All Ward Union Mokokchung Town (AWUMT) pur yimkong mungdang Marc 13, 2021 nü Arkong Ward Community Hall Mokokchung nung takok ngua agiogo. Iba sentong nung Mokokchung town kübok ward 18 nungi ward yimsüsür aser Gaon Bora-tem aden.
Tanü iba sentong nung merakettsür, Mokokchung Deputy Commissioner, Limawabang Jamiri jembidang, AWUMT tenzüker Mokokchung town küm 40 tashi tensa tia balala tizükteta arudaki aser iba telok yagi Mokokchung town nüburtem atema dang masü saka Ao kin songjen atema mapa tajung jenti inyakba ngua pelaba lemsatep.
2020 küm tenük agi manguba Covid-19 wara den tongpang raradang, AWUMT teyari ajanga maparen aika takok ngua inyaktetogo aser Mokokchung district nungbo iba wara nüburtem rongnung menashia aoba aser lendong tulu atalokba kecha maliasü, ta Mokokchung DC-isa pelaba metetdaktsü.
2020 küm North-East nung netsüng yongsük meyi tenem kübok aliba yimti rongnung Mokokchung town temerüktiba konang nguogo, aji oda, iba senpetji ano tanaben agizüktsüsa ward ajaki lungjemer merangtsü asoshi paisa mepishia metetdaktsü.
Yimsüsüba mendenji temeshi lir, anungji, tarak meketi yimsü asütsü asoshi pai tayongzükba ka agütsü. “Lenir ka akümtsü asoshi kilir shisatsü adentsüla. Nisung kwikati ni tenzüker ta masü saka ni nisung kwi tenzüker”, ta asüba tangatetba nung nübur tenzüktsü asoshi paisa shisem.
Paisa Mokokchung nung lenmang, light aser tzü tebilemtsü dak sentakba nung tang teinyakdak mapatong kar lemsatepba den inyaka aodang tebilemtsü ajuruba tem aser wadang balala nungji AWUMT-i shilem agitsü asoshi ajungshia liasü.
2021-2023 kümsük atema All Ward Union Mokokchung Town mendenpur itemi shimtet:
(i) Tir (President): Limanungsang (Mokokchung yim), Chairman, Sungkomen Ward
(ii) Tatong Tir (Vice President): Lanuakum (Waromung), Chairman, Salangtem Ward
(iii) Tongti Zülur (General Secretary): Jongpongtemjen (Longsa), Secretary, Arkong Ward
(iv) Repsem Zülur (Asst. General Secretary): Takusungba (Kinunger), Secretary, Yimyu Ward
(v) Sen Zülur (Finance): M. Bendangyanger (Chungtia), Secretary, Dilong Ward
(vi) Kimen (Treasure): Longertemjen (Ungma), Chairman, Aongza Ward
The Nokinketer 