TEZÜLEN/JENTOKA ALIR (SUBALTERN) DAK RANGLOKER LAI BUSHIBA: Mark 2:1-12

Okila

Tensa aser putu den apet Lai bushiba ya kanga melenshia kümogo. Lai nung tongtibang tesayuba kaji tanela aser lokti taküm tekümtet (salvation) asoshi ta asenok ajaki meteta lir. Aiben tanela kümzüktsü indang meranga Lai rateta bushir. Aser aji kanga shitak aser tongtibangtiba lir. Saka tensa yari ano Laiji mera tasen agia bushitsü tim ta angatetdi. Nisung ka tanela dang masü saka lokti rangben kümzüktsübaji kanga tongtipang. Nisung ka rangben taküm indang mebilemiang tanela kümzüktsü asoshi asadangtsü tamakoktsü.

Mark Kaket ya Galil nung aliba lokti sobaliba nung ajemdaker züluba lir. Galil tensa kodang reprangdangdir, tanü asen lima den kangabo tepila mali ta angatettsü. Mark 2: 1-12 tashi nungji telok ana noksa agüja lir. Mezüngbuba telokji tezülurtem. Item telok ya par lokti nung kanga tongtipur, tashitemeter, lenir aser tongtibang nisung liasü. Tanabuba telokji togimra agi shirangba purtem. Parnok ya par tendak meshimejunger aser tezüngdokba lokti temaitsü ta angatetdi.

Iba ocet nung ya Mark 2:1-12 nungji lokti nungi züngtokba, jentokba, mesüra lokti nung tajemrep tia nung aliba telok (Subaltern) dak rangloker tongmelang agi shisadangtsü merangtsü.

Tezülen/Jentokba (Subaltern) tetezü:

Subaltern oren ya Antonio Gramsci mezüng bener aru. Ya tongmelang agi ‘tezü nung alir’ mesüra ‘Jentokba nüburtem’ ta angatettsü akok. Tezü nung alir ta kodang südir, sobaliba nung jentokba, yimden yimsüsüba nung mezüngshiba, loktiliba nung mezüngokba, rongsen ketsüng nung sensaker, mata-mabensartem, mesüra shisa luyim nung tangar memenep rogo dang ajar. Antonio Gramsci asoshibo parnok ya ‘tekübok nung aliba’ nisungtem ta shia angutsü. Pai ashiba agi parnok yabo par kin otsü züluba nunga süng menoksem kechiyong parnok ya bangdak alir mesüra sentsü aketeri amonkbanger alir.

Tanü asen tendaka yamala amokbanger aliba telok jendi lir. Parnok asoshi Khrista tesayubaji koda ratettsü aser Khristantemi parnokji koma tekümtet aser nüchiba dangi anitettsü aji kanga tongtibang kümogo. 

Tezülen/Jentokba tem dak rangloker Lai Bushitsü kechiba Tongtibang

Nüchi agütsüba (liberation) nung Lai tesayuba ya kanga tongtibang shilem agia lir. Atangji Tejen Lai nungji lokti rangben nüchi agütsüba indang otsü lir. Tat. agi, adianutsür Shiprah aser Puah (Anitet 1) ajanga Yihuda nunger kümzükba nung mezüng shilem agiba angutsü. Mosa ajanga Tsüngremi Yihuda nunger tepokdak nungi nüchi agütsüba. Yisui a tsüngtsüker, nükpoker aser zütsüra agi shiranger anebtsüba ya tezülen/jendoka aliba nübur nem nüchi agütsüba lir ta angatetdi. Atangji Laishiba rangpen ya nüchi agütsüba indang otsü lir. Nüchi agütsüba nung rangloker Lai bushiba ya (Liberation Theology) Latin America lima mezüng tenzük, aser kechiba ta bushidangra, par dendak rakzükraktem, ampangyimba, ochimashi aser yamala inyakyim ajanga nisung aika sensak tiai yok. Aser sensaker asü nungji parnok lokti temeden samadok aser par ola mangashii aküm nung parnok jenjang sama. Kanga mezüngmeshia amshir aser meimchir rongnung maten amai dang benshi. Anungji parnok nem nüchi agütsütsü asoshi Lai tetuba bushitsü tenzük. Mark E. Taylor-i ashiba agi item tezülen/jendoka alirtem dak rangloker Lai bushiba ya tezülen/jendoka alirtem asoshi Khristan ka teinyaktsü tim mapa lir. Ano paisa ashir ‘kechiba süra sensakba tia aser tangar kübok aliba ya parnok sasa akümba masü saka ochimashi mapa ajanga sayangtetba lir.’ Iba Lai bushiba yabo tekolok shisarajem (philosophical) masü saka teinyaktettsü akokba (pragmatism) sentong bushiba mesüra tajemrepba tia nung alibaji koda sür ajungkettsü ta asüba nung rangloker. Tatsü agi, parnok asoshi tekümtetji tanela dang masü, saka shi timtem aser tajemrep tia nungi nüchi agütsüba lir. Anungji iba Lai bushiba nung tezülen/jendoka alirji Yisu timtem ajuruba den saku amai ratet aser züngshir.

Mark kaket indang olen kar

Mark kaket ya 64/65-70 AD tsüngda nung Marki zülu,  Külen Roman yimlii amokpanga liasü, aser külen Grik nunger sobaliba ajanga Yihuda nunger sobaliba benjadaktsüba tensa ka nung iba shiti ya zülu ta Laishir mongin aikati ashir. Sobaliba ana kodang tsüktepdir, sobaliba aser rongsen ketzüng nung jendokba nübur aika adoker. Anungji Mark kaket ya tezülen/jendokba nübür dak rangloker, tongtipur ochimashi anema züluba kaket ka lir ta laishir karibo bilemer. Kechiba süra tezülen/jendokba nübür dang rangloker amshiba ojang, oren aika iba kaket nung amshia lir. Mark 2:1-12 tashiji kodang züngdir item ojang aika angutsü. Iba Lai tekong nung ya telok ana lir: mezüngbuba nung lokti yangji togimra agi shirang sang tena lir, tanabuba nung tezülurtem, parnok ya par tendak lenirtem liasü.

Jentokba purji shirnok: Marki amshiba ojang kar

Lai bushiba nung tongtibang kaji oren/ojang amshiba yimya ya asadangtsü tim. Tat.agi, kechi oren/ojangsa amshir, aser koma amshia lir, aser kechiba iba oren/ojangji iba tekong aser tensa nung amshi. Iba ya jangja metetra Lai taginüba mesüra tezüluri shinübaji rajema metettsü akok.

Mark 2:1-12 nung togimra agi shirangba nisung ka indang otsü angutsü. Iba tekong ya tezülen/jendokba nübür dak rangloker Lai bushira tsünglanglen agüja aliba ojang/oren ya aroka bushitsü tongtibang.

Telok, jenti, nisung (Grik nung ochlon, polloi, laos): Mark kaket nung iba ojang ya aiben amshia lir. Mark kaket nung item ojang ya tezülen/jendokba pur dak rangloker amshiba aiben angutsü. Telok (ochlon) ta kodang amshidir parnok ya aiben nübü yokertem/ahyanger (labourers, hachirawala), mesüra aluyimertem (farmers), mesüra ango purtem asoshi amshir. Telok ta kodang amshidir yimya agi tenünga sünga makaba lokti ta angateter. Tetezü parnokji nisung rongnung mezüngloker, mesüra jenjang makaba indang sayur. Jenti (polloi) ta kodang amshidir nisung telok ka kecha mangdang mali sentepba dang ajar. Nisung jenti sentep saka kecha temeden maka mesüra temeden magütsür. Nisung (laos) ya aiben bendangertem indang jembidang amshir. Tetezü bendanger ta kodang südir, laos ta amshir aser Yihuda nuger asoshi teshimtet kin ta amshir. Yihuda nunger asoshi bendangerji memerükba nübür, temenen pur, mesüra jatetba rongnung matenba nübur. Anungji nisung (laos) ta kodang amshidir bendangshidangba, ozü-par ta asüba, tezülen/jendokba pur ta angateter.

Lai nungji oda kishizüng tonga mesemi nungten v2 nungji shia angutsü. Iba tetezü kiji kanga tila,  aser nisung/kibong aika kanga nentepa aliba kiyong sayur. Yimya agi meshimejunger kiji tila aser sensaker mesüra jendoker telokji tesem tila ka nung ki nentepa sür liasü.

Togimra agi shirangba nisung: yamala tashidak agi shirangertem Tasen Lai tendak kanga nema lur reprang. Nisung rongnung medensem amai dang bilem. Yamala shirangertem Lai nung tenüng teta amshiba aika mangutsü, tetezü mezüngkokba pur.

Yipten: Grik nunger oshi nung yipten asoshi ojang ana amshir. Kaji krabatton aser tanabubaji Kline. kline (yipten) yabo yipden tajung, aser kodang krabatton ta südir yabo sensakeri amshiba yipden dang ajar. v4, 9, 11, aser 12 nung yipten ta aliba ya Grik oshi nung krabatton  amshia lir. Tetezü pa aliba tesem ya sensaker aliba tesem mesüra pa yipden nunga süng mejangtsü malangba nisung ta angateter.

Tezülurtem: parnok ya ozüng kaket rasartem mesüra ozüng aser yimden teinyaktsü tesayurtem lir. Laishir Jürgen ajanga ashiba agi putu aika iba mapa inyaka aru asü nungji tezülurtemi putirtema amokbanga aküm aser tsüzüng-ozüng yangluba nung sashia aküm, aser tashi amshi. Anungji parnok ya Yihuda nunger lokti nung kanga tongtibang nisung liasü; oda yimden lenirtem advisor, diplomat aser political officer jenjang tashi nung parnok amen. Mark kaket nung aiben parnoki tekübok jenjang nung alir anema inyakba asoshi Yisui arütsüba angutsü (Mk 12:40, 11:17-18).

Item tezülurtemi togimra agi shiranga alisang anebtsüba aitsü. Tetezü jendokba purtem anebtsübaji parnok asoshi tebilemtsü kümadok.

Ne menen tokogo: Togimra agi shirangba nisungji medemer pezüi bener arua kilem rakpoker Yisu dangi yok. Parnok tamang ngua Yisui pa menen tatok agütsü. Tetezü talenba nungi salatsü. Tanela nung tanebtsü angu.  Lokti talenba mesüra züngdokba nungi salatsü. Iba mapang tezülurtemi kechiba ta bilemba asenoki Lai nungji angutsü. Tetezü nüchi agütsübaji parnoki magizüktet.

Shishiang: Yisui temenem nungi tanebtsü agütsü, aji aija tezülurtemi mulungjang nung bilem. Kodang Yisui aji meteta pai togimra agi shirangba nisungji shi nunga tanebtsü agütsü. Iba nüchi agütsübaji Shishiang ta asüba ojang nungji tuluka keta lir. Shishiang ta asübaji nisung nem jenjang tasen ka agütsüba den saku. Togimra agi shirangsangji joko alima lokti aser tsüzüng-ozüngi alena alibaji salatsür nüchi agütsüba angur. Pa indang temeden aser ayak (identity) taneben meyipa agütsüba lir. 

Jentokba purtem asoshi kechi inyaktsüla

Tanü asen tensa nung ola madokteti aliba nisung, lokti aser kin aika dang lir. Iba Lai tekong nungi tangazüktsü kechi lir? Asen tensa asoshia kechi tuyur? Ajemrepa aliba nübur asoshi kechi ashir? Atangji tanela nung tanebtsü anguba indangji kanga tongtibang nükmen ka angutsü, saka iba dakji alaker asenoki kechi tesayuba angazüker? Temalen Lai ratet nungji ajemdaker arogo aser Khristan lokti ajanga jendokba pur indang tangatettsü jenti lir ta bilemer.

1. Sümedema aliba lokti yangertsüla

Atangji togimra agi shiranga aliba anebtsüdang tezülurtemi nemnemba ama asen lokti nunga tezülurtem jakla bener aliba nisung jenti lir. Tezülen jendoka aliba nüburtem ajungkettsü melen tangari tajung inyakba-a magizükteter. Parnoki temeden meshidang nungdema yutsüba aiben asen lokti nunga angur. Togimra agi shiranga aliba nisungji Yisu dangi meyitettsü nungtemba den sako asen lokti nunga nungdakba pur asoshi aruba mapa aika parnok ket matongba aser tagitsübur magiteti tom nung samaba aika lir. Saka iba Lai nung tajung kaji medemer pezü jagi kilem rakpoker ludaktsüba temaitsü nütsüng nüburtem lungjemer tezülen/jendoka aliba nisungtem yaritsü tim mapa ta sayur. Yangi sümedema aliba lokti ka yangertsü indang asenoki angazüker. Süra asenokia sobaliba nung jendokba, yimden yimsüsüba nung mezüngshiba, loktiliba nung mezüngokba, rongsen ketzüng nung sensaker, matamabensartem, mesüra shisa luyim nung tangar memeneptem asoshi kechi inyaktsüla mesüra inyakdar?

Tatishitsü kar, matamabensartemji aiben tezülen doktsür. Asaa masü saka parnok sentep nung tentettsüsa arogo aikati asameyang mesüteter. Tsüngtsüker asoshi step nung jajatsü kanga tasak saka sentep ki aika nung sentepi atubaji step dang lir. Anungji sentep ki yangludang steps dang masü wheelchair tutettsü lenmang tajung menoktsütsüla mesüra wheelchair yutsütsüla. Narongjaker asoshi sentepi arutsü tebilemtsü. Anungji sign language amshi nung koda jangratemtsü? Rongsen agi amokpanger aliba putu ka nung asen alir; rongsen akar dang lokti nung amshir,  anungji sensaker asoshi yimjak nung shilem agitsü tebilemtsü tulu aser maongka aiben mangur. Ya tibelemtsü tulu kümogo. Sempet tajung akatsü akok, saka sensaker asü nung aiben lokti nung shilem agitsü maongka mangur. Khrista tesayuba nung ajak saku lir. Khrista yimli nungbo taka-tait masü, saka bendanga agütsüba dang tongtibang. Khrista Yimli nungbo ajak sako liromedema alitsü indang sayur. Sensakertema nüma danga tentettsüsa asen lokti yangertsü tongtibang. 

• Tanela kümzüktsü tongtibang, saka nisung ka temang rangben tanebtsü agütsütsü khuret

Maria Rajai ashiba agi tezülen/jendoka aliba purtem asoshi Laishiba ya tsüzüng-ozüng mesüra tamangbaren (tanela) asoshi dang masü,  saka parnok rangben melenshiba nung teyari agütsütettsüla. Tezülen/Jendoka alir dak rangloker Lai bushiba ajanga parnok asoshi lokti nung temeden agütsütsü metettsü aser lokti nung züngoktsü maongka angutsü. Tezülen/Jendoka alitem asoshi Lai bushiba ya telolok shisarajem (philosophical discourse) ka masü, saka teinyaktettsüba aser rangben tanebtsü agütsütsü dak rangloktsü kanga tongtibang.

Anungji Mark 2:1-12 tashi nungjia ibala tangatetba agüja lir. Yisui temenen tatokba agütsür tanela nung anebtsüba dang masü, saka togimra agi shirangsangji shishidaktsü, aser shi nunga tanebtsü agütsü. Iba yongji par lokti dangi kümküma nümadanga taneben meyip. Tetezü Yisui paji rangben nüchi agütsü.

Tatishitsü agi, shisaluyim nung tangar memenebertemji aiben lokti nung tezülen toktsür. Sempet jenti alitsü akok, saka azüng-zülutsü nung tangar memeneb asü nung parnokji lokti nung pongpa kümdaktsür. Anungji parnok sempetji reprangteta tim lemang nung amshia nüchi agütsütsü asoshi yimden mesüra arogotemi project kar tenzük yaritsü akok. Talisa yimdakbo takden-takraba (handcraft) unit tenteta yaritsü lemang sadema lir, koba ajanga parnok dang masü lokti ajak tejangzük angutsü. Iba jagi nisungbaji aser lokti rangben nüchi angutsü.

Otem

Marki tezülen/jentoka alir dang rangloker iba otsü (Mark 2:1-12) ya bena arua züluba angur. Yihuda nunger sobaliba nung jendoka aliba (togimra/zütsüra amala agia shiranger) nüburtem aser Roman sorkar kübok tezülen aliba tajemrepba tia nung alirtemji rangben tanebtsü agütsütsüla ta asüba tetuyuba ka agütsüba Lai ka lir. Medemer pezüi togimra agi shirangsang anebaluba medem tezülen/jentoka aliba nisungtemji asen lokti, aser arogo khuret lir ta asüba angatettsü akok. Parnok anebtsütsüba, ajungketsübaji asenok teinyaktsü. Parnok lokti nung nümadanga kümküma tentettsüsa asenoki lemang sadema lapoktsütsüla. Yisu asoshi tanela nung tanebtsü agütsütsüji kang tongtibang liasü, saka iba den külemi tezülen/jendoka alirtem aiben shi nung tanebtsü agutsü. 

Arogo, yimden aser lokti balala ajanga tezülen/jentoka alirtem anitentsü kanga nungdaka kümogo. Parnok asoshi asameyang tajung yanglutsü nungdaka kümogo.

Iba dakji alaka tezülen/jentoka aliba telok madokdaktsütsüsa asen loktiji sümedema yimchiyimjung nung yangertsü kanga nungdaker.

Atangji Laishiba ya tezülen/jentokba pur asoshi rangloker bushitsü tensa lir.