I. Anungba Sanglir

       Tetenzük nung O liasü, aser O Tsüngrem den liasü, aser O ji Tsüngrem liasü. Yohan 1:1.

        Oshi ya Tsüngrem nungi anguba temoatsü tulutiba lir: Senso shiai pei tetsü oshiji keta sena angazüktsüla, jembitsüla aser zülutsüla. Pei tetsü oshi memetetra, meshira aser mangazükra ne meraket samatsü. Oshi jagi nisung ka jenjang lateta lenmang balalalen sendaktepa kümdaktsür aser ibaji ajanga taküm ka yanglur. Ajaki oshi ya Tsüngrem sempet tulutiba ta angateta pei tetsü oshi meima angazüka jembitsüla.

    Oshi ajanga kin ka jangjar; oshi ajanga kin ka samar: Senso tajung kati pei tetsü oshi meshira aser mejembitetra pa/la kechi kinar tangari memetettsü, aser iba jagi pei ‘Ayak’ (identity) samar aser ibaji ajanga meilungi pei Ayak samaa aotsü, pei tarulen memeteti akümtsü aser oshiji samatsü.

    Oshi ajanga nisung tsüngda temeim adoker: Oshi ka ajanga mangatetep, tejashi aser taku chiteper aliba ajak angatetepa akümer. Tetsükchitep aliba putepa kümdaktsür. Kati ka tai atoker. Kati ka angateta akümer, aser tesülen ibaji ajanga temeimtep adoker.

    Oshi renlokdang alima tajung nung tejakleni aor: Kodang oshi ka renloka odir, alima tejakleni aor ta metetdi. Oshi renlokba ajanga Kaketshisatsüren, alima terenlok, putipuyin, sobaliba, rongsenketsüng, ajaklen renloka akümer. Alima tesem balala nung tatalokba aser inyaktetbatem meteter aser alima kin balala den sendaktepa akümer. Item ajakji oshi ajanga alima tejakleni aniba lir.

    Asen oshi ajanga Naga kin tenük lapok: Tangar kini asen oshi angazüka jembiba ajanga Naga kin aika tenük lapoka Osangtajung angashia Yisu dangi ania tanela tekümtet anguba den kaketshisaliok nung jenjang tajung angu. Ibaji Tsüngremi asen kin ajungketba ajanga lir. Talisa aji oshi ka angazüka metetba ajanga lir. Ajaki tetsü oshi mesentoktsüla.

    Tetsü oshi ajanga takok anguba aser pei tetsü oshi mashiba aser memetetba ajanga tamakok anguba lenmang aisü nung angutsü. Oshi ka ajanga inyaktettsüba, inyaktetba aser inyaka aotsü lenmang aika lir ta angatetdi.

  1. Kin ka mesüra nütsüng nübur lungjemdaktsütsü asoshi kechi komala tagitarutsü ka nüngdaker? Tat. Arok meyong rongsen, sobaliba aser talisa ajak taginüba ka aser putepa lia kati ka angateta inyakba.
  •  Asen taginübatemji reprangdangra, item tagitarutsütemji belenshia/ angazüktepa jembiba oshi ka ajanga inyaktet. Oshiji tongtepratep tajung, ayak aser sobaliba tashi tait hadiar.
  •  Külem Oshi ka jagi lokti ka lungjema alentepa alitsüji takoktsü asü? Nagaland tiaji reprangdangang, Asenok Naga nunger ta asübaji ulua bilemer, saka sorkar maparen, sobalibaren aser rongsenketsüngren tebilemtsüji meinyaktet, kechiyong asenok arok oshi ka mali. Asenok Naga kin ta mejatetdang, kin balala Ao, Sumi, Lotha, Angami ta dang liasü.
  •  Loktiliba arakzübaji par oshi ajanga, koba agi angazüka benshia aruba yimya aser sobaliba tajung belenshitsü, rizüngtsü aser wazüka ayutsü akok. Shitakba oshi ka kisüngi kinji alena yutettsü asü? Ibai par sobaliba aser kin ka tereprangtsü, oda tarulen, tamangba yimsü aser libaliru jenjang balala süaka, iba jagi parnok lungjema litet.
  •  Sobaliba ajunga aser mapa tajungtem inyakteta benshia aruba ajak senzüka toktsüba ajanga hapta ana shia oshi ka samar. Alima nung oshi 6000 shi samatsü (Noklang nung (40%) ana nung dang lir.
  •  Kodang oshi ka samadir; Jenjang tajungtem, benshia aruba mapa tajung, mulungzüng, tebilemba tajung aser jembishinü ajak samar. Ano tarutsü asoshi jenjang tajung aketba lenmangtem ajak samar.
  •  Tetsü oshiji tanur ka sozükli nungi angashia tenzüker aser iba jagi asenok tebilemba, aser shisadangba nung lirumedema yanglushiba nung yarir. Tetsü oshi nung angazükbaji tanga maparen nunga kanga dang tongtibang aser teyari tulu lir, itemji süoki ia bilemba, oshi ka angazüktsü tasa asaba, azüngtsü aser zülutsü tasa metetbaji lir.
  •  Oshi ya tongtepratepba kisüngjidang masü, saka iba ya tanela aser shisatsü koba ajanga par tebilemba ajak shiteter aser mulungsentsü tangatetba ajanga küm aika belenshia bener arur.
  • Asenoki süoki ia nangzüktepa aser lungjema lokti ka, nübur ka, kin ka küma tangar oshi ka ajanga lungjemtettsü asü? Tetsü oshi ajanga asenok nem lenmang ajaklen tashi tait temulungtetba agüja metongshia tejakleni anir.

Ao kini tetsü oshi amara takoksa ajurutsü: Kodang asen Ao kini tetsü oshi amadir Tsüngremi Babel lungki asürtem ama o benjatsütsü aser tesama, takoksa ajurutsü. Lipok 11:5-9.

   Anungji memenudang Tsüngrem akhümtsübua Pa dak rangloker, asen oshi mesamadaktsütsü merangdi; idangji tanü Borlengri tenlakidang nungi tuluba aser tajungba mapa asen Borlengri nung alir Ao kini inyaktettsü.

(Temetettsü: Iba onük ya pai Feb 21, 2021 nü Borlengri Ao Baptist Arogo-i Alima Ajunga Tetsü Oshi Anogo – “Tetsü Oshi ajanga kin ka lungjemdaktsür” omen nung ajemdaker ayongzükba sentong ka nung jembiba lir. Nübur ajangzüktsü asoshi tejembir dang temelaba agir iba sabang nung adoktsür).