamangba yimsü aser iba nübur libaliru yimya ajak densema lir. Aser item jagi dang kin ka ayak kanga jangjaa sayur aser meraketdaktsür. Tongtibang kaji kodang oshi ta südir, yangji sobaliba densema lir. Yamaji oshi aser sobaliba anaji adianu ama mesüra apu-ani ama lir aser oshiji kin ka tamendakdak aser temaitsüji lir.

Oshi ta kodang südir, oshiji asen taküm asoshi azüh ama, kechiba süra oshi ajanga nisung ka temulung nung tebilemba/taginüba, tashitemetet, tangatetba shisatsütem balala sadoka lemsatepa kati ka angatettepa yamaji nisung kaji tayimjem taküm ka kümteta inteter. Ano kati ka angatettepa tebilemba lemsatepa tongtepratepba dang masü, saka oshi ka ajanga kija aser lokti tsüngda tesendaktep tajung yanglur, nisung ka pa koba lokti, linük mesüra tesem nungiar meteta akümer. Oshi ajanga par sobaliba yimya balalatem shisangdakja par ayak jangjatsür.

Nisung ka taküm rangben temulung shisatsü, libaliru, sempet, sobaliba wainshin item tangazükba nguteta renlokdaktsübaji pei oshi angateta jangjaa metetba ajanga lir. Pei oshi mangazük/mangatetbaji sobaliba sendokba ta ashitsü akok. Sobaliba aser oshi-obenji metaloktepa lir. Sobaliba sendokra nisung taküm kaji ayak khonang makai jaya-jako aser kibalenburen mashiteti, sobusolem mebendangtet pei kolen nungi aru mejangjai akümer. Tanü temetetba putu nung lanurtem aika tazüng tashi temetetba jenti lir saka temeimtsüka pei oshi mangazük aser mejembitetba ajanga sobaliba sendokba den saku-ku küma odagi.

Asenoki England nunger-ji kodang reprangdangdir par oshi English jembir aser par yimya libaliru ajak benshia England nungerji England nunger ama alir. Asenoki ano kodang India lima nung reprangdangdir Bengali nungeria par oshi dang jembir aser Bengali nunger ama alir. Assam nungeria Assemese oshi jembia Assam nunger ama alir. Asen Nagaland telung nunga Angami, Sumi aser tanga kin-tem aikati pei oshi jembia pei sobaliba nung tera yanga pei liso nüburtem den saku litepba asenoki jangjaa ngudaki.

Saka kodang asen Ao kin reprangdangdir asen Aorbo talisa tanü lanurtem aikati asen Ao oshi memetet aser sapua mejembir ibayongji sobaliba mejangja, Aor senso tajung ka ama meliteti tanü Aor lanur jenti küma odagi. Pei oshi mashiba ajanga taküm jenjang “Aor” ta asüba samadoktsü tetenzüker akümer, kechiaser oshiji ajanga dang sobaliba, temeimtep, akhümtsübutep, tesendaktep takang yangluteter aser idangji dang pa/la Aor/Aotsür ka ta jangja jangja meraketa kümdaktsür.

Tanü lanurtemi tangar oshi Nagamese aser bendanger oshitem dang kanga sapua jembiteper, Hau! pi bendanger oshijia ashitsüla aser yangjia tangar dang nungi tajungba asütsübajia kanga dang tongtibang lir. Tensa mapang aser tesem balala dak apet oshi balala amshitsübaji kanga dang tim saka asen Aor kati Ao oshi meshira aji kanga dang maksü tulu lir aser Aor/Aotsür ka ta ajatsü mabensai kümdaktsür. Saka tanü lanuri asen Ao oshi jembibajibo mashimalu, yimdaklir ka ama dang nemja bilemba tanü asen Aor lanur aika kümogo, iba jakla ajanga asen Ao oshi renloktsü mesüa kümdaktsür aser merenloker. Anungji item maashi tangatetba ajanga tanü lanuri asen oshi memeimer, mejembiner aser mashir. Aser iba ajanga tarutsü asen kin tesama tia kati anir arutsür asütsü, kechiaser tanü lanuri asen oshi meshira aser  mejembira tarutsü putu nung par chirnurtem dang asen oshi mesayutsü.

Saka Nagamese, English aser tangar oshi parnoki tanü kechi angazüka meteta lir aser benshia amshia odaki aji dang tarutsü lanurtem dang sayutsü aser benshia aotsü. Idangji Ao oshi samaba den Ao kin tesama tia tensa ka ajurutsü südi ta tsübuseta/tsüremseta temulung shiranga bilemer. 

Saka kodang asen Ao oshi merenlokba kulitem aser tia ajakji reprangdanga shisadanga odir, Hau! lanurtem shilemjia lir saka ajak dak alia tai tulutibaji tanü tsüraburtem lir ta angateter. Kechiaser pei oshi ka yabo tongtibangsa kidang tetsü kati mesüra tsürabur anati mezüng kilung nungi jembia sayua tenzüker aser iba yimya nung tanurji inteter. Aser yamaji chirnurtemia kanga junga angazüka pei oshiji kanga sapua, meima par taküm piyong benshia aor aser pa/la taküm nung akhüm meraket aser pei kin temaitsü ayakji kanga jangjaa ngudaktsür. Saka tanü talisa jila balala nung aliba tsürabur aikati iba shilem junga magiteti pei jala jabasotem den tezüpaba apia, mesüra karibo oda pei tanur jaki tangar oshi jembitetbaji tiyaksanga dang bilema iba tangatetba nung pei jala jabasotem den Nagamese, English, aser yamala tanga oshitem dang jembia kibong nung yimsü asüba ajanga chirnurtem pei oshi mashitsüsa kümadokba tanü kibong aika nung ajurudaki.

Kodang asenoki Ao oshi merenlokbaji kibong telung dak alaka oa reprangdangdir, Private School-jibo  toktsür Govt. School-a aika nung Ao oshi magitettsüsa timtem ajuruba angur. Anungji iba tia tensa ka nung asen oshi angazüktsü aser renlokdaktsütsübaji Aor loktiliba senden balala nung atongsemba ajanga dang tali angazüktettsü ta tanü mapang tensa jagi sayur, saka kodang asenoki khen kanga aroka shisadanga reprangdangdir, talisa jila (Town/City) balala nung aliba tsüraburtemi pei jala jabaso anebalua yimer shisashir lokti senden mesüra Ao Kaketshir lokti senden balala nung ajungshia shilem agia dendaktsütsü tangatetba agi kanga dang anünga lir aser tsüraburtem aikati iba tia aroka meshisadanger.   Kechiaser Aor loktiliba balala nung atongsema shilem agiba ajanga dang sobaliba, wainshin aser Ao oshi ajakji angazüka renlokdaktsür. 

Ano tongtibang kaji tsüraburtemi pei chirnur anir tekülem/sentepsenji balala nung meranga atentsüla sürnung yangjia azülaa dang aor. Akhi asen limai missionary-tem arudang Tsüngrem O den külemi Ao oshi zülua sayua angazükdaktsüba ama tanü putu nung joko anarongdena Tsüngrem O den külemi Ao oshi jembia angazükdakji Sunday School-ji dang lir ta angateter. Ajita süaka tsürabur aikati Deobar anepdang pei tanurtem anebalua Sunday school-i anioktsütsü mesüra ajungshia yoktsübajia tsüraburtem asoshi kanga tasak ama, shilem agir kanga ajema kümogo.

Asenoki kodang tanü tendak tsüraburtem dak kanga junga rangloka bushidangdir parnok dak tajitettsü aika adoker, talisa jila balala nung alir tsüraburtem (kijung lanutsür mesüra kijung lanurtem) pei oshi (Ao oshi) junga mashiba purtem aika dang angur, süra parnoki koda pei chirnur Ao oshi nung tera yanga anitettsü ta asüba tasüngdangba jenti bener arutsür! Item ajakji akhi mapang par tsürabur tashi maitba tanü jungkai adoker asütsü.

Akhi asen otsüla-oboula nunger putu ji meyipa reprangdangra par mapang zülu maka asü aser tanü asen putu nung amshiba osettsüset, alima temetetba kecha makai liasü saka parnoki ken ka, o ka ta jembia asen oshi aser sobaliba merataketji mesamadaktsüi tebui par chir dang ashi aser par chiri semchir dang ashi, ta tepang o agi belentepa tsürabur nungi chirnur dang sayubentsütepa sobalibaa aruba ajanga asen Ao oshi aser sobaliba mesamadaktsüi kanga dang meraketa tanü tashi bener arutsüogo. Sürapang, tanü asen tsüraburtemia akhi asen tsüraburtemi inyakba ama ner kibong nung aser chirnurtem den pei oshi sayua jembiba aser sobalibatem angazükdaktsüba nung shilem agir asü magir? ta tsürabur ajak dangi tasüngdangba tulu bener arutsür. Kechiaser kechi kin südir süaka oshi kaji tetsü oshi/tetsü meli (Mother tongue) ta dang ajar, anungji ibaji tsürabur ka nungi dang tenzüker aser ashiko tia makara tsürabur ka nungi dang tempangtsü, kechiba süra tsürabur shibai kibong nung aser chirnur den pei oshi mejembilir aser mesayulir iba tetsü mesüra tebu dakji iba oshiji tempanga samadoktsü tia ajurutsü anasa lir. Süra Ao oshi merenlokbaji, chirnuri pei oshi mashibaji aser Ao oshi samabaji shiba ajanga asütsü? Ibai tanü tsüraburtemi kanga dang aroka shisadanga pei shilem inyaktsü mapang tongja tongogo.

Akhi putu mapang Ao oshi zülu maka liasü, saka akhi missionarytemi (Dr. E.W Clark mapang) 1893 küm January 14 – 22 tashi American Baptist Missionary Union (ABMU) conference Tura nung alidang lemtettsüba ama asen oshi zülu maka nungji Roman zülu ojang tajung asen oshi den apet amshitsü bener arutsü aser ibaji Tsüngrem tenzükertem aser Aor lenirtemi mangdang tulu yur mapang aser tensa balala nung belentepa khuret bena Ao oshi zülu renlokdaktsüyonga bener aruba tanübo Ao Senden Literature Board (ASLB) ajanga tongti shilem agia Arangtet tatidang tenzüka Ao oshi tali moluteta terenlok jenti bener arutsüba tanü Aori ngudaki. Saka ya metetdi: tanü tsüraburtemi pei shilem meinyakra item ajakji amajok kümadoktsüa shibai metet. Kechiaser oshi kaji angazüka metet nung dang zülur aser benshia aoer.

Anungji tsüraburtemi ano tali temulung agüja pei oshi aser chirnur meima kilung nung pei mapa timi inyaktsü kanga dang tongtibang lir ta angatetdi. Aser lanurtemia tanü iba temeyoktep lima ka nung alidang na shiba, kechi kin tejangja meteta tangar den lirumedema litettsü asoshi tsürabur den asüngdangtepa pei oshi wazüka yua pei sobaliba benshia aotsü tanü lanur ajak shilem tulu lir ta metetdi.