Nagaland Baptist Church Council (NBCC) & Ao Baptist Arogo Mungdang (ABAM)-i Nagaland nung alirtem jungdaktsütsü atema Clean Election sentong ayongzüka agia aruba nung takok aser tamakok indang mejembidang, tamasa NBCC aser ABAM ajanga Clean Election sentong agiba ya mapang shitak nung nübortem nem tangatetba agütsütsü merangba mapa shitak ka tenzüka inyakdagi ta bilema tenüngsang agütsür.

Taküm aliba arogo aser lokti kati tenzüka inyakba mapa aser sentongtem rongnung kodanga matemtsü aser merenemtsü saka maneni inyaka aotsüba mapa aser sentongji Clean Election sentong ya ka asütsü. Ibai alima nung yimjung bushiba sentong amato lir, kodanga alima nung yimjung bushitsü menüngdak taji masütsü, aji oda, alima yimten nung democracy ali tashi joko Clean Election sentong menüngdaka tabo kodanga masütsü. Clean Election sentong menüngdaktsü asünungbo, tanü US election junga agiba magiba otsü jembia tatar senden alidak kiojen tashi raksatsütsüsa rongrong madokla aser matalokla.

Iba tangatetba asenok temulung nung yur, tang amai asenoki inyaka aruba nung takok aser tamakok asadangtsübaji kanga nüngdak aser tongtibang mapa ka lir. Iba nüngdak reprangteta inyakba atema YSS lenirtem dang pelar.

Iba nüngdak ya inyaktsü bilemdangdang, jet ta, süra Clean Election sentong inyaka aruba nung takok aser tamakokji kechi agi asadangtsü (?) ta temulungi arur. Anungji, Clean Election sentong takok aser tamakok asadangtsü atema, (a) tang state government-i terenlok mapatem inyakba jenjang, (b) tatar yimsüsürtem taküm yimya aser jakla aser (c) nübortem taküm aser kibong tia asadangba nungi tenzüktsülaa ta bilemer, kechiyong Clean Election sentong nükjidongji govern- ment tajung ka kümdaktsütsü asoshi lir .

TASADANGTETBA KA :

Atangji, tang Nagaland tatar senden nung amener Aor tatartem jakla yimya (moral integrity) majungbo masü amai repranger aser parnok karibo tatar senden nung shilem junga agiba angur. Iba denji Aor tatartem rongnung yi jemer aser shi azü mazüok senzüba kangabo mangur. Clean Election takokji aji ka asütsü, kechiyong Clean Election yimyimji Tsüngrem tsübuba aser nübortem meimba lenir adokdakjang ta ayimba yimyim liasü.

Ajisüaka, ano külen terenlok inyakbaren aser rongsenren nung kija kibong tia ajungkettsüsa inyakba aser nübortem ajangzüktsüsa gari lenmang, mozü ki aser school kitem tajungba küma inyaktsübabo mereprangtetter, anungji nisungbo tajung saka mapa makok ta asüba tia ka nung Clean Election ajanga nübortem ongzüka achitsüsa süngjang tajung atangba mangur.

TASADANGTETBA ANA :

Clean Election sentong ajanga nübortem dang Election nung pei vote sen aser mapa yong mayoktsü ajangajanga ayimokajaka, taoba election nung toktepertem aika sen crore aika endoka toktepba otsü lir. Iba election sentsü jagi nenneter tadokertemang shisatebuluba aser madoketemang khuret tuluba ta election nung tokteper aika kanga shisabolu tia nung aliba angur. Ibaji asenok ajak asoshi Clean Election tamakok asütsü.

Ajisüaka, ano Clean Election ajanga ajungshiba nung tashi angaa pei kidang wako temesüng songa yur, pei tangatetba nung Tsüngrem tenüng nung tenangzükba agir indangindanga vote agütsüba purtema aika liasü. Item rongnungji tashiyim amshiba ajanga tesüiba election-tem aika nung polling station mengudang aser vote agütsüba yimyaa amadoker aliba sensosangertem aika liasü, parnokji Clean Election yimyim ajanga taoba election nungbo vote shitak agütsütet. Ibaji Clean Election takok asütsü.

TASADANGTETBA ASEM :

Ano Clean Election takoktem rongnung kaji, akhi ama Youth Camp memesem aser tesem kar nungbo candidate-tem common platform kati jadena jembidaktsu. ABAM-ibo candidate ajak Impuri jaoker mapang tatsütsü jembidaktsü aser sarasadem mapang agi. Item jagi tamajung inyaktsüba nungi meteta aser memeteti tuluka nokdangogo.

Ajisüaka, ano tamakok kaji candidate tajung apia masü saka pei yimer apia senso candidate shimba aser senso mungdangi ashiba mangara vote dena meinokdaktsüba tatalokbatema tesem kar nungbo liasü.

TASADANGTETBA PEZÜ :

Arogo tsütsü Clean Election tongpang nung tamakok kaji tetsübu aser tarendak agi Khristan anemba yimten telok anema yimyim magütsütet, iba jagi shirnoki Hindu yimsü tsütsü atsünga yimsü asütsü meranger, parnok nempoka aitdaktsüogo. Clean Election ken nung “Khristan yimsü anemba telok” ta aliba tekong dena atentsü arogoi tasü meittet.

Ajisüaka, ano takok kaji Clean Election takok asoshi Clean Election Sunday aser sarasadem yinzü sentong maneni agibatem liasü. Item jagi nübortem nem tangatetbabo apuoktsüogo.

TASADANGTETBA PUNGO :

Clean Election sentong ya revolution ka masü, anungji manger sangwa nung tamajung aser meshitak mapatem inyaka aruba ajakji matsüngdoktettsü. Ajisüaka, Clean election mongjenbo mesemtetogo, ronübo sayuogo. Aji mezüng takok asütsü.

Ajisüaka, Clean election tongpang bilemba aser imlaba ama tashi itta moutetba kuli kaji, arogoi ayongba tongpang ser nung tesem aika nung sannüker kija toktsür deacon aser mapangsertemiang candidate-tem dang nungi sen meshia nübo yima jajaba purtema liasü. Iba jagi Clean election sentong menüdong amai kümdaktsü aser arogo purtem mulung mekoktet.

TASADANGTETBA TEROK :

Tesüsaba saka tamakok tulutibaji, ni ama Clean Election sentong nung tongti shilem agir kati jembia jajaba ama mapa agi shitak inyaka mesayutetba aser election nung tamakok angubaji asütsü.

Ajisüaka, ano takok kaji, tezümedangi nangzükba ama maneni inyaka aotsü mulungtetba aser tanü lanurtem aikati Clean Election nükjidong angateta akümba ya asütsü. Aji oda, Clean Election sentong takok ngua jangrupet jangrutsü asoshi aputeta yutsüba mimongji aji asütsü.

(Iba ya Yanglushidi Sensaksem Sabang (YSS)-i Feb 23, 2021 nü “NBCC & ABAM Clean Election – inyaka aruba nung takok aser tamakok” onük nung ajemdaker jembiba lir).