~Rev. Alem Lemtur, Pastor, Delhi (Osang Zülur)

February 1, 2021 nü Myanmar Military Coup asüba nungi tenzüker tawa tashi nung Buddhist majority sepaitemi Myanmar nung aliba ethnic minorities aser Khristantem amokmerena rishikangshiba dang masü, saka ita ana nung joko nisung 530 tema tepsetogo aser nisung jenti yiruogo. Iba tensa tamajung ka nung nüburtem kanga timtem aser terokong tia nung lir, saka linük aser nübur meimertema aika lir, aser parnoki sepiatem anema kanga meranga raradagi. Anungji iba tensa tali tejangjaba nung angatettsü, aser India nung aliba amangbapurtem den khuret lemsateptsü atema “Myanmar Nung Kechi Atalokdar” ta asüba onük nung ajemdaker April 2, 2021 nü online Special Symposium ka Yanglushidi Sensaksem Sabang (YSS)-i  North East Christian University (NECU) ayongsemer iba ‘symposium’ kanga takok ngua alia liasü.  Myanmar nungi Tongi O Jembirtem parnok pezü jaoka liasü, aser item nübutem liasü: (i) Shri Salai Isaac Khen, Former State Minister of National League for Democracy (NLD), Yangon (ii) Dr. Seng Ja, Civil Disobedience Movement (CDM), Kachin State lenir ka, aser (iii) Tedim Christian College, Yangon nungi Professor ana, Dr. Mang aser Dr. Piang shilem agia liasü.

Dr. Wati Longchar-i YSS aser NECU tenüng nung tadener ajak pelaa agizük, aser okila nung tawa Myanmar nung military coup sülen majority Burman sepaitemi koma Naga nunger aser tanga minority kintem rishikangshia tepsetba indang lemsatep, aser India Democratic tetsüdi ka asü nungji nüburtemi shimba lenir atsüngdokba aser nüburtem tepseta rishikangba anema Indiai ochi yimyim agütsütsü nüngdaker. Sendong metenzükdang asürtem nem akümtsübu agüja tatener ajaki second 10 ajem-ajema ata. Iba sülen Tongti o jembirtem pai tejak-sayu, aser parnok ‘symposium’ nung tentetba atema pelaba metetdaktsü.

O Jembirtemi nungi tongtibang tangazükba kar yamai lemsateper:

  1. Military coup anema Myanmar nung amangbapurtemi item meratem agir: (i) Iba anema jembir aser zülur, (ii) Lenmang nung adoka ayimtener (iii) Sarasadem aser mapa külemi aor, tat. agi, lenmang nung, tenlakidang aser online sarasademer, aser pei talidak ki raksar alirtem aser jenshia alirtem nem teyari agütsür, (iv) Efesa 6:12 nung ajemdaker iba ya ‘political parties’ tsüngda rara masü, saka ochi asoshi raraba ka lir.
  2. Military coup anema Cardinal Charles Maung Bo-i February 3, 2021 nü ‘Roman Catholic’s Statement’ agütsü, Myanmar Baptist Convention-i ‘Statement on Military Coup’ February 5, 2021 nü agütsü, Methodist Church (Upper Myanmar)-i ‘Statement on Military Coup’ February 7, 2021 nü agütsü, Association For Theological Education in Myanmar-i February 11, 2021 nü ‘Statement on Military Coup’ agütsü. Tamang telok ajaki lokti mulung yimden anema inyakba aitsü, lenirtem tepokdak aliba chioktsüla, aser azü tokshia tashiyim nung yinjang yokba aser Civil Disobedience Movement tim aser Khristantem atener ta ola agütsü.
  3. April 2, 2021 tashi nung Myanmar nung sepaitemi civilian 530 tema tepsetogo (Yangon-149, Mandalay-165, Sagaing-41, Thaninthari-28, Shan-24, Pegu-24, Magway-23, Irrawady-10, Kachin-10, Mon-7, Nayyidaw-3, Kayah-1). Anogo shia tai maketba nübur aika tepsetdaki aser nisung merijang aika tekümzüktsü bushi Thailand aser India jena arudagi.
  4. Arogotemi Myanmar nüburtem den külemi nokdaktsü, aser temenen anema temeshi, aser mamangba anema tamangba-i takok mangu tashi meneni raratsü.
  5. Nüburtem dangi yimjung, ochi-obendangba, tashi, aser democracy meyipa maru tashi North East India nung aliba adianutemi Myanmar nüburtem yaritsü ajungshir. 
  6. Ken yongi meimlai liasü, saka nüburtemi Civil Disobedience Movement (CDM) tenzüka lir, aser ibaji kanga tashi ita odagi, aser Myanmar Sorkar mapatem aika anendaka lir.
  7. North East India state-tem, talisa Nagaland, Manipur aser Mizoram nung CDM nung atenertem jenokdaktsüba atema pelaba metetdaktsü.
  8. Tawa Myanmar sepaitemi ‘coup’ asüba ya ‘unconstitutional,’ aser tai.
  9. NLD aser Committee Representing Pyidaungsu Hluttaw (CRPH) ajanga inyakbatem kar: (i) Foreign Relations Committee ka tenteta international Community den tongtep rateper; (ii) Tanga lokti, aser kintem den tesendaktep yanglur; (iii) ‘Street protest committees’ aser ‘activists’ den tesendaktep yanglur; (iv) Federal Democracy Charter ka yanglur agizüka lir, (v) Military coup anema, aser tang aliba Constitution melentsü atema telok karibo prangpong amer raratsü tenzükogo, saka yimjung bener arutsü meji UN teyari temeshidak lir.
  10. College nung tesayur aser CDM lenir kati Military coup, aser Kachin yim ka nung tashiyim agi Buddhist tenlaki (Pagoda) yanglutsü tenzükba anema nokdakba ajanga March 13, 2021 aonung 10:45 ako nung Kachin Theological College and Seminary-i sepaitem talongtsü 15 nung arua la aputsü merang, saka Dr. Seng Ja jenpoba indang kuli agüja liasü.
  11. Alima ajunga nung prokshia aliba Kachin nungertemi CDM ajanga Myanmar Military anema nokdakba nung shilem agidagi, saka China aser Arunachal nung aliba Kachin nungertemi shilem magir.
  12. Kachin lima den China-Myanmar artsü nung China-i ‘electric fence’ yokba ajanga Myanmar sepaitemi kodang iba tesem nung aliba Kachin yimtem amaker, nüburtem mejenteter. Anungji joko tanga lenmang kecha mali raratsüsa akümer.
  13. UN aser tanga secular teloktem nungi teyari mangu yongjia, talisa India nung aliba Khristantem nungi timtemer aser rishikangshi tia nung alirtem asoshi teyari ola angashitsü tiemla lir.
  14. Pei taküm aser pei nüburtem kümzüktsü meji Kachin nung aliba tamangertem; Theological College nung aliba tesayurtema kar dena prangpong amshitsü angazüka frontline nung nokdaka lir.
  15. Yimtem nung sepaitemi bomb pokloktsür aser injang agi akar, anungi nüburtem aika arem nung jenoka lir. Anungji rescue-team, back-pack medical team, mozü, first-aid training, minor-operation training, chiyungtsü, süki, aser tanga teyari aika nüngdaker.
  16. Home-school, protection aser security takok ngua bener aotsü asoshi merangdaki.
  17. UN nungi tang tashi teyari mangur, kechiaser UN nung tashi tulutiba kin anaji US aser Russia lir, aser tang Russian pilot-temi Myanmar nung training tagütsüdak lir.
  18. Kobi melii Civil War adoktsü nükla nung anguba ajanga Kachin Armed Groups, Shan and Karen Armed Groups koba temalena nungi tenteta liasü, itemji longjemer Federal Army ka tenteter telongjem nung raratsü merangtsü.
  19. Democracy meimertem, aser military yimsüsüba maginertem ‘Burmese majority’ aser ‘minority ethnic groups’ nuburtem aika lir, aser tang aliba ‘elected politicians,’ ‘ethnic political parties,’ ‘ethnic armed organizations,’ aser ‘civil society groups’ lungjemer National Unity Government (NUG) tentettsü telong nung jembidaki. Iba ya ‘legitimate’ aser ‘equally-represented’ sorkar ka asütsü imlar.
  20. Myamnar North East den 1600 km shi lir. Naga nunger, Chin-Mizo, Shingpo nunger tesadang ka India aser tesadangka Myanmar nung lir. Ano iba den parnokji teimba ka Khristan. Myanmar nunger NEI nüburtemi yaria arudagi aser ano maneni yaritsü ian timtem mapang nungdaker ta ashi.

India ya democratic country nung nütsüng teimtiba aliba lima ka. India nüchiso ngur nungi lokti mulungba yimden, freedom of speech, human rights, freedom of religion atema noktaker. Pakistan anema ola adokba dak alaka, tanü Myanmar military anema yimyim  den Indiai iba amai inyaktsü ta tejangja tasü tait ola ka PM aser Home Minister amai nungi mali. Ya kanga dang tesasatsü aser alima dang maksü tulu. 27th March Myanmar nung Armed Forces Day amonger aser iba anogo India nungia teshimtet kar oa atenba ajanga India military coup-ji shitak amai sayuogo aser tanü tashi Indiai raraba oset ayoker. Western countries, US aser Asia nung country aikati Myanmar den shishilemba anenogo, saka Indiabo tanü tashi manen ta sensaksem mapang shisema liasü. Kechiba kecha tai makaba nüburtem tepsetsü raraba oset ayoktsü?  Iba den Adani Group shishilemba tajangzük mechi Indiai military coup anema ola madoker? Mizoram Government-i Myanmar refugee yaritsüla aser India Governmenti military coup anema yimyim agüja ta ayimoktsüogo. Naga nunger yimden lenir ola kechiba mali?  Tsüngremi meimchir ajak pa mesükba nung yanglu aser shiangai meimchir taküm agitsü makok. Tsüngrem mezükba nung yanglu ta asüba nungji freedom of speech, liberty ajak dena lir. Military general ishikati tanga lima Cooperate kar den som sür rongsen ketzüng, yimden arakmoka ayubaji aitsütsüla, aser tamangba tashi alenpanga ayutsü merangbaji Lai tesayuba masü.  Anungji Naga nunger yimsüsüri anir ochi ola, militaryi tashiyim inyakba mapa anema, aser nüburtemi shimtetba lenir chiyokang aser parnok nem yimsüsüba mendenji meyipa agüja ta ola adoktsü mapang. Nüburtem nem yimden tashi magütsü tashi military government den shilembaba mapa anentsüla ta akhangtsüla. Ano Covid-19 wara mapang arogotem lungjemer timtemer yariba ama, Myanmar refugee India arura meyipa meyoki tariteptsü nungdak ta lemsatep.