S. Temjen Imchen

Okila

Temalen aguja aliba onükji kanga tesadem aser asen tensa nung kanga tapet lir. Anungji, asen atepzüng nung dang masü, saka Northeast India (NEI) linük ajunga tsütsü nungi iba alima ajonga kangshidaktsüba tesashi-wara koma angateta, khuret ka ama masü saka senti mapang ka amaiang agizüka, iba tangatetba  nung libaliroa aotsü tebilemba yur iba onük ya lemsateper. 

Northeast India ji temo aketba linük asü?  

Northeast India linük ya yimya dak aketba kanga tobur tajung tenemtem, ayi-limatem, tzülok ayimba, temerük ayongtem, wapetsa aliba jaka aika, arem shiruru aser süngdonglidong tapu aika aliba tesem ka lir. Item alima temang dak aketba tetsüng teben jagi alimaji temo aketba lima ka ta sayur. Saka, iba tereprangnütsü noksaji maka-mait (poverty), senso ka sen ishishi dang anguba, mapa mangubapur jenti, aser alu nungi kanga dang ajemshia züsentetba – koba ajanga chiyungtsü peria kümzüka meyutetba lima ka (Cf. The Policy Brief 25 of ICAR, Dec. 2006). Terajemba nung lemsateptsü mechi, asenoki lenmang anasü nungi ajidangtsü akok – agüja aliba alijak tereprangtsü aser iba lu nung mongyin temi kechi ashir iba telangzüba indang kar.

  1. Temo aketba Northeast lima indang temetettsü:

Loktiliba aser rongsen asadangba ajak nung litsüküm (landmass) aser nütsüng yongsük (topography) metetbaji mezüng shilem air. Northeast India  nung state ti (8) – Arunachal Pradesh, Assam, Meghalaya, Manipur, Mizoram, Nagaland, Tripura aser Sikkim – jagi 255.79 lakh hectares, iba nung India linuk rangpen ajung nung ali tasazük 7.92%  agi NEI region ya küma lir. Iba tesem ya tekong-tenem aika ajashia-a oa akümba angur (diverse eco-system). Tekong-tenem jagi 2/3% ka agi akhümpanga tenteta aliba nguyur. Aluyimbaji rongsen ketdangsüba nung tongtibang shilem ka. Iba sülen shiruru metsüba arur. Iba tesem ya India lima nütsüng yongsük ajonga nung 3.75%  jika aser asenok tesem nungi 2.6 % Net Domestic Product linük nem agütsür. Iba telungtet jaka nung arem-min tasazük 66.1% jika adoker. India linük denji medemdangra, ibajibo 21.1% dang asateter (see the report Untapped Potential of Northeast Region of India, p.2.). Iba litsüküm aser lipuküm (ecosystem) nung ajemdaker, yimya-yimko atonger rogo telok ishikati ali temo indang tajitetba agütsüba teküboklen angutsü. Ibaji asenoki ajidangdi.

  • NEI tesem nung Terenlok asadangba Mongyintem Teloki reprangdangba:

Tamalen tasüngdangba – Northeast Indiaji temo aketba linük asü? – nung ajemdaker, India linük nung tebilemdang-akaba telok (think-tank group) ishikati iba yimsü indang junga bushi aser parnoki bushiba nungi kechi ngutet ibaji osang agütsü. Item mongyintem telokji yamai:  Development of Northeast Region (DONER),  North-East Council (NEC), aser pan–India policy-makers koba nung Indian Council of Food and Agriculture (ICFA), Federation of Indian Chambers of Commerce and Industry (FICCI), item telok ajanga mapaji inyaker. Tasüngdangba nung telangzübaji the Indian Council of Food and Agriculture teloki yamai agütsü, NEI tesem ya “munguteti akaba tashi” (“untapped potential”) lir ta sangoktsü (tazüngtsü report, Untapped Potential of Northeast Region of India, ICFA’s report of the National Round Table Conference, New Delhi, March 15, 2017).  Iba ‘munguteti-aliba tashi’ ya lokti rongsen renlokba bushiba nung kanga tongtibang ta angtetdi.

Iba dak alaka ano tanga tasadanger telok tenüng ka agi – FICCI-PMPG – teloki ashiba agi, NEI “tesemji ali temo aser tzüpokdak agi süphanga lir, koba nung süngjanglijang lu yanglutet, aser   ano terenlokba nung aotsü mechi nung item takang sobalibaren aser yimyaliro bushitettsü koka lir” (the stretch boasts of fertile land and water resources, an ideal habitat for horticulture, and a rich cultural and natural heritage that could be explored further for development (PMPG-FICCI’s report, Emerging North-East India, 2015, p.6). Item tebushitetba ya asen linük aser alima rangpen ajonga nungi tebilemdang akaba mongyin telok balalai ashiba angashidang asenok asoshi tajung aser temulung adangtsü otem lir.

Saka, tebilemdangtsü tulu ka lir! NEI tesem ya yimya-lemang aisü nung taka-tait asüyonga, nüburtem aika India yimtitem aser jila balalai tanga limai alitsü aoba (migration) yimya aser tatalokba ka ngua arur. Karbo anosa aor!  

Tanga limai oa alitsü yimya-yimpong nungji lemang aisü lir – kar tazüngi aor, kar mapa bushia aor, kar shishilembai aor, kar hachira/ayangi aor, ano yamala yimyaji alitsü akok. Item telok taodakji sorkar kübok, private mesüra corporate tentet asütsü akok.  

Tebilemtsü kaji ya – tanga limai oa alitsü yimya-yimpong nungji mapa inyaki aoba tiemba asür. Ya kechiba ta asüngdangdang, NEI tesem nung maka-mait aliba ajanga iba timtem adoker ta shiteter. Süra, iba loktiliba aser rongsen yimya-yimpong dak aketba indang ya tatsü agi shisadangdi.

Telongjong terenlok asoshi tashi aser Northeast tesem nung Tebilemtsü kar

NEI tesemba ya rongsenren jungjunga renlokra, asenok peribaji dang masü, saka India linük adena yaritetsüsa tashi lir ta shia angur (Cf. Emerging North-East India, 2015, p.6). Iba tsütsülen tashi aitlena aser tashi maitlena tatsüka ajidangdi.

  1. NEI tesem nung tashi aitlen:

Tamalen ashi ama, iba tesem nung item lemangtem nung tashi aitba item lemangtem nung angur:

  • Tourist tephuatsütem (attractions) – Bendangli sema senzür atema NEI tesem nung item tephuatsütem ya alima yimya nung keta lir: The Blue mountain (Phawngpui) and Palak Lake in Mizoram; Kangla Fort and Loktak Lake in Manipur;  The Elephant Falls in Shillong, and Cherrapunji –one of the world’s wettest regions located in Meghalaya; World War II – War cemetery in Kohima; Dzukuo Valley & Dzulakie in Nagaland;  Majuli river island of Brahmaputra, Kaziranga Reserve Forest, and Kamakhya Temple (Guwahati) in Assam; aser ano aika lir.
  • Nübor sobaliba  – Iba tesem nungsa ano alisopur-sobaliba (tribal culture)  tajung jenti angur.
  • Süngo lu jenti kar – Süngo lu aika Assam, Meghalaya, Nagaland, etc, nung züsentetba angutsü. British sorkar yimsüsüba mapang nungi tenzüka yutsüba tang tashi iba luyimji junga acha-ayaanga aoba angur. Ibaji tajung.
  • Rubber aser coffee lu jenti tsünütetba tesem.
  • NEI tesem nungsa tetsür-tebur asadangba yimya – koba dang ‘gender development index’ ta ajar, ibajia junga yuteter.
  • Awou (bamboo) nung taka-tait tesem.
  • Ola-angla aser takdo-takra – Ola-angla aser takdo-takra (handloom and weaving) tasa ya NE nung lokti ajak nung meteta amshiba angutsü.
  • Ali telung nungi adokba oset tsüset shinu-lung (limestone), tzü ajanga adokba tesangwa (hydropower) item lemang peria dang angur.
  • Tesetep alijak jaka, aser
  • Tzü-mopung temerük angudak tesem.

Anungji NEI nung tashi akaba lemang jenti lir ta sayur. Tarutsü anogotem asoshi sorkar balalai itemji junga acha-ayanga amshitsü tim. Assam aser Meghalaya state ana dak alaka, tanungba state-temji ali temo aketba lima nungi adokba aser anguba senti osettem shitakbayim nung achayang mesütetba timtem reprangteter.

  • Tashi-maitbatem: Iba NEI nung alima meraket yimya-yimpong tajung jenti liaka, ano külenbo asenok tashi maitba tsütsü nungia mapa kar lir. Itemji ya:
  • Asen NE ya atang aser lungpang jenti agi akümba lima ka lir, koba ajanga State tiemba ka ali-lenmang dak metaloka lir. Terenlok asoshi ibaji majung;
  • Bendangli sema senzür asoshi ki-ojen peria makaba;
  • Mapa inyakeri anungba;
  • Tsümetsüng aser anentsü;
  • Aki-aküm akaba ozüngji  ali kibur atema dang;
  • Projects balala aiben dang nunger moteti raktaka ayur; aser
  • Wapetsa aliba states aika.

NEI nung maka mait aser alima tanga-i aoba teratem

Maka-mait tia aser pei lima doktsür tanga limai aoba tongtibang tera ana lir: Ibaji tajemzükba aluyimba yimya aser mapa inyaker wain-shin junga makaba pur aika lir (National Institute of Rural Development – NIRD & NERC, Guwahati; Vision 2020 for the North-East Region/NEC report nung agütsüba amai). Item kuli ana jagi mapa manguba tebilemtsüji adoktsür. Abenjagi, NEI doktsür India lima mulung lenjagi dangi otepba yimya-yimpongji ataloker.  Anosa osang ka nung yamai ashiba angur, “Migration of local people to urban areas (happens) for employment prospects” (See the official report of KPMG-FICCI entitled, Emerging North-East India: Economically and socially inclusive development strategies: November 2015 (p.7) at KPMG.com/in, accessed on 20.10.2020).

Maka-mait dak alaka ano item kuli ajanga, asen NEI nungi India limai aoba item kulitem lir:

  • Lanur-rogo asoshi sen a-adak jaka peria maliba agi;
  • Meimchir acha-ayangtsü (management of human resources) junga memetetba agi. Iba nungji hikateter alir-a aser mihikateter asoshia mapa inyaktsü lemang peria maka;
  • Jila aser yimti nung zünger alirtem mapa munguteter tesa;
  • Kol engine kharkana aser oset-tsüset adokdak mapa inyaklen peria maka;
  • Sorkar aser lokti tentet office nung tejak-ajia mapa agütsüba aser teraksa adenbayong;
  • Business Public Outsourcing aser Call Centres maka/peria makaba agi; aser
  • Aener dang ajungba aser anepalubaren (hospitality sector)  jaka aser ki-ojen peria maka.

Assam state indang bilemdangdi. Assam nungi – koba ali temo agi sünga lir – tanga limai aoba purtem teimtiba lir. Parnokji India lima yimti aser jikatem dangi mapa bushia aor. Teimba ka southern states  Karnataka, Kerala, Tamil Nadu; aser karbo Delhi, Mumbai, Pune leni oteper. Pei jaka doktsür tanga linükiang mapa bushia otepba yimya-yimpong ya oda loktiliba-rongsen, sobaliba aser tamangba yimsü tsütsülen tebilemtsü aliba agi ataloker ta ajiteter. Tawa terenlokbaren tasadangba ka akaba sülen, iba amai zülutsü: “Out-migration is a recent problem in Assam. Historically, Assam is a migrant receiving state due to availability of livelihood sources. But with respect to development of Assam the rate of employment generation is very low.” (See Jugal Kumar Deka, “Factors responsible for out-Migration in Assam,” International Journal of Academic Research and Development, Volume 4; Issue 5; September 2019; Page No. 59-63). Anungji, item bendangleni oa mapa inyaker rongnungji, India linük jaka bala nung prokshir kar komapany ki tulu yangludak, kar factories-tem nung, aser kar mills, ta item tesem aser jaka mapa inyakteper.

Ajakbo kasa nükjidong nung dangbo tanga tesemi maor. Migration telok nungji karbo lanurtem aika India linük balalai kar optepbaji call-centre, hospitality sector, spas, aser tanga nükjidong nung otepbaji ajurua arur. Ano telok karbo education, competitive exams, etc, nung azüngtsü aser tetoktepba nung item – IAS, IPS, IFS, IAF, Army, adentsü nükjidong yur asemteper.

Pandemic effect aser meyipa aruba tebilemtsü

Coronavirus or Covid-19-ji kodang alima rangpen wara ta World Health Organization ajanga Osang agütsü, iba sülenbo alima linüktem ajonga nung – India-a dena – yimti aser jila ajonga shipangyonga (lockdown) oa tenzük. Iba lockdown osangji March ita 2020 küm nungi tenzük. Iba lockdown ozüng ajanga migrant workers aika Indian yimti aser jilatem nung marakzüteti alenpanga ayu. Iba mapang bendanglen oa mapa inyakertem, ayangertem, tazüngertem, shishilembar rogo, mozüki aortem kija aser kibong, aser yamala mesükba nübur merijangsa-merijang timtem tuokrong jenti ajuru. Joko, tanem-tenemi India sorkari Speical Trains aika south, north aser western India nungi Guwahati aser Dimapur leni yok. Central service aser regular service alir dak alaka, mapa inyaker rogotemji noklang nung noklang amai pei tesem aser talidaki meyipa timtemseta meyipa aruba otsü jenti lir. Yamaji Dimapur aser Guwahati train station nungia Bihar aser Jharkhand tesem aikalen sorkari Special Trains ajanga migrant workers temjia pei-pei tesem yokba mapa aser otsü lir.

Merirjang aika meyipa arur külen, joko  kechi koda asütsü ta asüngdangtep. Iba meyipa aruba telok nung terata (dilemma among the returnees) tuluka adok. Pei taso lima meyipa arur sürnung, kechi inyaktsü ta asüngdangtep. Ibaji koda tesüngmangtsü!!!  Iba sülen, iba tasa yimdangi aru, ‘Work-and-earn in our own lands and homes.’ Atangji, meyipa shilanger (returnees) telok aser iba tatalokba ya temoatsü aser senti mapang ka südaktsütsüla ta nisung aikati bilemer. Ashiba ama, jokorla pei limai meyipa shilangertemi sorkar dak metaloktsü melena, pei-pei sasa mapa meranga inyaktsü aser pei talidak jaka aser tesem nungji rongsenren kützüng maparen renlokdaktsütsü merangtsü aser yamaji inyaktettsüba khuret kümdi.   

Covid-19 sülen North-East India nung telongjong terenlok asoshi mapang tajung ka

‘Covid-19 wara sülen tensa’ mesüra ‘post-Covid-19 scenario’ baji mapang ana küma lemsatsü akoker. Mezüngbuba nung, kodang NEI returnees nübur-i pei-pei tesem aser kidangi meyipa shilang, iba mapang nungi shir post-Covid tensaji asütsü. Tanabuba nung, medical scientists aser doctortemi koba mapang nung Covid-19 vaccine ngutetdir, iba mapang nungi post-Covid-19 tensa ta ajatsü akoktsü.

Alima ajunga nung iba tesashi wara agi tonger nübur timtemdakja aser taküma jenti laludaktsüba den külemi, lockdown ozüng linük aser tesem ajaklen yanglur – koba dang standard operating procedures (SOPs) iba ozüng jagi alen. SOPs-ji amshia March ita 2020 nungi tenzükba tang tashi lokti tentet ajak nung amshia odagi. Kodang returnees nübur pei ki aser tesem tonga aru, Assam lima tesem nungbo parnoki ashi – “Onoki asen jaka nung mapa bushitsü” (we will look for jobs locally). 

Ali-temo aketba tesem nung asenok anüdoklen aliba nüburtem ya alir asünung, jokorla telongjong rongsenren terenlok (holistic economic growth) asoshi takoktsüyim lemang kar yamai bushidangdi:

  • Ola-angla kharkana/mapa inyakren züindaktsüla;
  • Maneni rubber süngdong, süngo lu, aser coffee luyimba züindaktsütsüla;
  • Chiyungtsü koma achayangtsü item yimya tajungba kümdaktsütsüla. Talisa, jang-o-tsü aser süngjanglijang nunger tsünglurowa nungi kümzüka yutetba jaka tesadem peria akatsü nüngdak.
  • Chiyungtsü meraksai kümzüka yutetba (food preservation), koba ajanga nübur asoshi rongsen terenlokba nung odaktsür.
  • Tourism circuit amala state aser inter-state tsüngda tesendaktep tajung akatsüla; aser
  • Ki-o-jen tajung aser peria akaba ajanga shishilemba-ba tajungba nung renloka odaktsür.

Agüja alibatemji takoktsü mapa aser lemangtem lir. Temulungtetba lira, mapa ajak takoktsü!

Laishibaren nungi Tetuyuba kar

Ochishiba aser yimjung indang Lai-o nung aser laiputi (theology of justice and peace) ajaklen aser teti nung nüngdak. Item Laishiba tesayubatemji tanga-mapa dak balaka tanü Covid-19 tensa nung kanga nüngdaka kümogo. Lemang item nungi reprangdangdi:

  • Ala-ashi tia nung ochi phuoküm (in defense of the poor/poverty)

Ochishiba indang tanü lokti putu tensa nung jembidi süra, Laishiba nung ainkartemi shina yutsüba nung ajemdaker asenoki bilemdangtsü koka lir. Amos, Isaia aser Yeremia ainkartemi Israel nungeri Tsüngrem dang tashi mangaba indang anema jembimeso. Item Tsungrem O tongdartemi tashi-makar atema nungdak aser parnoki ochi o jembi. Amosji Yihuda linük (alulanglen aliba yimli) nungi Israel (temaba yimli) limai atua pai ainkar mapa inyak. Pa tesayuba aika rongnung tongtibangtibaji ochi indang sayutsüngi. 8th century BCE tendak Israel yimliji yimji-yimjung aser rongsenren kanga junga akümba mapang ka liasü. Idangji takartemi – chubar jamirtemi – maka maitertem dang kanga mejungi benshi. Iba ochimashiba atema Amos ainkari ajang-ajanga anema apuso aser ala-ashir atema pukhüma jembi aser nokdak.

Amos-i linük nübur rongsen madak ochi mashi mapa inyakba ngua takartem anema shin o jembi. Tamangba yimsü maparen ajak tema tereprangtsü asoshi dang liasü, aser nüburtem kümzüka alitsü teimlajia kangabo maliasü. Amosi temulung raksa aser tasü ita nüburtem dang Tsüngremi kintemji merenshitsü ta osang sangoktsü. Pai ochiba “ayong ama yima aludakjang” ta ashi. Kechiaser paisa ashi “ashiko Kibuba Temeranger Tsüngremi, Yosef tanüngba dang aochitsüa kar” (5.15).

  • Loktilibaren ochishi mapaji Tsüngremi meteta lir (Amos 2:6-8)

Amosi Israel kin aser lokti temenen anema jembi. Pai joko nübur dang yamai sangdong:

6Yamai Kibubai ashir, “Israeli ozüng raksaba asem asoshi, oda pezü asoshi, ni iba temerenshi magientsü; kechiaser parnoki temeshipur taribi yong ayok, aser tsüngsem jura ka yong maka maiter ayoker. 

7Oda ali telungi ia sensaker kolak manung ajemshir, aser ajemalur lenmang nungtokadoker; aser kü temeshi tenüng menendaktsütsü asoshi tebu aser jabaso aiür kasa dangi air; 

8aser tenangzükba nung agiba süoshi manung tekülemdak shia anasa parnok sasa ontaka alir, aser Tsüngrem kidang parnoki sen chizükba yi ajemer (Amos 2:6-8)

Iba tetezü, takartemi nisung taküm shishilemba. Ibaji ochimashi aser tim masüba mapa inyakba asütsü. Sensakerji tetsüng nung semok chapall ka ama amshi. Alar kümdaktsü. Sensakerbo ali nung aowi ama dang ajemshi. Amitsür dang taochi mesayutet. Pei-pur bendanger, aener aser lajar dang temeim mesayu. Israel puri parnok tezüngzüktepba pur ta asübato amadok. Iba yongji, ainkar Amos kanga jashi aser pai Yehovah Tsüngrem o-bendang parnok dangi arutsü ta shin.

  • Ochishir sempaba

Amos 5:10 nung yamai ashir: “Süngkhüm nung arütsüba nisung dang parnoki sempar, aser atangji jembiba dang parnoki sempar.” Amos-i pa ainkar ola sashi-sashia jembi aser ibaji ochimashirtem arimeso (5:10-13). Agüja aliba Laiji reprangdangra, Israel puri shibaisa ochi-o jembidir, paji sempa. Amosi ashir, ochibaji Tsüngrem dak nungi tenzüker (5:7, 15, 24:6:12). Saka, taküm tilar kajia Kibubai odang metoktsür ta ashir. Anungji dang, Tenüngsang Ken zülur-i tamanger dang yamai ashir: “Kibubai tongmelanger awabanga ayur. Ni tajemzük kümdakja liasü, aser pai ni kümzüka” (T.Ken 116:6). Ya tetezü, Kibubai aochir saka atangji Pai inyaktsü.

  • Ochi ajanga Yimjung (Isa 32:17)

Isaia ainkar – 8th century BCE –  par nüburtem dang ochi aser yimjung indang sayua liasü .“Aser temeshiba mapa nungi adokbaji tesünep alitsü, aser ochiba nungi adokbaji teti asoshi ajemajema aliba aser tamang katetba alitsü” (Is 32:17). Iba Lai tekong jagi ochiba dangi tuyur. Kongsa ochiba mekalir, idakji yimjung makatsü. Ochimashi aser yimjung tenaji kodanga meputeptettsü. Kasa mesükba nung, Amos-ia yamai shina yutsü, “Saka tzü ama ochiba nunga aludakjang, aser ayong ama temeshiba moshia yimdakjang” (Amos 5:24).  Iba Lai tekong teratetbaji yamai angatettsü akoker.

Loktiliba kobai sentep nung atentsü jangrar, saka Tsüngrem asoshibo temulung maten, ibaji ashirepa aotsü aser iba nung temaitsu kaji tekubokba jenjang nung alir dang ochimashi inyakbaji asütsü.

  • Mapa meranga inyaktsü nungdak

Covid-19 tensa sülenbo bendang lima nungi shilanger asüyonga, pei jaka/tesem nungdang alir asüyonga, nisung shia agi putu tensa amato masü, saka kanga meranga inyaktsüla. Apijemtsü Shin nung yamai asenok meimchir ajungmesor: “Oh azümesen, na meja dangi oang. La yimya bilemdangang aser shisa ka-ang” (6:6). Tang temelenshiba tensa nungbo, joko nisung shinga pei kidang moka mekazütsüla. Ajaki pei-pei akok mapa meranga inyaktsü tim. Mejai tanen maka meranga inyakba ama, asenok meimchiribo iba shiruru tilaba den tuluba aser tajungba inyaktettsü. Aji koda tajung!         

O-Tempang:

Iba lima nung meimchir shingaia coronavirus koma arutsü aser koda kangshitsü meteta maliasü. Nüburtem uokrongpa, lemang aisü nung takoksa, aser tasüba jenti adokdaktsüba asadangtsü mokokla! Anosa, iba wara jagi asenok meimchir shirangdaktsüdagi. Shirang-shiko aser timtem jenti, iba wara yagi ala-ashi adokdaktsür; takar-sensaker lemdangtsü; mapa makai kümdaktsü; yimti aser jila shipangtsü; aenlen sensüsempongtsü nokdangtsü; aser tasütsü mapang kechi koda asütsü meshiteti kümdaktsü; ano aika lir. Süra, asenoki kechi inyaktsüla? Tang kechi inyaktsüla aji inyatsüla. Tat. Agi, bangdak alirtem tashi angatsüla, medical sciencei kechi ashir, ibaji kümdanga tashi anga anidaktsü. Iba den külemi, kija aser kibong, lokti taküm ajak nung iba wara aser ano tasenba wara (mutant variety) nungi jenbua alitsü mezüngbuba asenok teinyaktsü südi. Kümzüka alitsüji na aser ni dak aket. Na aser ni iba wara nungi kümzüka lira, asüngji asenok meyong!