2nd Mokokchung Inter-ward football tournament takoker team Artang Ward pur senpet agizüker pelatepba mapang tangokba noksa nung angur. Mokokchung, March 20, 2021   

March 9 nungi tenzüka yangi Imkongmeren Sports Complex nung 2nd Mokokchung Inter-ward Football Tournament asaya arur, March 20 nü final match Artang Ward o Penli Ward na asayaba, Artang-i goal 3-1 agi koka taküm iba asayamung marok parnoki benogo.

                Artang Ward-i goal asemprongji mezüng asaya tesadang (1st half) nung dang idaktsü. Mezüng goal ji Artang nungi striker Jersey No. 9 – Temshi Imchen-i minute 25 nung yok aser tanabuba aser tasembuba goal ji Artang nungi Jersey No. 37 – Ampangchubai minute 27 aser 29 nung goal kaka agütsü.

                Tanabuba asaya tesadang asayaba mapang Artang player kati D-Box telung nung penalty ka menasa aser iba penalty ji Penli Ward nungi captain – Imlitangit-i metsü aser Artang keeper-i ibaji mepushi yok.

                Takoker champion team nem senpet  trophy den kuli kaket aser sen 50,000/- (rupees fifty thousand) aser tanabuba runner up nema kuli kaket den sen 30,000/- (rupees thirty thousand) agütsüogo.

                Juri senpet (individual prize) agizükertem; Highest Scorer – Jersey No. 7 : Imnatoshi (Mongsenbai Ward, 8 goals), Best Defender – Jersey No. 3 : Limakümzük Jamir (Penli Ward), Best Midfield – Jersey No. 17 : Moa Imchen (Artang Ward) aser Player of the Tournament – Jersey No. 7 : Imlitangit (Penli Ward).  

                Artang Ward ya 2019 küm mezüng Mokokchng Inter-ward football tournament nunga final tashi atu saka parnoki Arkong Ward pur mekoki runner up dang ajangzük. Aji saka, taküm Arkong o Artang na semi final nung ajurutep aser Artang pur atema iba match ji mangyangba match ka mesüka liasü aser parnoki Arkong pur goal 2-0 agi tsükdakja final tongteta liasü.