Ao Baptist Arogo Mungdang (ABAM) Executive Secretary, Rev. Dr. Mar Atsongchanger den tepila aser Rev. Dr. Mar Pongener ABAM Executive Secretary mapa agizükba sentong ka April 1, 2021 nü Centenary Hall, Impur nung kaogo.
Sentong nung Rev. Dr. Mar Atsongchangeri salem o tatsüka ashidang, pa küm 10 tashi ES ka ama inyakdang pa temeim kinungtsü den chirnurtem, pa den külemi inyaker secretaries aser staff-tem, Mokokchung Baptist Arogo, kinunger aser anükabangtem aser arogo balala nungi pastor-tem, itemji pa atema tongshi tulutiba liasü, anungji, parnok ajak dang pelaba metetdaktsü.
Impur lima inyaka arudang tangazükba jenti nguogo, aji oda, meimchir dang asünung maparen balala inyakdang aibelen kar danga inyaksema lira, “tatok agüjangma” ta pai mepishia ashi. Pa melena ES tasen shiba arur, pa lenisüba kübok ABAM taoba mapang dang nungi tajungba aotsü imlar, ta paisa moatsü.
Rev. Dr. Mar Atsongchanger aser par kibongi Indonesia lima Riau Island (SIM) kübok Batam City nung missionary ka ama or tenzüktsü. Pa university ka nung tesayur mapa inyaktsü aser pa temeim kinungtsü (Wt. Amenla Mar)-a university nungji mentor mapa inyaktsü, ta angazüker.
Rev. Dr. Mar Pongeneria mapa agizükba olen tatsüka lemsatepdang, maongka tulu anguba asoshi pelaba den mapa ajak Tsüngrem dak rangloker inyaktsü merangtsü, anungji, nüburtem nungi shisatsü den sarasadem agi yaridaktsünür, ta mepishia metetdaktsü.
Rev. Dr. Mar Pongener ya Longjang nunger Wb. Yarmong’er jabaso lir. Pa kinungtsü – Sentila Jamir aser tena nem jala 1 aser jabaso 2 moaja lir. Pa CTC Aolijen nungi B. Th. renem, ETC Jorhat nungi B.D azüng, UTC Bangalore nungi M. Th renem, Trinity Theological College, Singapore nungi D. Th degree renem, 2011 küm ordain asü aser 2019 küm professorship CTC nungi angu. 1988-1989 Tuli Town Baptist Arogo nung Youth Director inyak aser 1991 nungi CTC nung tesayur mapa aser Dean of Post Graduate Studies, Academic Dean aser tangji Principal teinyakdak lir. Pa ya ABAM nunga tir inyakogo aser lokti balala nung amdaka aser shilem agia aruba takutet nübu ka lir. Pa ya ABAM Executive Secretary 7 buba asütsü.
Tanü sentong nung tayongzükba o jembir taoba ABAM Executive Secretary, Rev. L. Kari Longchar-i tanü arogotemi inyaktsüba wadang kar bener arua lemsatep. ABAM Vice President – Rev. Sentisashi, Ao Pastors Fellowship nungi – Rev. L Meren Kichu, Ao Theological Association tir – T. Lima, Mokokchung Baptist Arogo Pastor – Rev. Sobu Pongen, Rev. L. Yapang Mollier, Alemla Mozür, Rev. R. Teka Pastor parnokia sentong nung shilem balala agia liasü. ABAM tir – Dr. Lolen Imchen ajanga ABAM ES mapa melentepba ketdang süa liasü. Impur Bible School aser CTC choir-i salem ken aser moatsüba ken tena tesentepertem tanela nung ajungmeso.
(News Source: Tir Yimyim)
*Photo courtesy: Nokinketer
The Nokinketer 