D-Box Penalty Shootout 2021 champion team Rongpang Reju Arkong (RRA) pur den iba asayamung sponsor Wb. Moatoshi Tzüdir noksa nung angur. Mokokchung, March 06, 2021
Moatoshi den Champion team RRA aser tayonger D-Box

D-Box teloki ayongzükba mezüngbuba Penalty Shootout 2021 March 6 nü Imkongmeren Sports Complex Mokokchung nung takok ngua kaogo. Iba asayamung ya 1st Class Contractor aser NDPP Active Member, Wb. Moatoshi Tzüdir-i sponsor süa katsü.

Taküm iba asayamung nung telok 42-i shilem tajung agia liasü. Item rongnung tesüsabuba asayaji Rongpang Reju Arkong (RRA) aser Cats & Dogs na asayaba RRA teloki takok tulu ngua taküm parnoki iba marok benogo. Takoker champion telok nem senpet trophy den certificate aser sen 20,000/- aser tanabuba runner up nem certificate den sen 10,000/- agütsü.

Iba sentong nung Moatoshi Tzüdir-i jembidang, saisapong ajanga tashi angaba, tazüokba, taremzük, ochishiba aser telungjem ajungkettsür aser taküm jenjang yabo saisapongba nungi dang ajangzüker, ta ashi.Asayaba ya takok angutsü kisüng dak rangloker masü pelapela asayatsüla aser asayar/nisung tajung ka akümtsü nükjidong yur asayatsü asoshi pai ajungshia liasü.

Koba mapa südir süaka, alizüng tejangja yur meranga inyaktsüla, kechiyong ibaji ajanga taküm junga alitsü aser asen nükjidongtem atalokba nung yaritsü, ta paisa shisem.